سوال: ایک شخص نے وراثت میں ایک گھر چھوڑا ہے جو اُس کا تھا اور اُس نے کچھ کیش رقم بھی چھوڑی ہے تو اس کی وراثت کی تقسیم کس طرح ہوگی؟ اس کے رشتے دار یہ ہیں:ایک موجودہ بیوی ہے اور اس سے ایک لڑکا بھی ہے جو نابالغ ہے، ماں اور باپ ہیں، دو بھائی اور ایک بہن بھی ہے، نیز ایک طلاق شدہ بیوی (پہلی بیوی) بھی ہے جس سے دو لڑکے ہیں، جو نابالغ ہیں، لہٰذا یہ بتائیں کہ اس شخص کی وراثت کس طرح تقسیم ہوگی؟

جواب: مرحوم کی تجہیز و تکفین کے جائز اور متوسط اخراجات، قرض کی ادائیگی اور اگر کسی غیر وارث کے لیے جائز وصیت کی ہو تو ایک تہائی (1/3) میں وصیت نافذ کرنے کے بعد کل جائیداد منقولہ اور غیر منقولہ کو بہتر (72) حصوں میں تقسیم کیا جائے گا، جس میں سے موجودہ بیوی کو نو (9)، تینوں بیٹوں میں سے ہر ایک کو تیرہ (13)، والد کو بارہ (12) اور والدہ کو بارہ (12) حصے ملیں گے، جبکہ سابقہ مطلقہ بیوی، بہن اور بھائیوں کو مرحوم کی میراث میں سے کچھ نہیں ملے گا۔
اگر فیصد کے اعتبار سے تقسیم کریں تو بیوی کو %12.5 فیصد حصہ، تینوں بیٹوں میں سے ہر ایک کو %18.055 فیصد حصہ، والد کو %16.666 فیصد حصہ اور والدہ کو %16.666 فیصد حصہ ملے گا۔