سوال: اس روایت کی تصدیق اور تشریح فرمادیں: رسول اللہ ﷺ کا ارشاد ہے : فجر خوب اجالا کرکے پڑھو، کیونکہ اس میں زیادہ ثواب ہے۔ (جامع ترمذی، حدیث نمبر: 154)

جواب: سوال میں ذکر کردہ روایت سنن الترمذی میں ہے، ذیل میں اس روایت کا ترجمہ اور تشریح ذکر کی جاتی ہے:
ترجمہ:
حضرت رافع ابن خدیج رضی اللہ تعالیٰ عنہ سے روایت ہے کہ میں نے جناب رسول اللہ صلی اللہ علیہ وسلم کو یہ فرماتے ہوئے سنا کہ" فجر کی نماز اجالے میں پڑھو کیونکہ اجالے میں نماز پڑھنے سے بہت زیادہ ثواب ہوتا ہے"۔(سنن ترمذی، حدیث نمبر:154)
تشریح:
اس حدیث کی روشنی میں علمائے احناف رحمہم اللہ فرماتے ہیں کہ فجر کی نماز اجالے میں پڑھنا مستحب ہے اور اجالے میں نمازِ فجر پڑھنے کی حد یہ ہے کہ طلوع آفتاب میں اتنا وقت باقی ہو کہ اس میں قرأت مسنون (جو چالیس سے ساٹھ یا سو آیتوں تک ہے) ترتیل کے ساتھ پڑھی جا سکے اور نماز کے بعد اگر کسی وجہ سے نماز فاسد ہوجائے تو فجر کی نماز کا وقت ختم ہونے (سورج طلوع ہونے) سے پہلے طہارت حاصل کر کے سنت کے مطابق قرأت کرکے دوبارہ ادا کی جاسکے۔