سوال: حضرت! عرض یہ ہے کہ ہمارے ایک ساتھی بیرون ملک میں مختلف کاموں کے ٹھیکے لیتے ہیں، جو لوگ ان کے کام کرتے ہیں، ان کو اگر مزدوری خود کمپنی سے لے کر دیں تو گورنمنٹ ٹیکس وصول کرتی ہے اور اگر کام کرنے والوں کو مزدوری اس کمپنی سے دوسرے کمپنی منتقل کرواکر دی جائے تو دوسری کمپنی ہر مزدور کے مزدوری دینے پر ٹھیکیدار کو دس روپے بھی دیتی ہے اور ٹیکس بھی نہیں کٹتا تو کیا ٹھیکیدار کا مزدوری دلوانے کے لیے رقم دوسری کمپنی کو منتقل کرنا اور ہر مزدور کی مزدوری کے ساتھ دس روپے وصول کرنا درست ہوگا، جبکہ مزدور کی مزدوری میں کوئی کمی نہیں کی جاتی اور دوسری کمپنی کو فائدہ یہ ہوتا ہے کہ ان کی کمپنی فعال اور معیار میں ترقی کرتی ہے؟ برائے مہربانی آگاہ کیجئے۔

جواب: پوچھی گئی صورت میں ٹھیکہ دار کا اپنے مزدوروں کی تنخواہ دوسری کمپنی منتقل کرکے وہاں سے ان کو تنخواہ میں درج ذیل تین غیر شرعی خرابیاں ممکن ہیں:
1) بظاہر دوسری کمپنی اس ٹھیکہ دار کو حکومتی کھاتوں میں اپنا ٹھیکہ دار ظاہر کرتی ہوگی، جس کی وجہ سے اسے ٹیکس نہیں پڑتا، یہ صورت غلط بیانی اور دھوکہ دہی پر مشتمل ہونے کی وجہ سے جائز نہیں ہے۔
2) ٹیکس بچانے کی خاطر ایسا کرنا اگر حکومتی جائز قانون خلاف ورزی ہو تو ایسی صورت میں جائز ملکی قوانین کی خلاف ورزی کا گناہ بھی ہوگا‍۔
3) دوسری کمپنی میں تنخواہ منتقل کرکے مزدوروں کو دینے کی وجہ سے اس کمپنی کی طرف سے ٹھیکہ دار کو ملنے والے فی مزدور دس روپے کسی جائز منفعت کے عوض نہیں مل رہے، جوکہ بظاہر رشوت کی صورت ہے۔
لہذا اگر مذکورہ بالا خرابیاں پائی جائیں، تو یہ طریقہ کار شرعا درست نہیں ہوگا، اس سے اجتناب لازم ہے۔تاہم اگر آپ کی پوچھی گئی صورت میں مذکورہ خرابیاں نہ ہوں، تو اس کی وضاحت لکھ کر دوبارہ پوچھ سکتے ہیں۔