سوال: فوت شدہ نمازوں کا فدیہ کیا ہے؟ کیا زندگی میں فوت شدہ نمازوں کا فدیہ دے سکتے ہیں؟

جواب: واضح رہے کہ زندگی میں اپنی فوت شدہ نمازوں کی قضاء کرنا ضروری ہے، لہذا زندگی میں فوت شدہ نمازوں کی طرف سے فدیہ ادا کرنا کافی نہیں ہوگا۔
اگر کوئی شخص اپنی زندگی میں فوت شدہ نمازوں کی قضاء نہ کر سکے اور وفات سے پہلے نمازوں کا فدیہ ادا کرنے کی وصیت کر جائے، تو اس کے ترکہ میں سے ایک تہائی مال تک اس کی وصیت کو پورا کرتے ہوئے فدیہ ادا کرنا واجب ہے ۔ اور اگر مرحوم نے وصیت نہ کی ہو، تو ورثاء کے ذمے لازم نہیں، تاہم اگر کوئی ایک وارث یا سب ورثاء اپنی خوشی و رضا سے مرحوم کی فوت شدہ نمازوں کا فدیہ ادا کر دیں، تو ان کے لیے باعث ثواب ہے، اور امید ہے کہ اللہ تعالیٰ اس فدیے کو قبول فرما کر مرحوم کے ساتھ آسانی کا معاملہ فرمائیں گے۔
ایک نماز کا فدیہ ایک صدقہ فطر یعنی تقریبا پونے دو کلو گندم یا اس کے بقدر قیمت ہے۔ نیز واضح ہو کہ نمازوں میں وتر کی نماز کو بھی شامل کیا جائے گا، اس اعتبار سے ایک دن کی چھ نمازوں کا فدیہ کسی مستحق زکوٰة کو دینے سے ادا ہو جائے گا۔