سوال: دین میں ریاضت اور مجاہدہ اختیار کرنے کا کیا مفہوم اور مطلب ہے؟

جواب: عربی زبان میں لفظ "مجاہدہ" کے معنی ہیں: محنت کرنا، کوشش کرنا۔
صوفیاء کرام کی اصطلاح میں نفس کے تقاضوں کی مخالفت کرنا، یعنی جس کام کو انسان کا نفس چاہ رہا ہو اور دل میں خواہش ابھر رہی ہو کہ یہ کام کروں، نفس کی اس خواہش کو کچل کر اور اس کے چاہنے کو چھوڑ کر نفس کو اس کام سے باز رکھنا، گویا خواہشات ِنفس کی مخالفت ہی کو صوفیاء کرام "مجاہدہ" کہتے ہیں۔
ریاضت کے معنی اصل لغت میں سدھانے کے ہیں، کیونکہ یہ ’’روض الدابة‘‘ سے ماخوذ ہے، جس کے معنی ہیں ’’گھوڑے وغیرہ کو سدھانا ‘‘۔
اصطلاح میں ریاضت کے معنی ہیں: ’’تحصیل اخلاقِ حمیدہ وازالۂ اخلاق ذمیمہ‘‘ (اچھے اخلاق کو حاصل کرنا اور برے اخلاق کو ختم کرنا)
خلاصہ یہ ہے کہ اگر نفس کسی گناہ کا تقاضا کررہا ہے تو اس کو روکنا اور اس کی مخالفت کرنا ’’مجاہدہ ‘‘ کہلاتا ہے اور اس گناہ کے تقاضے کا جو منشا اور سبب ہے، اس کو کمزور کرنا ’’ریاضت ‘‘کہلاتا ہے۔