سوال: ہماری کمپنی ہے، ہم بچوں کے آرٹس کا سامان بناتے ہیں، ہم نے ڈالمن سٹی میں ایک ایونٹ کرانا ہے، جس میں جگہ ہم دیں گے اور ایک محترمہ جو آرٹس سکھاتی ہیں، وہ آئیں گی اور بچوں کے منہ پر پینٹ کریں گی۔ ہم ان کو اس کے عوض کوئی رقم نہیں دیں گے، بلکہ صرف جگہ اور پینٹ بلا معاوضہ فراہم کریں گے۔ وہ بچوں سے معاوضہ لیں گی اور ہم ان سے بدلہ میں کوئی رقم نہیں لیں گے۔ کیا ہمارا یہ عمل مناسب ہے، اور کیا ان محترمہ کی تشہیر کے لیے لوگوں کو بتایا جا سکتا ہے؟

جواب: واضح رہے کہ بچوں کے چہرے پر کسی جاندار کی تصویر بنانا ناجائز اور حرام ہے، اس کی شرعاً اجازت نہیں ہے، البتہ بچوں کے چہرے پر جاندار کی تصویر کے علاوہ کسی اور چیز کی غیر مستقل مٹنے والی (removable) پینٹنگ کرنے کی گنجائش ہے، بشرطیکہ بچے چھوٹے ہوں اور ان پر وضو واجب نہ ہو، کیوںکہ بہت سے پینٹ وضو کے پانی کو جلد تک پہنچنے سے مانع ہوتے ہیں۔
لہذا پوچھی گئی صورت میں مذکورہ خاتون کو کام دینا جائز ہے۔