سوال: مفتی صاحب! صحابی رسول ﷺ کی مندرجہ ذیل بات کی تحقیق اور تشریح فرما دیجئے: "‏اگر تم دوزخ کی حقیقت جان لو تو اتنا چیخو کہ تمہاری آواز بند ہو جائے اور اس قدر نماز پڑھو کہ تمہاری کمر ٹوٹ جائے"۔ (سیدنا عمرو بن العاص رضی اللّٰہ عنہ، کتاب الزھد، لابن المبارک، ص: 1007)

جواب: سوال میں مذکور حدیث "مرفوعا" اور "موقوفا" دونوں طرح سے ثابت ہے، البتہ اس حدیث کا مرفوع طریق "ضعیف" ہے، لیکن اس حدیث کے موقوف طرق "صحیح" ہیں، چونکہ اس حدیث کا مضمون دوسرى صحیح احادیث سے بھى ثابت ہے، ان سے بھى اس حدیث کو تقویت ملتى ہے، جیسا کہ تشریح میں بیان کیا جائے گا، لہذا اس حدیث کو بیان کیا جا سکتا ہے، ذیل میں اس حدیث کى تخریج، حدیث کى اسنادى حیثیت اور اس حدیث کى تشریح نقل کى جاتى ہے:
ترجمہ:
حضرت عبد اللہ بن عمرو بن العاص رضی اللہ عنہما فرماتے ہیں کہ رسول اللہ صلى اللہ علیہ وسلم نے ارشاد فرمایا:"جو باتیں میں جانتا ہوں، اگر تم جان لو تو تم زیادہ روؤ اور تھوڑا ہنسو اور اگر تم میں سے کسى کو(وہ سارے حقائق واحوال) معلوم ہو جائے تو وہ اتنا لمبا سجدہ کرے کہ اس کى کمر ہى ٹوٹ جائے اور (روتے ہوئے) اتنا چیخے اور چلائے کہ اس کى آواز ہى بند ہو جائے، لہذا تم اللہ تعالى کے سامنے رویا کرو، اگر رونا نہ آئے تو رونے جیسے کیفیت بنا لو"۔ (الزهد لهناد بن السري: حديث نمبر:469)
تخریج الحدیث:
1) یہ حدیث امام ہناد بن السری رحمہ اللہ(م 243 ھ) نے اپنی "کتاب الزھد" جلد 1 ص 270 رقم الحدیث (469)، ط: دار الخلفاء للکتاب الإسلامی- بیروت) میں "حجاج بن ارطاۃرحمہ اللہ" کے طریق سے "مرفوعا" نقل فرمائى ہے۔
2) امام عبد اللہ بن المبارک رحمہ اللہ (م 181ھ) نے اپنى کتاب "الزھد والرقاق" ص 356 رقم الحدیث (1007)، ط: دار الکتب العلمیۃ، میں "عثمان بن الأسود رحمہ اللہ "کے طریق سے "موقوفا" نقل فرمائى ہے۔
3)حافظ ابو نعیم الأصبہانی رحمہ اللہ (م 430 ھ) نے اپنى کتاب "حلیۃالأولیاء" جلد 1 ص 289 ، ط: دار الفکر) میں "عبد الجبار بن الورد رحمہ اللہ" کے طریق سے "موقوفا" نقل فرمائى ہے۔
4) امام حاکم رحمہ اللہ (م 405) نے اپنى کتاب "المستدرک" جلد 4 ص 622 رقم الحدیث (8723)، ط: دار الکتب العلمیۃ، میں "عثمان بن الأسود رحمہ اللہ" کے طریق سے "موقوفا" نقل فرمائی ہے۔
حدیث کى اسنادى حیثیت:
یہ حدیث "مرفوع" اور "موقوف" دونوں طرح سے مروى ہے، البتہ اس حدیث کے "موقوف" طرق صحیح ہیں، جبکہ اس حدیث کا مرفوع طریق "ضعیف" ہے، کیونکہ اس میں ایک راوی ہیں: "حجاج بن ارطاۃ رحمہ اللّٰہ"، محدثین نے تدلیس کى وجہ سے ان کو ضعیف قرار دیا ہے، حافظ ابن عدى رحمہ اللہ (م 365 ھ) نے اپنى کتاب "الكامل" 3/ 288 (4350) میں حجاج بن أرطأة کے تذکرے میں فرمایا ہے: لوگوں (محدثین) نے ان کى امام زہرى اور دیگر محدثین سے روایت میں "تدلیس" کى بنا پر جرح کى ہے، نیز وہ بعض روایات میں غلطى بھى کرتے ہیں، لیکن وہ جان بوجھ کر جھوٹ نہیں بولتے ہیں اور یہ ان راویوں میں سے ہیں، جن کى روایات کو نقل کیا جاتا ہے۔
تشریح:
ہنسى اور دل لگى کرنا آخرت کو بھولنے کى علامت ہے، اگر انسان آخرت کے احوال سے واقف ہوجائے تو اس کى ہنسى ختم ہو جائے، چنانچہ صحیح بخارى کى ایک حدیث میں یہى مضمون حضرت ابو ہریرہ رضی اللہ عنہ سے مروى ہے، انہوں نے فرمایا: ابو القاسم (آنحضرت صلى اللہ علیہ وسلم کى کنیت ہے) نے ارشاد فرمایا: "قسم ہے اس ذات کى جس کے قبضہ میں میرى جان ہے، جو (حقائق) مجھے معلوم ہیں،اگر تمہیں معلوم ہو جائیں تو تم زیادہ روؤ اور تھوڑا ہنسو"۔ (صحیح بخارى: حدیث نمبر: 6485)
یعنى اگر اللہ کى شان بے نیازى، اس کے قہر و جلال اور آخرت کے ہولناک مناظر جو اللہ تعالى نے نبى ﷺ پر منکشف کیے ہیں، اگر وہ سارى باتیں لوگوں پر منکشف ہو جائیں تو لوگوں کا چین ختم ہو جائے وہ بہت کم ہنسیں اور زیادہ تر روتے رہیں، کیونکہ اللہ تعالى نے انسانوں کو خلافتِ ارضى سے سرفراز فرمایا ہے، پس وہ اپنے فریضہ سے اسى وقت سبکدوش ہو سکتے ہیں جب وہ اس دنیا میں چین سے رہیں، اس لیے عالمِ آخرت کى چیزیں عام انسانوں سے پردہ غیب میں رکھى گئى ہیں، جیسے قبر کا اور دوزخ کا عذاب اور قیامت کے لرزہ خیز مناظر، اگر یہ چیزیں انسانوں پر منکشف کر دى جائیں تو وہ اس دنیا میں کوئى بھى کام نہ کر سکیں، بلکہ زیادہ دنوں تک پنپ بھى نہ سکیں، مگر نبى ﷺ پر تبلیغی مقاصد کے لیے یہ چیزیں منکشف کى گئیں، بلکہ معراج میں ایک درجہ میں ان حقائق کا مشاہدہ بھى کرایا گیا، تاکہ وہ امت کو ان حقائق سے آگاہ کریں، اب امت کا فرض ہے کہ وہ پیغمبر کے اعتماد و اعتبار پر ان سب باتوں کو مانیں اور ان کو اپنى دنیوى زندگى کى بنیاد بنائیں، یعنى آنے والى آخرت کى زندگى کو پیشِ نظر رکھ کر دنیا کو سنواریں، اللہ تعالى بندوں کى عبادت کے محتاج نہیں، اللہ کى عبادت کے لیے فرشتے بہت ہیں، فرشتوں کى کثرت سے آسمان چرچرا رہا ہے اور چار انگشت جگہ بھى ایسى نہیں جہاں کوئى فرشتہ سر بسجود نہ ہو، پھر ان کو مٹھى بھر انسانوں کى بندگى کى کیا ضرورت ہے؟ بلکہ بندوں کو خود اپنى بھلائى کے لیے بندگى کى ضرورت ہے۔
(ماخوذ از تحفۃ الألمعی شرح سنن ترمذى بتصرف یسیر: جلد 6 ص 102، طبع: زمزم پبلشرز)