سوال: مفتی صاحب! اچھی اور بری تقدیر کا کیا مطلب ہے؟

جواب: واضح رہے کہ شريعت كى اصطلاح ميں "تقدیر" نام ہے قضاء وقدر کا، یعنى کائنات کے بارے میں اللہ تعالى نے ازل سے جو فیصلہ فرمایا ہے، اس کا نام "تقدیر" ہے۔
مؤمن ہونے کے لیے تقدیر پر ایمان لانا ضروری ہے اور تقدیر کے اچھے اور برے ہونے پر بھی ایمان لانا ضروری ہے، یعنی اللہ تعالیٰ کی تمام طے کردہ باتوں پر خواہ وہ اچھی ہوں یا بری، میٹھی ہوں یا کڑوی، ایمان لانا ضروری ہے۔
نیز تقدیر الہی کا اچھا یا برا اور میٹھا یا کڑوا ہونا انسانوں کے اعتبار سے ہے، ورنہ اللہ کی منصوبہ بندی کے اعتبار سے ہر چیز اچھی ہے، اللہ تعالیٰ کی طے کردہ باتیں انسانوں کے لیے مفید ہوں یا مضر، میٹھی ہوں یا کڑوی، یعنی انسانوں کو اچھی لگیں یا بری، سب پر ایمان لانا ضروری ہے، جیسے گھی کے بارے میں تجویز الہی یہ ہے کہ وہ صحت بخش ہے اور زہر کے بارے میں یہ طے ہے کہ وہ مہلک ہے، اسی طرح ایمان اور اعمال صالحہ کے بارے میں طے ہے کہ وہ جنت میں لے جانے والے اعمال ہیں اور کفر و معاصی جہنم میں لے جانے والے ہیں، ٹھیک اسی طرح بچے کا زندہ رہنا انسان کو پسند ہے اور مر جانا ناپسند ہے، حالانکہ یہ سب باتیں اللہ تعالی کی طرف سے طے شدہ ہیں اور ان پر ایمان لانا اور عمل پیرا ہونا ضروری ہے۔
مزید یہ کہ کائناتی چیزوں کی حد تک ہر شخص تقدیر الہی کا قائل ہے اور اس کا پابند بھی ہے، لوگ بڑی قیمت دے گھی خریدتے ہیں اور استعمال کرتے ہیں اور زہر کے پاس کوئی نہیں پھٹکتا ہے اور کسی کو اس معاملے میں تقدیر الہی پر اعتراض نہیں ہوتا ہے، مگر جب ایمان و اعمال صالحہ اور کفر و معاصی کا معاملہ آتا ہے تو انسان طرح طرح کی باتیں نکالتا ہے اور جب اس کا بچہ فوت ہو جاتا ہے تو جزع وفزع کی حد کر دیتا ہے، یہ تقدیر پر ایمان نہ ہونے کا نتیجہ ہے۔(مستفاد از رحمۃ اللہ الواسعۃ،: جلد 1 ص 661،ط: زمزم پبلشرز)
خلاصہ یہ ہے کہ لوگ اچھی بری تقدیر کا مطلب نفس الامر کی اعتبار سے اچھا برا ہونا سمجھتے ہیں، حالانکہ اس اعتبار سے تو ہر چیز خیر محض ہے، کارخانہ خداوندی میں کوئی برا نہیں، بلکہ مراد یہ ہے کہ جس تقدیر الہی کا انسان کے ساتھ تعلق ہے، اس کا انسان کے لیے مفید اور غیر مفید ہونا ہے، چنانچہ اس کو کائناتی چیزوں کی حد تک ہر شخص تسلیم کرتا ہے اور مفید باتیں حاصل کرنے کی اور مضر باتوں سے بچنے کی سعی کرتا ہے، بس اعمالِ صالحہ میں بھی یہ بات مان لینی چاہیے اور یہی اچھی بری تقدیر پر ایمان لانے کا مطلب ہے۔
(مستفاد ازتحفۃ الألمعی شرح سنن الترمذی: جلد 5 ص 479، ط: زمزم پبلشرز، باختصار واضافہ)