سوال: شیخ یوسف کا انتقال ہوا۔ ان کی پراپرٹی تقریباً دس کروڑ کی ہے اور ان کے اوپر چار کروڑ قرضہ ہے۔
ورثاء میں دو بیویاں ہیں، جن میں سے ایک پاکستانی بیوی ہے اور اس سے ایک بیٹی ہے، اور دوسری جاپانی بیوی ہے اور اس سے ایک بیٹا ہے۔ جاپانی بیوی کو پیپرز میں کافی عرصے پہلے طلاق دے چکے تھے جو حقیقت میں ہوجاتی ہے اور اس کی عدت بھی ختم ہوگئی ہے۔ اس کے علاوہ چار بھائی اور پانچ بہنیں بھی حیات ہیں۔
اس ضمن میں کچھ سوالات معلوم کرنے ہیں:
۱) کیا جس بیوی کو طلاق دے چکے تھے، اس بیوی کو بھی ان کی میراث میں سے حصہ ملے گا؟
۲) کیا میراث کی تقسیم سے پہلے قرض ادا کیا جائے؟ اور دس کروڑ میں سے وصیت کتنے مال میں لاگو ہوگی؟
۳) ان کی وراثت میں سے کس کس کو حصہ ملے گا؟

جواب: ۱) مرحوم نے جس بیوی کو طلاق دی تھی اور اس بیوی کی عدت بھی گزر گئی تو اس سابقہ بیوی کو مرحوم کی میراث میں کچھ حصہ نہیں ملے گا۔
۲) جی ہاں! مرحوم کی تجہیز و تکفین کے بعد سب سے پہلے مرحوم کا قرضہ (چار کروڑ) ادا کیا جائے گا، پھر اگر کسی غیر وارث کے لیے کوئی وصیت کی ہو تو ایک تہائی (1/3) میں وصیت نافذ کی جائے گی، اس کے بعد باقی ماندہ ترکہ شرعی ورثاء میں تقسیم کیا جائے گا۔
۳) مرحوم کی تجہیز و تکفین کے جائز اور متوسط اخراجات، قرض (چار کروڑ) کی ادائیگی اور اگر کسی غیر وارث کے لیے جائز وصیت کی ہو تو ایک تہائی (1/3) میں وصیت نافذ کرنے کے بعد بقیہ چھ کروڑ (60000000) کو چوبیس (24) حصوں میں تقسیم کیا جائے گا، جس میں سے پاکستانی بیوی کو پچھتر لاکھ (7500000) روپے، بیٹے کو تین کروڑ پچاس لاکھ (35000000) روپے اور بیٹی کو ایک کروڑ پچھتر لاکھ (17500000) روپے ملیں گے، جبکہ مرحوم کے بہن بھائیوں اور سابقہ بیوی کو مرحوم کی میراث میں سے کچھ حصہ نہیں ملے گا۔