سوال: میں جاننا چاھتا ہوں کہ صحابہ کرام سنت اور نفل نماز پڑھتے تھے یا نہیں؟ مہربانی کر کے راہنمائی کریں۔

جواب: صحابہ کرام ؓ سے پنج وقتہ فرض نمازوں کے علاوہ سنن مؤکدہ کا اہتمام اور حسب استطاعت نوافل پڑھنا مختلف روایات میں منقول ہے۔ چنانچہ ذیل میں پہلے سنن مؤکدہ کے حوالے سے چند روایات ذکر کی جاتی ہیں:
۱) حضرت ابراہیم نخعی رحمہ اللہ فرماتے ہیں کہ صحابہ کرام ؓ ظہر سے پہلے چار رکعت اور ظہر کے بعد دو رکعت پڑھنا سنت سمجھتے تھے، اور عصر سے پہلے دو رکعت پڑھتے تھے، مگر اسے سنت نہیں سمجھتے تھے (کیونکہ وہ نفل نماز ہے)۔ اسی طرح مغرب اور عشاء کے بعد دو اور فجر سے پہلے دو رکعت پڑھتے تھے۔ (مصنف عبد الرزاق، حدیث نمبر: 4830)
۲) حضرت ابو عبیدہ کہتے ہیں کہ حضرت عبد اللہ ؓ کی (فرض کے علاوہ) نفل نماز ان رکعات سے کم نہ ہوتی : چار رکعت ظہر سے پہلے اور دو رکعت ظہر کے بعد، دو رکعت مغرب کے بعد، دو رکعت عشاء کے بعد اور دو رکعت فجر کی نماز سے پہلے۔ (مصنف عبد الرزاق، حدیث نمبر: 4815)
۳) حضرت ابراہیم نخعی رحمہ اللہ فرماتے ہیں کہ رسول اللہ ﷺ کے صحابہ سب سے زیادہ اہتمام ظہر سے پہلے چار رکعت اور فجر سے پہلے دو رکعت کا فرمایا کرتے تھے۔ (مصنف عبد الرزاق، حدیث نمبر: 4829)
۴) حضرت عبد اللہ بن عمر ؓ کہتے ہیں کہ میں نے رسول اللہ ﷺ کے ساتھ (یعنی ان کی حیات مبارکہ میں) ظہر سے پہلے دو رکعت، ظہر کے بعد دو رکعت، مغرب اور عشاء کے بعد دو رکعت اور جمعہ کی نماز کے بعد دو رکعت پڑھی ہیں۔ (مصنف عبد الرزاق، حدیث نمبر: 4809)
۵) حضرت حسان بن عطیہ سے منقول ہے کہ جب حضرت عنبسہ بن ابوسفیان کی وفات قریب ہوئی تو وہ تڑپنے لگے، ان سے کہا گیا (یعنی ان کو تسکین دی گئی) تو انھوں نے فرمایا: میں نے نبی کریم ﷺ کی زوجہ محترمہ حضرت ام حبیبہ‬ؓ کو نبی کریم ﷺ سے یہ بیان فرماتے ہوئے سنا ہے: "جو شخص ظہر سے پہلے چار رکعات اور ظہر کے بعد چار رکعات (یعنی دو رکعت سنت مؤکدہ اور اس کے بعد دو رکعت نفل) پڑھے، اللہ تعالی اس کا گوشت آگ پر حرام کر دے گا۔" جب سے میں نے یہ روایت سنی ہے، میں نے یہ رکعات نہیں چھوڑیں۔ (سنن نسائی، حدیث نمبر: 1812)
اسی طرح ذخیرہ احادیث میں صحابہ کرام ؓ کے نوافل پڑھنے سے متعلق بھی بہت سی روایات ملتی ہیں، جن میں سے چند روایات ذیل میں ذکر کی جاتی ہیں:
۱) حضرت ابو قتادہ ؓ کہتے ہیں کہ نبی اکرم ﷺ نے (حضرت) ابو بکرؓ سے فرمایا: "میں کل (تہجد کے وقت) تمہارے پاس سے گزرا، تم قرآن پڑھ رہے تھے، مگر تمہاری آواز کچھ دھیمی تھی؟" تو انہوں نے کہا: میں تو صرف اس ذات کو سنا رہا تھا، جس سے میں مناجات کر رہا تھا (یعنی اللہ تعالی کو) تو آپ ﷺ نے فرمایا: "اپنی آواز کچھ بلند کر لیا کرو" اور (حضرت) عمر ؓ سے فرمایا: "میں کل (تہجد کے وقت) تمہارے پاس سے گزرا، تم قرآن پڑھ رہے تھے اور تمہاری آواز بہت اونچی تھی؟ ‘‘تو انہوں نے کہا: میں سوتوں کو جگا رہا تھا اور شیطان کو بھگا رہا تھا، تو آپ ﷺ نے فرمایا: " تم اپنی آواز تھوڑی دھیمی کرلیا کرو"۔ (سنن ترمذی، حدیث نمبر: 447)
۲) حضرت کعب بن عجرہؓ سے روایت ہے کہ نبی کریم ﷺ قبیلہ بنی عبد الاشہل کی مسجد میں تشریف لائے اور وہاں مغرب کی نماز پڑھی۔ نماز کے بعد آپ ﷺ نے ان کو دیکھا کہ وہ مغرب کی نماز کے بعد نفل پڑھ رہے ہیں تو آپ ﷺ نے فرمایا: "یہ گھروں کی نماز ہے (یعنی نوافل گھر میں پڑھنا بہتر ہے)"۔ (سنن ابو داود، حدیث نمبر: 1300)
۳) حضرت ابن عباس ؓ کہتے ہیں کہ جب سورہ مزمل کا ابتدائی حصہ «قُمِ اللَّيْلَ إِلَّا قَلِيلًا» نازل ہوا تو صحابہ کرامؓ ایسے قیام کرتے تھے جیسے کہ رمضان میں قیام کرتے ہیں حتی کہ اس سورت کا آخری حصہ نازل ہوا اور ان دونوں حصوں کے نزول میں ایک سال کا فرق تھا۔ (سنن ابو داود، حدیث نمبر: 1305)
۴) حضرت زید بن ثابت ؓ سے روایت ہے کہ نبی کریم ﷺ نے مسجد میں کھجور کی چٹائی کو کھڑا کرکے حجرہ سا بنا لیا (تاکہ سکون سے رات کی نماز پڑھ سکیں) اللہ کے رسول ﷺ نے کئی راتیں اس میں نماز پڑھی حتیٰ کہ لوگ بھی آپ ﷺ کے قریب جمع ہونے لگ گئے (اور آپ کی نماز کے ساتھ نماز پڑھنے لگے) پھر ایک رات انہوں نے آپ ﷺ کی آواز محسوس نہ کی۔ انہوں نے سمجھا کہ شاید آپ ﷺ سوئے ہوئے ہیں۔ ان میں سے کچھ کھنکارنے لگے، تاکہ آپ ﷺ (جاگ کر) ان کی طرف تشریف لے آئیں۔ (مگر آپ ﷺ نہ نکلے، پھر صبح کے وقت) آپ ﷺ نے فرمایا: جو کچھ تم کرتے رہے ہو، میں دیکھتا رہا ہوں (مگر میں اس لیے نہیں نکلا کہ) مجھے خطرہ پیدا ہوا کہ کہیں تم پر رات کی نماز فرض ہی نہ کردی جائے اور اگر تم پر فرض کردی جاتی تو تم اسے ادا نہ کر پاتے، لہذا اے لوگو! رات کی نماز اپنے گھروں میں پڑھ لیا کرو، کیونکہ فرض نماز کے علاوہ انسان کی افضل نماز وہ ہے جو گھر میں پڑھے۔" (سنن نسائی، حدیث نمبر: 1599)