سوال: مفتی صاحب! ایک مسئلے کے بارے میں رہنمائی فرما دیں ہمارا علاقے بلوچستان میں ایک شخص کو کچھ لوگوں نے فورس کر کے یہ کہا کہ تم اپنی گھر والی کو طلاق دے دو ورنہ تمہارے ساتھ برا ہو جائے گا۔ برا ہونے سے ان کی مراد یہ تھی کہ تمہاری پٹائی ہو گی، مطلب یہ کہ وہ اس کو ڈرا رہے تھے، تو اس شخص نے جب ان کے اس ارادے کو دیکھا تو اس نے مطالبہ کیا کہ مجھے دس گرام سونا دے دو تو میں طلاق دے دیتا ہوں تو انہوں نے کہا ٹھیک ہے ہم آپ کو دس گرام سنا دے دیں گے اور آپ طلاق دے دو، اس کے بعد انہوں نے اس شخص کو سونا دیا اور اس نے ان کے سامنے اپنی بیوی کو کہا: ایک دو تین تو میری ماں بہن ہو گئی، اب جب بعد اس شخص نے سونے کا وزن کروا دو وہ پورا دس گرام نہیں تھا، بلکہ آٹھ گرام تھا۔ اب پوچھنا یہ ہے کہ کیا اس صورت میں بھی طلاق ہو گئی یا نہیں ہوئی کیونکہ سونا تو پورا نہیں ملا ہے؟ اللہ تعالیٰ آپ کو بہت جزائے خیر عطا فرمائے آمین

جواب: واضح رہے کہ مذاکرہ طلاق کے وقت بیوی کی طرف نسبت کرکے مذکورہ اعداد "ایک، دو، تین" کہنے سے طلاق واقع ہوجاتی ہے، لہٰذا پوچھی گئی صورت میں چونکہ مذکورہ شخص نے طلاق کے مطالبے پر اپنی بيوی سے کہا: "ایک، دو، تین تو میری ماں بہن ہو گئی" لہٰذا یہ الفاظ کہنے سے اس کی بیوی پر تین طلاقیں واقع ہوکر حرمتِ مغلظہ ثابت ہوگئی ہے اور اب دونوں کا ایک ساتھ رہنا جائز نہیں ہے۔
جہاں سونے کا تعلق ہے تو چونکہ مذکورہ لوگوں نے دس گرام سونے کے عوض طلاق حاصل کی ہے، اس لیے ان پر لازم ہے کہ اس شخص کو دس گرام سونا پورا کرکے دیں، تاہم سونے کی مطلوبہ مقدار پوری نہ ہونے کی وجہ سے طلاق پر کوئی اثر نہیں پڑے گا۔