سوال: رسول اللہ ﷺ نے فرمایا کہ میں عورتوں سے مصافحہ نہیں کرتا۔ (سنن نسائی، حدیث نمبر: 4181) مفتی صاحب! اس حدیث کی تصدیق فرمادیں۔ نیز کن عورتوں سے مصافحہ کر جائز ہے اور کن سے نہیں؟ اس کی بھی وضاحت فرمادیں۔

جواب: سوال میں ذکرکردہ الفاظ عورتوں کی بیعت سے متعلق ایک حدیث کا ٹکڑا ہے، ذیل میں اس روایت کا مکمل ترجمہ اور تشریح ذکر کی جاتی ہے۔
ترجمہ:
حضرت امیمہ بنت رقیقہ رضی اللہ عنہا فرماتی ہیں: میں کئی عورتوں کے ساتھ نبی اکرم ﷺ کی خدمت میں حاضر ہوئی۔ ہم آپ سے بیعت ہونا چاہتی تھیں۔ ہم نے عرض کی: اے ﷲ کے رسول! ہم آپ سے بیعت کرتی ہیں کہ ہم ﷲ تعالیٰ کے ساتھ کسی کو شریک نہیں بنائیں گی، چوری نہیں کریں گی، زنا نہیں کریں گی، اپنی طرف سے جھوٹ گھڑ کر کسی پر بہتان طرازی نہیں کریں گی اور کسی نیک کام میں آپ کی نافرمانی نہیں کریں گی۔ آپ نے فرمایا: ”اپنی طاقت اور وسعت کے مطابق (تم پابند ہوگی)۔“ ہم نے کہا: ﷲ تعالیٰ اور اس کے رسول ﷺ ہم پر اس سے زیادہ مہربان ہیں جتنے ہم اپنے اوپر مہربان ہیں۔ اے ﷲ کے رسول! اجازت دیجیے کہ ہم آپ کے دست مبارک پر بیعت کریں (یعنی ہم سے مصافحہ کیجیے اور جس طرح مردوں کا ہاتھ ہاتھ میں لے کر بیعت کی جاتی ہے ہمیں بھی اسی طرح بیعت کیجیے) رسول ﷲ ﷺ نے فرمایا: ”میں عورتوں سے ہاتھ نہیں ملاتا۔ میرا زبانی طور پر سو عورتوں سے(بیعت کی) بات چیت کرنا ایسے ہی ہے جیسے ہر ہر عورت سے الگ طور پر بات چیت کروں۔“(سنن نسائی،حدیث نمبر:4181)
تشریح:
اس حدیث شریف میں اجنبی عورتوں کی بیعت کا ذکر ہے کہ جب ان عورتوں نے بیعت کرتے وقت آنحضرتﷺ سے مصافحہ کرنے کی درخواست کی تو آپ ﷺ نے فرمایا: ’’میں عورتوں سے مصافحہ نہیں کرتا‘‘۔
حضرت عائشہ رضی اللہ عنہا فرماتی ہیں کہ ﷲ کی قسم! رسول ﷲ ﷺ کا ہاتھ کسی غیرمحرم عورت کے ہاتھ کو نہیں لگا، آپ ان سے صرف زبانی بیعت لیتے تھے۔ (بخاری،حدیث نمبر:5288)
اسی طرح طبرانی میں بروایتِ حضرت معقل بن یسار رضی اللہ عنہ جناب رسول اللہ ﷺ کا فرمان نقل کیا گیا ہے کہ ’’كسی آدمی كے سر کو لوہے كی كنگھی سے زخمی کیا جائے، یہ اس بات سے بہتر ہے كہ وہ ایسی عورت كو چھوئے، جو اس كے لیے حلال نہیں ہے‘‘۔(طبرانی،حدیث نمبر:486)
ان روایات کے پیشِ نظر تمام فقہاءِ کرام کا اس بات پر اتفاق ہے کہ نامحرم عورت سے ہاتھ ملانا جائز نہیں ہے اور نامحرم عورتیں وہ کہلاتی ہیں، جن سے نکاح ہمیشہ کے لیے حرام نہ ہو، بلکہ ان سے نکاح ہوسکتا ہو، جیسے چچا زاد، ماموں زاد، پھوپھی زاد، وغیرہ، اور محرم عورتیں وہ کہلاتی ہیں، جن سے نکاح کرنا ہمیشہ کے لیے حرام ہو، جیسے ماں، بیٹی، بہن، خالہ، پھوپھی، بھتیجی، بھانجی، رضاعی ماں، رضاعی بہن وغیرہ، ان سے نکاح کرنا کبھی بھی جائز نہیں ہے۔
مختصر یہ کہ اس حدیث میں نامحرم خواتین سے مصافحہ نہ کرنے کا ذکر ہے، البتہ جو محرم عورتیں ہیں، ان سے شرعاً مصافحہ کرنے کی اجازت ہے، بشرطیکہ اس میں شہوت یا کسی فتنے کا اندیشہ نہ ہو اور اگر شہوت یا فتنے کا اندیشہ ہو تو محرم عورتوں سے بھی مصافحہ کرنے سے اجتناب کرنا لازم ہے۔