سوال: مفتی صاحب! اس روایت کی وضاحت فرمادیں: رسول اللہ ﷺ نے فرمایا: اللہ کی معصیت پر مبنی کوئی نذر جائز نہیں ہے اور اس کا کفارہ وہی ہے جو قسم کا کفارہ ہے۔ (جامع ترمذی، حدیث نمبر: 1525)

جواب: سوال میں ذکرکردہ حدیث کو امام ترمذی نے ’’سنن ترمذی‘‘ میں نقل کیا ہے،ذیل میں اس حدیث کا ترجمہ اور تشریح ذکر کی جاتی ہے۔
ترجمہ:
حضرت عائشہ رضی اللہ عنہا سے مروی ہے کہ جناب رسول اللہ ﷺ نے ارشاد فرمایا: کسی بھی گناہ کی نذر نہیں ہے اور اس کا کفارہ قسم کا کفارہ ہے۔
(سنن ترمذی،حدیث نمبر:1525)
تشریح:
ذکرکردہ حدیث کا مطلب یہ ہے کہ کسی شخص نے گناہ کی نذر مانی مثلاً یہ کہا کہ اگر میرا یہ کام ہوگیا تو شراب پیوؤں گا یا فلاں کو قتل کروں گا تو یہ نذر منعقد ہوجائے گی، مگر اس کا پورا کرنا حرام ہے اور نذر کے منعقد ہونے کی وجہ سے اس کا کفارہ لازم ہوگا، جیسا کہ ایک اور حدیث سے اس کی وضاحت ہوجاتی ہے۔
حضرت عمران بن حصین رضی اللہ عنہ سے مروی ہے کہ جناب رسول اللہ ﷺ نے ارشاد فرمایا: نذر دو قسم پر ہے: ایک اللہ کی اطاعت کی نذر، تمہارے لیے اس کا پورا کرنا ہے، اور دوسری گناہ کی نذر، یہ شیطان کے لیے ہے اور اس کا پورا کرنا جائز نہیں ہے، اور اس کا گناہ وہ چیز مٹاتی ہے جو قسم کے گناہ کو مٹاتی ہے، یعنی اس کا کفارہ قسم کا کفارہ ہے۔