سوال: سعید بن منصور نے کہا : ہمیں سفیان اور معتمر بن سلیمان نے سلیمان تیمی سے حدیث بیان کی ، انہوں نے ابوعثمان نہدی سے اور انہوں نے حضرت اسامہ بن زید رضی اللہ عنہما سے روایت کی ، کہا : رسول اللہ ﷺ نے فرمایا :’’ میں نے اپنے بعد کوئی آزمائش نہیں چھوڑی جو مردوں کے لیے عورتوں ( کی آزمائش ) سے بڑھ کر نقصان پہنچانے والی ہو ۔‘‘ (صحیح مسلم: 6945)
مفتی صاحب! اس حدیث کی تشریح درکار ہے۔

جواب: سوال میں ذکر کردہ روایت "صحیح"ہے اور صحیح مسلم میں ہے، لہذا اس کو بیان کیا جاسکتا ہے۔
ذیل میں اس روایت کا ترجمہ اور تشریح ذکر کی جاتی ہے۔
ترجمہ:
حضرت ابوہریرہ رضی اللہ عنہ سے روایت ہے کہ جناب رسول اللہ ﷺ نے فرمایا: ’’میں نے اپنے بعد کوئی آزمائش نہیں چھوڑی جو مردوں کے لیے عورتوں (کی آزمائش) سے بڑھ کر نقصان پہنچانے والی ہو۔ ‘‘(صحیح مسلم ،حدیث نمبر: 2740)
تشریح:
۱) حدیث شریف کی تشریح سمجھنے سے پہلے یہ جاننا ضروری ہے کہ ’’فتنہ‘‘ کسے کہتے ہیں اور قرآن و حدیث میں یہ کس معانی میں استعمال ہوا ہے؟ چنانچہ یہ لفظ کئی معانی کے لیے استعمال ہوتا ہے، مثلاً: آزمائش، کسی پر فریفتہ ہونا، گمراہ ہونا، گناہ، ذلت، عذاب وغیرہ (مصباح اللغات/ص:۶۱۸) جبکہ قرآن پاک اور حدیث میں یہ لفظ زیادہ تر’’ امتحان و آزمائش‘‘ کے معنی میں استعمال ہوا ہے۔
قرآن کریم میں اولاد اور مال کو بھی ’’فتنہ‘‘ یعنی آزمائش قراردیا ہے۔ سورۃ الانفال میں ہے:واعْلَمُوا أَنَّمَا أَمْوَالُكُمْ وَأَوْلَادُكُمْ فِتْنَةٌ وَأَنَّ اللَّهَ عِنْدَهُ أَجْرٌ عَظِيمٌ (الانفال:28) ’’اور جان لو کہ تمھارے مال اور تمھاری اولاد ایک آزمائش کے سوا کچھ نہیں اور یہ کہ یقیناً اللہ تعالى کے پاس اجر عظیم ہے‘‘۔
۲) ذکرکردہ حدیث میں مردوں کے لیے عورتوں (کی آزمائش) کو سب زیادہ نقصان پہنچانے والا اس اعتبار سے فرمایا گیا کہ مرد کی طبیعت عورت کی طرف زیادہ مائل ہوتی ہے، جس کی وجہ سے بسا اوقات وہ حرام کا ارتکاب کر بیٹھتا ہے اور مرد عام طور پرعورتوں ہی کی وجہ سے آپس کے لڑائی جھگڑوں اور نفرت وعداوت میں مبتلا ہوتے ہیں، اسی لیے آنحضرت ﷺ نے مردوں کو ہوشیار کیا ہے کہ وہ عورتوں کی جانب زیادہ میلان ہونے کی وجہ سے آزمائش میں نہ پڑیں۔
ملا علی قاریؒ فرماتے ہیں: عورتوں کا کم درجہ کا فساد یہ ہے کہ یہ مردوں کو دنیاداری کی طرف راغب کرتی ہیں اور ظاہر ہے کہ دنیاداری سے زیادہ اور کون سی چیز ضرر رساں اور نقصان دہ ہوسکتی ہے، کیونکہ سرکار دو عالم ﷺ نے اس کے بارے میں فرمایا کہ’’ دنیا کی محبت ہر برائی کی جڑ ہے‘‘۔
۳) حدیث میں ’’بعدی‘‘ یعنی میرے بعد فرمایا، کیونکہ آنحضرت ﷺ کے زمانہ مبارک میں حق کا غلبہ تھا اور نیکی کی طاقت تمام برائیوں کو دبائے ہوئے تھی، اس لیے اس وقت عورتوں کے فتنے کم تھے اور ان کا زیادہ ظہور آپ ﷺ کے بعد ہوا۔
۴) ملا علی قاریؒ فرماتے ہیں: اگر عورت نیک ہو تو یہ دنیا کی بہترین نعمت ہے، کیونکہ آنحضرت ﷺ نے ارشاد فرمایا: دنیا متاع (کچھ وقت تک کے لیے فائدہ اٹھانے کی چیز) ہے اور دنیا کی بہترین متاع نیک عورت ہے۔
خلاصۂ کلام:
اس حدیث میں عورت کے لیے ’’فتنہ‘‘ کا لفظ اس کی حقارت، ذلت یا عیب بتانے کے لیے استعمال نہیں ہوا اور نہ ہی اس سے اس کی قدر گھٹانا مقصود ہے، بلکہ اس حدیث کا مطلب یہ ہے کہ عورت اگرچہ اللہ تعالیٰ کی ایک نعمت ہے، لیکن جس طرح اللہ تعالی دوسرے نعمتوں کے ذریعے انسان کا امتحان لیتے ہیں اور وہ نعمتیں اس کے لیے آزمائش کا سبب اور ذریعہ بنتی ہیں، بالکل اسی طرح مردوں کے لیے سب سے بڑی آزمائش اور امتحان کا سبب عورت ہے، لہذا حدیث کا ہرگز یہ مطلب یہ نہیں ہے کہ عورت منحوس یا بری چیز ہے۔