سوال: ایک لڑکے نے قسم کھائی کہ اگر میں نے اس کمپنی یا دکان سے چوری کی تو میری بیوی کو طلاق ہوگی، طلاق ہوگی، طلاقی ہوگی۔ قسم کھانے کی ضرورت اس لیے پیش آئی کہ یہ لڑکا کمپنی سے چوری کرنے کا عادی تھا۔
پھر اس کے بعد یہ ہوا کہ کمپنی کے مینیجر نے کمپنی کے ملازمین کے لیے کھانا لانے کے لیے اس لڑکے کو پیسے دیے اور اس لڑکے نے ان پیسوں میں سے چوری کرلی۔
جب اس لڑکے نے یہ قسم کھائی تھی اس کا صرف نکاح ہوا تھا، اور اس چوری کے بعد اس کی رخصتی ہوئی، اس لڑکے کو یاد نہیں رہا تھا کہ میں نے یہ قسم اٹھائی ہوئی ہے اور قسم کے خلاف کام مجھ سے ہو بھی گیا ہے، اب اس کو رخصتی کے کئی عرصہ بعد یاد آیا ہے کہ میں نے تو اس طرح کی قسم اٹھائی تھی۔
اس ضمن میں آپ سے تین سوالات کے جوابات مطلوب ہیں:
1) کیا کمپنی کے ملازمین کے کھانا لانے کے لیے دیے ہوئے پیسوں میں سے چوری کرنے سے طلاق واقع ہوگئی ہے؟
2) اگر طلاق واقع ہوگئی ہے تو کتنی واقع ہوئی ہیں، کیونکہ اس وقت تک رخصتی نہیں ہوئی تھی، صرف نکاح ہوا تھا۔
3) اگر ایک طلاق واقع ہوئی ہے تو کیا یہ لڑکا عدت میں ہی دوبارہ اپنی بیوی سے نکاح کرسکتا ہے؟

جواب: واضح رہے کہ اگر کوئی شخص اپنی غیر مدخول بہا منکوحہ کو تین طلاقیں ایک ساتھ یا الگ الگ الفاظ کے ساتھ کسی شرط پر معلق کرکے دے دے تو راجح قول کے مطابق شرط پائے جانے کی صورت میں تینوں طلاقیں واقع ہوجاتی ہیں۔
سوال میں ذکر کردہ صورت میں چونکہ شوہر نے اپنی غیر مدخول بہا بیوی کی طلاقیں کمپنی سے چوری نہ کرنے کی شرط پر معلق کی تھی، لہذا اگر مینیجر نے اسے کمپنی کے پیسے دیے ہوں (اپنے ذاتی پیسے نہ دیے ہوں) تو کمپنی کے پیسے چوری کرنے کی وجہ سے طلاق واقع ہونے کی شرط پائی گئی ہے، جس سے اس کی بیوی پر تین طلاقیں واقع ہو چکی ہیں، اور یہ عورت اس مرد کے لیے حرمت غلیظہ کے ساتھ حرام ہوچکی ہے، لہذا اب ان کا آپس میں ایک ساتھ رہنا اور میاں بیوی والے تعلقات قائم رکھنا ناجائز اور حرام ہے۔ ان پر شرعا لازم ہے کہ فورا علیحدگی اختیار کریں اور اب تک ساتھ رہنے اور میاں بیوی والے تعلقات قائم رکھنے پر ندامت کے ساتھ اللہ تعالی کے حضور توبہ و استغفار کریں۔