سوال: محترم مفتی صاحب! اس واقعہ کی تحقیق مطلوب ہے۔
حضرت صعصعہ بن ناجیہ ؓ دروازہ رسول اللہ ﷺ پر کلمہ پڑھنے آئے، مسلمان ہونے کے بعد نبی کریم ﷺ کی بارگاہ میں عرض کرنے لگے کہ اے اللہ کے رسول ﷺ مجھے آپ سے ایک بات پوچھنی ہے؟ حضور ﷺ نے فرمایا : پوچھو۔ کہنے لگیں یا رسول اللہ! دور جاہلیت میں ہم نے جونیکیاں کی ہیں، ان کا بھی اللہ ہمیں اجر عطا کرے گا؟ تو نبی کریمﷺ نے فرمایا : تو بتا تو نے کیا نیکی کی ہے ؟ تو کہنے لگیں یا رسول اللہ! میرے دو اونٹ گم ہوگئے تو میں اپنے تیسرے اونٹ پر بیٹھ کر اپنے دو اونٹوں کو ڈھونڈنے نکلا، میں اپنے اونٹوں کو ڈھونڈتے ڈھونڈتے جنگل کے اس پار نکل گیا، جہاں پرانی آبادی تھی۔ میں نے وہاں اپنے دونوں اونٹوں کو پالیا۔ ایک بوڑھا آدمی جانوروں کی نگرانی پر بیٹھا تھا، اس کو جا کر میں نے بتایا کہ یہ دو اونٹ میرے ہیں، وہ کہنے لگا یہ تو چرتے چرتے یہاں آگئے تھے، تمہارے ہیں تولے جاؤ ! انہی باتوں میں اس نے پانی بھی منگوا لیا، چند کھجوریں بھی آ گئی، میں پانی پی رہا تھا اور کھجوریں بھی کھا رہا تھا کہ ایک بچے کی رونے کی آواز آئی تو وہ بوڑھا آدمی پوچھنے لگا کہ بتاؤ بیٹی آئی کہ بیٹا؟ میں نے پوچھا بیٹی ہوئی تو کیا کرو گے؟ کہنے لگا اگربیٹا ہوا تو قبیلے کی شان بڑھائے گا اور اگر بیٹی ہوئی تو ابھی یہاں اسے زندہ دفن کردوں گا، اس لیے کہ میں اپنی گردن اپنے داماد کے سامنے جھکا نہیں سکتا۔ میں بیٹی کی پیدائش پر آنے والی مصیبت برداشت نہیں کر سکتا۔ میں ابھی دفن کردوں گا۔ حضرت صعصعہ بن ناجیہ ؓ فرمانے لگے یا رسول اللہ ! یہ بات سن کے میرا دل نرم ہوگیا، میں نے اسے کہا پھر پتا کرو کہ بیٹی ہے یا بیٹا؟ اس نے معلوم کیا تو پتا چلا کہ بیٹی پیدا ہوئی ہے۔ میں نے کہا کہ کیا واقعی تو دفن کرے گا؟ کہنے لگا ہاں ! میں نے کہا دفن نہ کر مجھے دے دے میں لے جاتا ہوں، یا رسول اللہ! وہ مجھے کہنے لگا اگر بچی تمہیں دے دوں تو تم کیا کرو گے؟ میں نے کہا تم میرے دو اونٹ رکھ لو، بچی دے دو، کہنے لگا نہیں دو۔ یہ جس اونٹ پہ تو بیٹھ کے آیا ہے یہ بھی لے لیں گے۔ حضرت صعصعہ بن ناجیہ ؓ عرض کرنے لگے کہ ایک آدمی میرے ساتھ گھر بھیجو یہ مجھے گھر چھوڑ آئے، میں یہ اونٹ اسے واپس دے دیتا ہوں۔ یا رسول اللہ ﷺ میں نے تین اونٹ دے کے ایک بچی لی، اس بچی کو لا کے میں نے اپنی کنیز کو دیا، نوکرانی اسے دودھ پلاتی۔ یا رسول اللہ ﷺ وہ بچی میری داڑھی کے بالوں سے کھیلتی، وہ میرے سینے سے لگتی، حضور پھر مجھے نیکی کا چسکا لگ گیا، پھر میں ڈھونڈنے لگا کہ کون کون سا قبیلہ بچیاں دفن کرتا ہے؟ یا رسول اللہ ﷺ میں ڈھونڈنے لگا میں تین اونٹ دے کے بچی لایا کرتا، یا رسول اللہﷺ میں نے 360 بچیوں کی جان بچائی ہے۔ میری حویلی میں تین سو ساٹھ بچیاں پلتی ہیں۔ حضور مجھے بتا میرا مالک مجھے اس کا اجر دے گا؟ کہتے ہیں حضور کا رنگ بدل گیا، داڑھی مبارک پر آنسو گرنے لگے مجھے سینے سے لگایا، میرا ماتھا چوم کے فرمانے لگے، یہ تو تجھے اجر ہی تو ملا ہے، رب نے تجھے دولت ایمان عطا کر دی ہے، نبی کریم ﷺ فرمانے لگے، یہ تیرا دنیا کا اجر ہے اور تیرے اللہ کے رسول ﷺ کا وعدہ ہے کہ قیامت کے دن رب کریم تمہیں خزانے کھول کر دے گا۔ امام طبرانی نے اس حدیث کو طبرانی میں لکھا ہے۔

جواب: سوال میں مذکور واقعہ حدیث سے ثابت ہے، اس حدیث کے ایک راوی "طفیل بن عمرو التمیمی" پر محدثین کا مختلف کلام ہے، جس کی وجہ سے یہ حدیث ضعیف ہے، تاہم چونکہ یہ ضعف شدید نہیں ہے، اس لیے ضعف کی صراحت کے ساتھ اس واقعے کو بیان کیا جا سکتا ہے۔
نیز سوال میں یہ واقعہ ادھورا بیان کیا گیا ہے، ذیل میں اس حدیث کا مکمل ترجمہ اور اسنادی حیثیت ذکر کی جاتی ہے:
ترجمہ:
حضرت صعصعۃ بن ناجیہ المجاشعی رضی اللہ عنہ جو کہ (مشہور شاعر) فرزدق بن غالب بن صعصۃ کے جد امجد ہیں، ان کا بیان ہے کہ میں آنحضرت صلى اللہ علیہ وسلم کى خدمت میں حاضر ہوا، آپ نے مجھے اسلام کى دعوت دى، میں اسلام لے آیا اور مجھے قرآن کریم میں سے کچھ آیات سکھائیں، پھر میں نے عرض کیا: یا رسول اللہ! میں نے زمانہ جاہلیت میں کچھ (نیک) کام کیے ہیں، کیا مجھے ان پر اجر ملے گا؟ آپ نے فرمایا: "وہ کونسے (نیک) کام ہیں؟" میں نے عرض کیا: میرى دس ماہ کى دو گابھن اونٹنیاں گم ہو گئیں، چنانچہ میں اپنے ایک اونٹ پر سوار ہو کر ان کى تلاش میں نکل پڑا، اس دوران مجھے ایک کھلے میدان میں دو کمرے نظر آئے، میں ان کى طرف بڑھ گیا، اُن دو کمروں میں سے ایک کمرے میں ایک عمر رسیدہ بوڑھا شخص ملا تو میں نے ان سے کہا: کیا آپ نے دو گابھن اونٹنیاں دیکھى ہیں؟ اس کے جواب میں اس بوڑھے شخص نے کہا: ان دو اونٹنیوں کى نشانیاں کیا ہیں؟ میں نے کہا ان پر "بنی دارم" (بنو دارم حضرت صعصعۃ رضی اللّٰہ عنہ کے قبیلے کا نام ہے) کى علامت لگى ہوئى ہے، اس پر اس نے کہا: ہمیں آپ کى دونوں اونٹنیاں ملى ہیں، ہم نے ان کے بچے جنوائے اور ان کى دیکھ بھال کى (یعنی وہ گابھن تھیں، ان کے بچوں کى ولادت کے وقت اور اس کے بعد ان کى دیکھ بھال ہم نے کى ہے) اور اللہ تعالى نے ان کے ذریعے تمہارى قوم (عرب) کے قبیلہ مضر کے ایک گھر کو خوشحال کر دیا ہے، وہ بوڑھا شخص مجھ سے محو گفتگو تھا، اسى دوران ایک عورت نے دوسرے کمرے سے آواز دى: بچہ جَنْنے والی نے بچہ جَنْ دیا ہے (جس عورت کے ہاں بچے کی ولادت ہونی تھی، اس کے ہاں بچے کى ولادت ہوئى ہے) یہ سن کر اس بوڑھے نے کہا: کیا جَنا ہے؟ اگر لڑکا جَنا ہے تو وہ ہمارے ساتھ ہمارى قوم میں شریک ہوگا اور اگر لڑکى ہوئى تو اس کو دفن کر دو، اس کے جواب میں اس عورت نے کہا: لڑکى ہے۔ میں نے کہا: یہ زندہ درگور ہونے والى بچى کون ہے؟ اس بوڑھے نے کہا: میرى بیٹى ہے۔ میں نے کہا: میں تم سے اس بچى کو خرید لیتا ہوں۔ اس بوڑھے نے کہا: اے تمیمى! کیا تم مجھ سے یہ کہنا چاہتے ہو: کیا تم مجھے اپنى لڑکى بیچو گے؟ حالانکہ میں نے تمہیں بتلا دیا ہے کہ میں عرب کے قبیلہ مضر کا آدمى ہوں (گویا یہ ہمارى شان کے خلاف ہے کہ ہم اپنى لڑکى کو بیچ دیں) تب میں نے کہا: میں تم سے تمہارى لڑکى کو بطورِ ملکیت نہیں خرید رہا ہوں، بلکہ میں تو صرف اس کى روح خرید رہا ہوں کہ تم اس کو قتل نہ کرو۔ اس بوڑھے نے کہا: تم کتنى قیمت میں خریدو گے؟ میں نے کہا: میں اپنى ان دو اونٹنیوں اور ان کے دونوں بچوں کے عوض اس بچى کى روح کو خریدتا ہوں، اس بوڑھے نے کہا: کیا تم اپنے اس اونٹ کو بھى قیمت میں شامل کرو گے؟ میں کہا: ٹھیک ہے (میں اس اونٹ کو بھی قیمت میں شامل کر دوں گا) اس شرط پر کہ تم اپنا ایک قاصد میرے ساتھ بھیجو، جب میں اپنے گھر پہنچ جاوں گا تو تمہارا یہ اونٹ تمہیں لوٹا دوں گا، اس نے ایسا ہى کیا، پس جب میں اپنے گھر والوں کے پاس پہنچ گیا تو میں نے اس کا اونٹ واپس لوٹا دیا، جب رات کا کچھ حصہ گذر گیا تو میں نے اپنے جى ہی جی میں سوچا: یہ کام تو بھلائى کا بہت بڑا کارنامہ ہے، مجھ سے پہلے عرب کے کسى شخص نے ایسا خیر کا کارنامہ سرانجام نہیں دیا ہے، (پھر میں لگا تار اس خیر کے کام میں لگا رہا) چنانچہ اسلام کے ظاہر ہونے تک میں نے 360 بچیوں کى جان بچائى، ہر ایک بچى کو دو گابھن اونٹیوں اور ایک اونٹ کے بدلے میں خریدتا تھا تو کیا میرے اس خیر کے کام پر کوئى اجر ہے؟ اس پر آنحضرت صلى اللہ علیہ وسلم نے ارشاد فرمایا: "تمهیں اس نیک عمل کا ثواب ملے گا، کیونکہ تم پر اللہ تعالى نے اسلام کى دولت سے اپنا فضل فرما دیا ہے" (اسلام لانے کے بعد اسلام سے پہلے کے نیک اعمال کا ثواب ملے گا) عَبَّاد (راوی حدیث) کہتے ہیں: حضرت صعصعہ رضی اللہ عنہ کے قول کا مصداق فرزدق شاعر كا یہ شعر ہے، (ترجمہ شعر): اور میرا دادا وہ شخص ہے جس نے زندہ درگور کرنے والیوں کو اس (بھیانک) عمل سے روکا، پس اس نے زندہ درگور ہونے والى (عورت) کو زندگى دلائى، سو پھر اس کے بعد اسے (عورت) کو زندہ دفن نہیں کیا گیا۔
(المعجم الکبیر للطبرانی: حدیث نمبر: 7412)
تخریج الحدیث:
1) امام بخارى رحمہ اللہ (م 256 ھ) نے اس حدیث کو اپنی کتاب "التاریخ الکبیر" 4/ 319 ، ترجمۃ صعصعۃ بن ناجیۃ المجاشعی، ط: دائرة المعارف العثمانية، حيدر آباد – الدكن، میں مختصرا نقل فرمایا ہے۔
2) ابن ابی عاصم رحمہ اللہ (م 287 ھ) نے "الآحاد والمثانی" 2/ 403، رقم الحدیث (1199)، ط: دار الرایۃ-الریاض، میں اس حدیث کو نقل فرمایا ہے، اس کے آخر میں یہ الفاظ ہیں: آنحضرت صلى اللہ علیہ وسلم نے ارشاد فرمایا: "یہ کام تو نیکى کا ایک دروازہ اور آپ اس کا اجر ملے گا کونکہ اللہ تعالى نے آپ کو اسلام کى دولت سے نوازا ہے"۔
3) امام بزار رحمہ اللہ (م 292 ھ) نے "مسند البزار" بحوالہ کشف الأستار 1/ 55، رقم الحدیث (72) كتاب الإيمان/ باب فيمن عمل خيرا قبل أن يسلم، میں اس حدیث کو نقل فرمایا ہے۔
4) امام ابو یعلى رحمہ اللہ (م 307 ھ) نے "مسند ابی یعلى" بحوالہ لسان المیزان 4/ 353 ، ط: مکتب المطبوعات الإسلامیۃ، میں "طفیل بن عمرو التمیمی"کے تذکرے میں نقل فرمایا ہے۔
5) امام حاكم رحمه الله (م 405 ھ) نے "المستدرک على الصحیحین" 3/ 707 رقم الحدیث (6562) کتاب معرفة الصحابة/ ذكر صعصعة بن ناجية المجاشعي رضي الله عنه، ط: دار الكتب العلمية، میں نقل فرمایا ہے، اس کے اندر آنحضرت صلى اللہ علیہ وسلم کے یہ الفاظ بھى ہیں: "تمہارے اس نیک عمل کا اجر مکمل ہو گیا ہے، کیونکہ اللہ تعالى نے تمہیں اسلام کى دولت سے نوازا ہے"۔
حدیث کى اسنادی حیثیت:
1) اس حدیث کو علامہ ہیثمی رحمہ اللہ (م 807 ھ) نے "مجمع الزوائد" 1/ 276 ، رقم الحدیث (338) کتاب الإیمان/ باب فيمن عمل خيرا ثم اسلم، ط: دار الفکر، میں امام طبرنی اور امام بزار رحمہما اللہ کے حوالے سے نقل کر کے فرمایا ہے: اس حدیث کى سند میں "طفیل بن عمرو التمیمی" ہیں، ان کے متعلق امام بخارى رحمہ اللہ نے فرمایا ہے: ان کى حدیث "صحیح" نہیں ہے اور امام عقیلی رحمہ اللہ نے فرمایا ہے: ان کى حدیث کى متابعت نہیں کى جاتى ہے، یعنى یہ روایت کرنے میں منفرد ہیں۔
2) تاہم امام حاکم رحمہ اللہ (م 405 ھ) نے "مستدرک حاکم" میں اس حدیث کو نقل کرنے کے بعد اس پر سکوت فرمایا ہے، نیز امام ذہبی رحمہ اللہ (م 748 ھ) نے بھی "تلخیص المستدرک" میں اس حدیث پر سکوت فرمایا ہے۔
3) مزید یہ کہ حافظ ابن حجر عسقلانی رحمہ اللہ (م 852 ھ) نے "لسان المیزان" 4/ 353 میں "طفیل بن عمرو التمیمی" کے تذکرے میں فرمایا ہے: طفیل کو امام ابن حبان رحمہ اللہ نے "الثقات" میں نقل فرمایا ہے۔
گویا حافظ ابن حجر عسقلانی رحمہ اللہ کے نزدیک طفیل بن عمرو ضعیف راوى نہیں ہیں۔
خلاصہ:
اس حدیث کے راوی "طفیل بن عمرو" پر محدثین کا کلام ہے، بعض محدثین نے انہیں ضعیف قرار دیا ہے اور بعض محدثین نے انہیں ثقہ قرار دیا ہے، مختلف فیہ ہونے کی وجہ سے یہ حدیث ضعیف ہے، تاہم چونکہ اس حدیث کا ضعف شدید نہیں ہے، اس لیے اس حدیث کو ضعف کی صراحت کے ساتھ بیان کیا جا سکتا ہے۔