سوال: کیا مندرجہ ذیل تمام صورتوں میں نماز قضا کرنے کی اجازت ہے کیونکہ بعض مرتبہ ایسا ہو جاتا ہے، نماز پڑھنا مشکل ہوتا ہے، مثلا: بس سے سفر کے دوران کئ بار پورا نماز کا وقت بس میں ہی نکل جاتا ہے اور بس ڈرائیور نماز کیلۓ نہیں روکتا، جس کی وجہ سے نماز قضا کرنی پڑتی ہے۔
ہوائی جہاز کا سفر امریکا سے انڈیا لمبا ہوتا ہے، تقریباً ۱۲ گھنے کا جس کی وجہ سے نماز قضا کرنی پڑتی ہے۔
کبھی کبھار تین گھنٹے کا امتحان ہو جاتا ہے جس میں پورا مغرب کا وقت چلا جاتا ہے جس کی وجہ سے نماز قضا کرنی پڑتی ہے۔
ایک شخص کا ایکسڈنٹ ہو گیا، اس کی جان بچانے کے لیے اس کو فورا ہسپتال لے جانے کی وجہ سے نماز قضا ہوگی۔
تو کیا ان صورتوں میں نماز قضاء کرنے کی اجازت ہے؟

جواب: ۱) واضح رہے کہ فرض نماز کے ادا ہونے کے لیے نماز میں قبلہ رخ ہونا اور قیام کرنا یہ دونوں باتیں شرط ہیں، ان میں سے کسی ایک شرط پر بغیر عذر کے اگر عمل نہ ہو سکے تو فرض نماز ادا نہیں ہو گی۔
لہذا ہوائی جہاز، ٹرین اور بس وغیرہ میں اگر مذکورہ بالا دو شرطوں کی پابندی سے نماز پڑھنا ممکن ہو تو نماز ادا کرنا ضروری ہے اور اگر قبلہ رخ ہو کر یا نماز میں قیام کر کے نماز پڑھنا ممکن نہ ہو تو ایسی صورت میں سیٹ پر بیٹھے بیٹھے اشاروں سے رکوع سجدہ کر کے "تشبہ بالمصلین" (نماز پڑھنے والوں کی مشابہت) کر لے، تاکہ نماز کے وقت کے اندر اس شخص کا شمار نماز پڑھنے والوں میں ہو جائے، مگر چونکہ ایسی صورت میں نماز کے فرائض یعنی قبلہ رخ، قیام، رکوع وسجدہ وغیرہ ادا نہیں ہوں گے، اس لیے سواری سے اُترنے کے بعد فرض نمازکی قضا کرنا ضروری ہوگا۔
نیز سفر کے عذر کی وجہ "جمع بین الصلاتین" صوری بھی کیا جا سکتا ہے، یعنی اگر کسی جگہ اتر کر یا سفر شروع کرنے سے پہلے نماز پڑھنے کا اتنا وقت ہو کہ ایک نماز کو اس کے آخری وقت میں ادا کرے اور دوسری نماز کو اس کا وقت داخل ہوتے ہی ادا کر لے تو اس کی بھی گنجائش ہے۔
تاہم کوشش یہ کرنی چاہیے کہ ایسی سواری کا انتخاب کیا جائے جو نماز کے وقت تک ایسی جگہ پر پہنچ جائے یا دوران سفر مناسب موقع پر نماز کے روکے تاکہ قبلہ رخ کھڑے ہو کر نماز ادا کی جا سکے۔
۲) کسی مریض کی تیمارداری میں مصروف شخص سے بھی نماز ساقط نہیں ہو گی، لہذا اس دوران میں جیسے ہی موقع ملے تو نماز ادا کر لینی چاہیے، لیکن اگر یہ ممکن نہ ہو اور مریض کو جانی نقصان پہنچنے کا غالب گمان ہو تو پھر گنجائش ہے کہ ایک نماز آخری وقت میں ادا کی جائے اور دوسری نماز پہلے وقت میں پڑھی جائے، البتہ اگر یہ بھی ممکن نہ ہو تو نماز مؤخر کی جا سکتی ہے۔ امید ہے کہ انسانی جان بچانے کے عذر کی وجہ سے گناہ نہیں ہوگا۔
۳) امتحان کی وجہ سے بھی نماز قضا کرنے کی اجازت نہیں ہے، لہذا اگر ایسی صورت حال کا سامنا ہو تو امتحان ہال میں وضو کی حالت میں جائے اور امتحانی عملے سے فرائض کی ادائیگی کا وقت لے کر نماز ادا کر لی جائے، لیکن اگر وہاں اجازت نہ مل سکے تو ایسی صورت میں اس کی گنجائش ہے کہ ایک نماز آخری وقت میں ادا کی جائے اور دوسری نماز پہلے وقت میں پڑھی جائے، اس کی صورت یہ اختیار کی جا سکتی ہے کہ امتحان گاہ میں جانے سے پہلے نماز آخری وقت میں ادا کر کے اگلی نماز کو اول وقت میں ادا کر لیا جائے، یا دوسری نماز کو امتحان ن کے بعد تک اگر اس کے آخری وقت تک مؤخر کر کے وقت میں ادا کر لی جائے۔