سوال: مفتی صاحب! مجھے معلوم کرنا ہے کہ تبلیغی حضرات اکثر کہتے ہیں کہ تبلیغ فرض ہے۔ کیا اُن کی یہ بات صحیح ہے؟

جواب: واضح رہے کہ تبلیغ دین یعنی دین کی دعوت دوسرے لوگوں تک پہنچانا فرض کفایہ ہے، اگر امت کے کچھ افراد اس فریضہ کی ادائیگی کرتے رہیں تو باقی تمام لوگوں سے یہ فرض ساقط ہوجائے گا، لیکن اگر ساری امت دین کی دعوت اور تبلیغ کرنا چھوڑ دے تو ساری امت گناہ گار ہوگی، تاہم اس فریضہ کی ادائیگی کے سلسلے میں مختلف زمانہ اور حالات کے مطابق کوئی بھی جائز طریقہ اختیار کیا جاسکتا ہے۔
جہاں تک مروجہ طریقہ کے مطابق معروف تبلیغی جماعت کے ساتھ منسلک ہو کر خاص ترتیب (شب جمعہ، سہ روزہ، چلہ اور سال وغیرہ لگانا) کے مطابق کام کرنے کا تعلق ہے تو اس کا حکم یہ ہے کہ اس ترتیب کے مطابق دعوت و تبلیغ کا کام کرنا نہ فرض ہے، نہ واجب نہ سنت، البتہ چونکہ مروجہ طریقہ کار ( سہ روزہ، چلہ یا سال وغیرہ لگانے) کا مقصد لوگوں کو دین سکھانا، رفتہ رفتہ دین سے ان کا تعلق پیدا کرنا اور مزید تعلق بڑھانا، انہیں دین پر چلنے کا عادی بنانا اور دوسروں تک دین کی دعوت پہنچانے کا اسلوب سکھانا ہے، اور تحربہ اور مشاہدہ یہ ہے کہ یہ طریقہ کار اس مقصد کے حصول کیلئے بہت مفید ہے، لہذا معروف طریقے کے مطابق دعوت و تبلیغ کرنا بلاشبہ جائز اور درست ہے، البتہ اس ترتیب کو فرض و واجب یا سنت قرار دینا درست نہیں ہے، نیز اس مخصوص ترتیب کے علاوہ کسی اور طریقے سے دین کی دعوت و تبلیغ کا کام کرنے والوں کو ملامت اور طعن و تشنیع کا نشانہ بنانا بھی شرعا درست نہیں ہے۔