سوال: فرعون کے پاس کچھ لوگ آئے اور کہا کہ بارش نہیں ہو رہی ہے اور دریائے نیل بند ہوگیا، قحط سالی آگئی ہے، آپ جاری کر دیجئے۔ فرعون نے کہا کہ دریا کل جاری ہو جائے گا، رات کے وقت اٹھا تاج شاہی پہنا محل سے ننگے پاؤں چل پڑا اور ’’دریائے نیل‘‘ کی طرف دیکھا تو دریا خشک پڑا تھا، تاج زمین پر رکھا اور اللہ تعالیٰ کے سامنے سجدہ ریز ہوکر کہا کہ اے اللہ میں جانتا ہوں کہ آپ ہی مالک ہیں، میں نے ایک دعویٰ کیا اور وہ بھی غلط، میں آپ سے دعا کرتا ہوں کہ دریا جاری فرما۔ فرعون نے روکر گڑگڑا کر عاجزی اور انکساری کے ساتھ دعا مانگی۔ دعا کا مانگنا تھا کہ پانی دریا سے پانی آنا شروع ہوگیا۔ یہ واقعہ کس حد تک درست ہے؟ اس واقعہ کو بیان کرنے والے کہہ رہے تھے کہ یہ واقعہ تفسیر روح المعانی میں موجود ہے؟

جواب: فرعون کے پاس کچھ لوگ آئے اور کہا کہ بارش نہیں ہو رہی ہے اور دریائے نیل بند ہوگیا، قحط سالی آگئی ہے، آپ جاری کر دیجئے۔ فرعون نے کہا کہ دریا کل جاری ہو جائے گا، رات کے وقت اٹھا تاج شاہی پہنا محل سے ننگے پاؤں چل پڑا اور ’’دریائے نیل‘‘ کی طرف دیکھا تو دریا خشک پڑا تھا، تاج زمین پر رکھا اور اللہ تعالیٰ کے سامنے سجدہ ریز ہوکر کہا کہ اے اللہ میں جانتا ہوں کہ آپ ہی مالک ہیں، میں نے ایک دعویٰ کیا اور وہ بھی غلط، میں آپ سے دعا کرتا ہوں کہ دریا جاری فرما۔ فرعون نے روکر گڑگڑا کر عاجزی اور انکساری کے ساتھ دعا مانگی۔ دعا کا مانگنا تھا کہ پانی دریا سے پانی آنا شروع ہوگیا۔ یہ واقعہ کس حد تک درست ہے؟ اس واقعہ کو بیان کرنے والے کہہ رہے تھے کہ یہ واقعہ تفسیر روح المعانی میں موجود ہے؟
فرعون کے آدھی رات کو اللّٰہ تعالیٰ سے قحط سالی ختم ہونے کے لیے دعا کرنے کا واقعہ، اس کی تحقیق
الجواب حامدا و مصلیا۔۔۔
بطور تمہید یہ جاننا چاہیے کہ آیا فرعون کافرِ معاند تھا یا کافرِ دہریہ؟ یعنى فرعون اللہ تعالى کے وجود کا تو قائل تھا، لیکن وہ ضد اور ہٹ دھرمى کى وجہ سے اللہ تعالى کى ربوبیت کا اقرار نہیں کرتا تھا، یا وہ اللہ تعالى کے وجود کا سرے سے قائل ہى نہیں تھا، بلکہ دہریہ تھا؟
مفسرین کرام رحمہم اللہ کے اس بارے میں دو نقطہ نظر ہیں، اکثر مفسرین کرام کى رائے یہ ہے کہ فرعون کافرِ دہریہ تھا۔
سوال میں جو واقعہ مذکور ہے یہ واقعہ آنحضرت صلى اللہ علیہ وسلم سے مرفوعا منقول نہیں ہے، بلکہ یہ واقعہ حضرت عبد اللہ بن عباس رضی اللہ عنہما سے موقوفا مروى ہے، جسے امام ابن أبی حاتم رحمہ اللہ (م 327ھ) نے اپنى تفسیر میں درج ذیل الفاظ کے ساتھ ذکر فرمایا ہے:
ترجمہ:
جب اللہ تعالى نے آل فرعون کى قحط سالى کے عذاب سے پکڑ فرمائى، تو سارے درخت سوکھ گئے اور ان کے مویشى مرنے لگے یہاں تک کہ مصر کا دریائے نیل خشک ہو گیا، تو فرعون کے ماننے والے اس کے پاس اکٹھے ہو کر آئے اور اس سے کہا: اگر تو اپنے متعلق جس طرح (خدائی) کا دعویٰ کرتا ہے، تو پھر نیلِ مصر میں پانی لا کے دکھا، فرعون نے کہا: صبح تمہارے پاس پانی آ جائے گا، جب وہ لوگ فرعون کے پاس سے چلے گئے، تو فرعون نے اپنے آپ سے کہا: یہ میں نے کیا کر دیا، کیا میں نیلِ مصر میں پانی جاری کرنے پر قادر ہوں، صبح کو جب وہ آئیں گے اور پانی نہیں ہو گا، تب تو وہ مجھے جھٹلا دیں گے؟ چنانچہ جب آدھی رات کا وقت ہوا تو فرعون کھڑا ہوا اور اس نے غسل کیا اور اون کی پوشاک پہنی اور چلتا ہوا نیلِ مصر میں آ پہنچا اور دریائے نیل کے درمیان میں کھڑے ہو کر کہا: اے اللہ تجھے معلوم ہے کہ میرا یہ ماننا ہے کہ تو ہی دریائے نیل کو پانی سے بھر سکتا ہے، لہذا تو اس کو پانی سے بھر دے، بس اس کے بعد اسے پانی کی آواز سے پتا چلا کہ پانی آ رہا ہے، چنانچہ وہ چھلانگیں لگاتا ہوا دریائے نیل سے بھاگا اور دریائے نیل پانی سے ٹھاٹھیں مارتا ہوا آیا، جب اللہ تعالٰی نے ان کو اس پانی کے ذریعے ہلاک کرنا چاہا۔
(تفسیر ابن ابی حاتم: حدیث نمبر: 8841)
اس روایت کو حکیم ترمذی رحمہ اللّٰہ (م 285 ھ) نے اپنی کتاب "نوادر الاصول" جلد 3 ص 91 رقم الحدیث (587) میں بھی نقل کیا ہے۔
حدیث کا حکم:
امام ابن جوزی رحمہ اللّٰہ (م 597 ھ) نے اپنی کتاب "زاد المسير في علم التفسير" ص 513، ط: دار ابن حزم، میں اس حدیث کو نقل کرنے کے بعد فرمایا ہے: یہ حدیث "صحت" سے دور ہے (صحیح نہیں ہے) کیونکہ فرعون تو کافرِ دہریہ تھا (وہ تو کسی خدا کو مانتا ہی نہیں تھا)، اور اگر یہ حدیث صحیح مان لی جائے، تب اس کی یہ توجیہ کی جائے گی کہ فرعون کا اللہ تعالیٰ کے وجود کا اقرار شیطان کے اقرار کی طرح تھا، گویا ایسی صورت میں فرعون اللہ تعالیٰ کے وجود کا تو قائل تھا لیکن کفرِ عناد (ضد اور ہٹ دھرمی) کی وجہ سے اللہ تعالیٰ کو نہیں مانتا تھا۔
علامہ آلوسی رحمہ اللّٰہ (م 1270ھ) نے اپنی تفسیر "روح المعانی" جلد 5 ص 31 میں اس حدیث کو نقل کرنے کے بعد فرمایا ہے کہ اگر اس حدیث کو "صحیح" قرار دیا جائے، تو اس سے یہ بات ثابت ہوتی ہے کہ فرعون کافر دہریہ نہیں تھا، جیسا کہ بعض مفسرین کا قول ہے۔
مذکورہ بالا تفصیل سے درج ذیل تین باتیں معلوم ہوتی ہیں:
1) فرعون کے اس واقعے سے متعلق یہ حدیث موقوف (صحابی کا ارشاد) ہے، مرفوع حدیث (آنحضرت صلی اللّٰہ علیہ وسلم کا ارشاد) نہیں ہے، لہذا اس کی نسبت آنحضرت صلی اللّٰہ علیہ وسلم کی طرف کرنا درست نہیں ہے۔
2) اس حدیث کی "صحت" مشکوک ہے، محدثین نے اس کے متعلق حتمی طور صحیح ہونے کا فیصلہ نہیں فرمایا ہے۔
3) اگر اس حدیث کو کسی درجہ میں صحیح مان لیا جائے تب بھی یہ اکثر مفسرین کے موقف کے خلاف بات ہے، کیونکہ اکثر مفسرین رحمہم اللّٰہ تعالیٰ کے نزدیک فرعون کافرِ دہریہ تھا، جبکہ اس حدیث میں فرعون کے بارے میں یہ موقف اختیار کیا گیا ہے کہ وہ اللہ تعالیٰ کے وجود کا قائل تھا، صرف اس نے ضد اور ہٹ دھرمی کی وجہ سے کفر اختیار کر رکھا تھا، لیکن یہ موقف قرآن کریم کی صریح آیات کے خلاف ہے، قرآن کریم میں فرعون نے اپنے خدا ہونے کے دعووں کو صراحت کے ساتھ موجود ہیں، ملاحظہ فرمائیں:
ترجمہ:
"فرعون نے پھر سب کو اکٹھا کیا اور آواز لگائی اور کہا کہ میں تمہارا اعلی درجے کا پروردگار ہوں"۔
(سورۃ النازعات: آیت نمبر: 23-24)
ترجمہ:
"اور فرعون بولا: اے دربار والو! میں تو اپنے سوا تمہارے کسی اور خدا سے واقف نہیں ہوں"۔
(سورۃ القصص: آیت نمبر: 38)
خلاصہ یہ ہے کہ اس واقعے کو عام مجمع میں بیان کرنے سے اجتناب کرنا چاہیے، کیونکہ عوام ان تحقیقات اور ان باریکیوں سے واقف نہیں ہوتے ہیں۔