سوال: مفتی صاحب! براہ کرم اس واقعہ کی تصدیق فرمادیں:
ایک دن پیغمبر علیہ الصلوۃ والسلام صحابہ کرام رضوان اللہ علیہم اجمعین کے درمیان تشریف فرما تھے کہ آپ نے اچانک فرمایا: یطلع الان علیکم رجل من اھل الجنتہ کہ ابھی تمھارے پاس سے ایک جنتی شخص گزرے گا صحابہ کرامؓ منتظر رہے تو ایک انصاری صحابی وضو کے بعد اپنی ڈاڑھی جھاڑتے ہوئے بائیں ہاتھ میں جوتے اٹھائے تشریف لا رہے ہیں، دوسرے دن بھی رسول اللہ صل اللہ علیہ وسلم نے اسی طرح کے کلمات ارشاد فرمائے، صحابہ کرام نے دیکھا کہ آج پھر اس بشارت عظمٰی کے مستحق وہی انصاری صحابی بن رہے ہیں اور اسی شان سے گزر رہے ہیں، اسی طرح تیسرے دن بھی آپ صلی اللہ علیہ وسلم نے یہی بشارت دی اور وہی انصاری صحابی گزرے۔
جب مجلس نبوی برخاست ہوئی تو حضرت عبد اللہ بن عمر رضی اللہ عنہ چپکے سے ان کے پیچھے ہو لیے، جب ان کے گھر کے قریب پہنچے تو کہا کہ میرے ساتھ کوئی ایسا گھویلو مسئلہ بن گیا ہے کہ میں نے تین دن تک اپنے گھر داخل نہ ہونے کی قسم اٹھا رکھی ہے، اگر آپ مہربانی فرمائیں اور مجھے اپنے ہاں تین دن قیام کرنے دیں تو میں آپ کا بے حد شکر گزار ہوں گا۔
اس انصاری نے کہا ٹھیک ہے۔ حضرت عبداللہ بن عمرؓ نے تین دن تک ان انصاری صحابی کے ہاں قیام کیا اور ان کے اعمال کا بغور جائزہ لیا کہ آخر اس شخص کے اندر کون سی ایسی خوبی ہے کہ رسول اللہ صلی اللہ علیہ وسلم تین دن تک اس کے جنتی ہونے کی بشارت دیتے رہے۔
حضرت عبداللہ بن عمرؓ فرماتے ہیں کہ رات کو وہ معمول کے مطابق عبادت کرتا تھا اور اللہ کا ذکر بھی معمول کے مطابق ہی کرتا تھا، اپنی زبان سے حتی الوسع بھلائی کا کلمہ نکالتا تھا، میں نے اس کی نیکی کو معمولی سمجھا اور دل میں سوچا کہ یہ تو کوئی ایسی نئی یا بڑی بات نہیں ہے۔آخر تین دن بعد میں نے اس کے سامنے ساری حقیقت بیان کردی کہ میں نے تو محض تمہارے اعمال وغیرہ دیکھنے کے لیے یہ طریقہ اختیار کیا تھا، کیونکہ رسول اللہ صلی اللہ علیہ وسلم نے اس طرح تمہارے بارے میں بشارت دی تھی، مہربانی کرکے مجھے بتائیں کہ تمہارے اندر کون سا ایسا عمل ہے جس کی وجہ سے بارگاہ رسالت میں تمہیں یہ بلند مقام ملا؟ یہ سن کر اس انصاری کی آنکھوں میں آنسو آگئے اور بصد اصرار مجھے بتایا کہ اور تو کوئی عمل میرے پاس نہیں ہے سوائے اس کے کہ میں: لا اجد فی نفسی لاحد من المسلمین غشا ولا حسداً (اپنے دل میں کسی مسلمان کے لیے کھوٹ اور حسد نہیں رکھتا) حضرت عبداللہ بن عمرؓ فرماتے ہیں کہ اب مجھے بات سمجھ میں آگئی کہ یہی وہ عظیم عمل ہے جس کی وجہ سے ان کو یہ عظمت حاصل ہوئی۔ (جواہر التاریخ الاسلامی)

جواب: سوال میں ذکرکردہ روایت کو فضائل کے باب میں بیان کیا جاسکتا ہے۔
ذیل میں اس روایت کا ترجمہ اور اسنادی حیثیت ذکر کی جاتی ہے:
ترجمہ: حضرت انس بن مالک رضی اللہ عنہ فرماتے ہیں کہ ایک مرتبہ ہم لوگ نبی ﷺ کی خدمت میں بیٹھے ہوئے تھے کہ آپ ﷺنے فرمایا ” ابھی تمہارے پاس ایک جنتی شخص آنے والا ہے‘‘ ،چنانچہ ایک انصاری صحابی اس حالت میں تشریف لائے کہ وضو کا پانی ان کی داڑھی سے ٹپک رہا تھا اور انہوں نے اپنے جوتے بائیں ہاتھ میں اٹھارکھے تھے، دوسرے دن بھی آپ ﷺنے (یہی) فرمایا: ابھی تمہارے پاس ایک جنتی شخص آنے والا ہے، وہ شخص اسی طرح تشریف لائے (وضو کا پانی ان کی داڑھی سے ٹپک رہا تھا اور انہوں نے اپنے جوتے بائیں ہاتھ میں اٹھارکھے تھے) تیسرے دن بھی آپ ﷺنے (یہی) فرمایا: ابھی تمہارے پاس ایک جنتی شخص آنے والا ہے، (وضو کا پانی ان کی داڑھی سے ٹپک رہا تھا اور انہوں نے اپنے جوتے بائیں ہاتھ میں اٹھارکھے تھے)جب نبی ﷺاٹھ کر چل دیے تو حضرت عبد اللہ بن عمرو بن العاص رضی اللہ عنہما ان انصاری صحابی کے پیچھے ہولیے اور اس انصاری سے کہنے لگے حضرت! مجھ میں اور میرے والد میں کچھ بول چال ہوگئی ہے جس پر میں قسم کھا بیٹھا ہوں کہ تین دن تک اپنے گھر نہیں جاؤں گا،لہذا اگر آپ مناسب سمجھیں تو اس مدت تک اپنے یہاں رہنے کی مجھے اجازت مرحمت فرمائیں، انصاری صحابی نے جواب دیا ٹھیک ہے۔
حضرت انس فرماتے ہیں کہ عبد اللہ بن عمر و کا بیان ہے کہ میں نے ایک رات یا تین رات ان کے یہاں گزاری لیکن دیکھا کہ وہ رات میں کوئی عبادت نہیں کرتے، صرف اتنا کرتے کہ رات میں جب بھی بستر پر کروٹ بدلتے تو اللہ کا ذکر کرتے اور اس کی بڑائی بیان کرتے ،یہاں تک کہ فجر کے لیے بیدار ہوتے ، عبد اللہ بن عمر و کا بیان ہے کہ(ایک بات یہ بھی دیکھی کہ) میں نے ان کے منہ سے سوائے کلمہ خیر کے اور کچھ نہیں سنا، جب تین دن پورے ہوگئے تو مجھے ان کا عمل بہت ہی ہلکا سا معلوم ہونے لگا ۔تو میں نے کہا : اے اللہ کے بندے! دراصل نہ تو میرے اور میرے والد صاحب کے درمیان کوئی ایسی باتیں ہوئی تھیں نہ میں نے ناراضگی کے باعث گھر چھوڑا تھا بلکہ واقعہ یہ ہوا کہ تین مرتبہ آنحضرت ﷺ نے فرمایا کہ’’ ابھی ایک جنتی شخص آ رہا ہے‘‘ اور تینوں دن آپ ہی تشریف لائے ، تو میں نے ارادہ کیا کہ آپ کے پاس رہ کر کر آپ کا عمل دیکھوں (تا کہ میں بھی ویسا عمل کرسکوں) لیکن میں دیکھ رہا ہوں آپ کوئی زیادہ عمل نہیں کرتے ، پھر کیا وجہ ہے کہ آپ اس مقام کو پہنچے جس کی بنیاد پر اللہ کے رسول ﷺنے یہ بات کی ہے ؟
انہوں نے کہا : بس تم میرے اعمال تو دیکھ چکے ان کے سوا اور کوئی خاص پوشیدہ عمل تو ہے نہیں ،پھر جب میں وہاں سے واپسی کے لیے مڑا تو انہوں نے مجھے آواز دے کر بلایااور فرمایا :عمل تو وہی ہے جو تم نے دیکھا، البتہ ایک بات ضرور ہے کہ میرے دل میں کبھی کسی مسلمان سے دھوکہ بازی کا ارادہ بھی نہیں ہوا اور نہ ہی اللہ تعالی کی دی ہوئی بھلائی اور نعمت پر ان سے حسد کرتا ہوں۔ حضرت عبد اللہ بن عمرورضی اللہ عنہما نے کہا : اسی عمل نے آپ کو اس درجہ تک پہنچایا ہے اور یہی وہ چیز ہے جو ہر ایک کے بس کی نہیں۔(سنن نسائی کبری ،حدیث نمبر: 10633)
تخريج الحديث:
۱۔ اس روایت کو امام نسائی (م303ھ) نے’’السنن الکبری‘‘(9 / 318،رقم الحديث: 10633،ط:مؤسسة الرسالة) میں نقل کیا ہے ۔
۲۔ امام عبدالرزاق بن ہمام (م211ھ)نے’’مصنف عبدالرزاق‘‘ (11 / 287،رقم الحدیث:20559،ط:المجلس العلمي) میں نقل کیا ہے ۔
۳۔امام احمد بن حنبل (م241ھ) نے ’’مسند أحمد ‘‘(20 / 124،رقم الحديث:12697،ط: مؤسسة الرسالة) میں نقل کیا ہے ۔
۴۔امام عبد ابن حمید(م249ھ) نے ’’مسند عبد بن حمید‘‘(المنتخب) ( 350،رقم الحدیث:1159،ط:مکتبة السنة) میں نقل کیا ہے ۔
۵۔امام طبرانی (م360ھ) نے ’’مكارم الأخلاق‘‘(327،رقم الحديث:72،ط:دارالكتب العلمية) میں نقل کیا ہے ۔
۶۔ امام بیہقی (م458ھ) نے ’’شعب الإيمان‘‘ (5/ 264 – 265،رقم الحديث: 6605) میں نقل کیا ہے ۔
مذکورہ روایت کی اسنادی حیثیت :
علامہ منذری (م656ھ) ،علامہ ہیثمی (م807ھ) اورعلامہ بوصیری (م840ھ) نے اس حدیث کو’’صحیح ‘‘قرار دیا ہے لیکن امام دارقطنی (م385 ھ)نے اس حدیث کو معلول قرار دیا ہے کیونکہ امام زہری نے یہ حدیث حضرت انس رضی اللہ عنہ سے نہیں سنی ،اس لیے کہ امام زہری سے نقل کرنے والے تین روات شعیب بن ابی حمزہ ،عقیل اور اسحاق بن راشد نے اس حدیث کو امام زہری سے حدثني من لا أتهم، عن أنس کے طریق سے نقل کیا ہے اور یہی بات علامہ مزی (م742ھ)نے ’’تحفۃ الأشراف‘‘ میں امام حمزہ بن محمد کنانی سے نقل کی ہے ۔ اور امام بیہقی (م458ھ) نے بھی شعب الإیمان (5 / 264-265) (6606)میں اسی طریق کو نقل کیا ہے۔
علامہ ابن حجر عسقلانی (م852ھ) نے بھی ’’ النكت الظراف على الأطراف‘‘( 1/395)( 1550)میں اس حدیث کو ’’معلول‘‘ کہا ہے۔
خلاصہ ٔکلام:
اس حدیث کی تصحیح میں اہلِ علم کا اختلاف پایا جاتا ہے ،بعض اہل ِ علم نے اس کو ’’صحیح‘‘قرار دیا ہے اور بعض نے اس کو ’’معلول‘‘قراردیا ہےاور بظاہر ان ہی اہلِ علم کا قول زیادہ راجح معلوم ہوتا ہے، واللہ اعلم بالصواب۔
البتہ چونکہ اس حدیث کا تعلق فضائل کے باب سے ہے، نیز اس کا شاہد بھی موجود ہے، اس لیے اس حدیث کو بیان کرنا درست ہے۔