سوال: سنا ہے کہ حرام کو حلال سمجھ کر کرنا بھی شرک ہے تو آج کل بہت سے ایسے غلط کام ہو رہے ہیں جسے برا نہ سمجھ کر کھلے عام کیا جاتا ہے، جبکہ کبھی کبھی تو فخر سے کیا جاتا ہے، مثلاً: غیبت کرنے کو برا سمجھا ہی نہیں جاتا یا لڑکے لڑکیاں اپنے آپس کے relationship کو برا نہیں سمجھتے اور بھی ایسے بہت سی برائیاں ہیں جسے غلط نہیں سمجھا جاتا تو کیا یہ سب بھی شرک میں داخل ہوگا؟ اور ایک شخص بالکل اپنی آخرت سے غافل ہو کر گناہ کرتا جاتا ہے تو کیا یہ مانا جائے گا کہ اسے آخرت کا یقین نہیں اور کیا وہ مشرک کہلائے گا؟

جواب: واضح رہے کہ کسی پر کفر کا حکم لگانا ایک انتہائی سنگین اور حساس معاملہ ہے، جس میں حد درجہ احتیاط کرنا ‏لازم ہے، چنانچہ علماء کرام نے لکھا ہے کہ اگر کہیں ننانوے اسباب اور وجوہات کفر کی ہوں اور ایک وجہ ایمان کی ہو تو ‏اس ایک وجہ کو اختیار کرکے کفر کا حکم لگانے سے احتراز کیا جائے گا۔
‏ یہ بھی واضح رہے کہ صرف وہ گناہ موجبِ کفر ہے، جس کی حرمت قطعی اور یقینی دلیل سے ثابت ہو اور ‏اس کے حلال ہونے کا عقیدہ رکھتے ہوئے اس کا ارتکاب کیا جائے، لہٰذا جہاں یہ دونوں شرطیں نہ ہوں یا ان میں سے کوئی ‏ایک نہ ہو یعنی اس گناہ کی حرمت دلیل قطعی سے ثابت نہ ہو یا اس کی حرمت دلیل قطعی سے ثابت تو ہو، لیکن کرنے والا ‏اس کے حلال ہونے کا عقیدہ نہ رکھتا ہو تو ایسے گناہ کے ارتکاب پر کفر کا حکم نہیں لگایا جائے گا۔
پوچھی گئی صورت میں جن گناہوں کی حرمت دلیل قطعی سے ثابت ہے، جیسے: غیبت یا لڑکے اور لڑکیوں کے آپس کے ناجائز تعلقات وغیرہ، تو جب تک ان ‏کے ارتکاب کرنے والے افراد کے عقائد کے بارے میں حتمی اور یقینی طور پر معلوم نہ ہو، اس وقت تک ان کی ‏طرف کفر کی نسبت کرنا ہرگز جائز نہیں ہے۔