سوال: مفتی صاحب! میں ایک مولوی صاحب کے بیان میں سنا ہے کہ "لا إله إلا الله وحده لا شريك له احد صمد لم يلد ولم يولد ولم يكن له كفوا أحد" ایک بار پڑھنے سے بیس لاکھ نیکیاں ملتی ہیں۔ مفتی صاحب! کیا یہ درست ہے؟

جواب: سوال میں مذکور کلمات کى فضیلت حضرت عبد اللہ بن أبی أوفى رضی اللہ عنہ سے مروى ہے، اس حدیث کی سند میں ایک راوی پر محدثین نے سخت کلام کیا ہے، جس وجہ سے یہ حدیث ضعیف ہے، نیز ان کلمات کى فضیلت دوسرے صحابہ کرامؓ سے بھی مروی ہے، اگرچہ ان پر بھی محدثین نے کلام کیا ہے، بہر حال وہ احادیث مذکورہ حدیث کی شاہد ہیں، چنانچہ اس حدیث کے ضعف کی تلافی ان شواہد سے بھی ہو جائے گی، نیز ضعیف حدیث اپنی شرائط کے ساتھ فضائل کے باب میں معتبر سمجھی جاتی ہے، لہذا ان کلمات کى فضیلت کے حصول کے لیے ان کو پڑھا جا سکتا ہے۔
ذیل میں اس حدیث کا ترجمہ، تخریج اور اس کى اسنادى حیثیت، نیز اس حدیث کے دو شواہد ذکر کیے جاتے ہیں:
ترجمہ:
حضرت عبد اللہ بن أبی أوفى رضی اللہ عنہ سے مروى ہے کہ رسول اکرم صلى اللہ علیہ وسلم نے ارشاد فرمایا ہے: "جس نے گیارہ مرتبہ کہا: "لا إله إلا الله وحده لا شريك له أحد صمد لم يلد ولم يولد ولم يكن له كفوا أحد" تو اللہ تعالى اس کے لیے 2 کروڑ نیکیاں لکھ دیں گے"۔ (مسند احمد بن منیع بحوالہ إتخاف الخيرة للبوصيري: حدیث نمبر: 6111)
تخريج الحديث:
1) مسند أحمد بن منيع (بحوالہ إتحاف الخیرۃ للبوصیری): (كتاب الأذكار/ باب فضل لا إله إلا الله، 6/ 412 ، رقم الحديث (6111)، ط: دار الوطن)
2) مسند عبد بن حميد: (ص 187، رقم الحديث (529)، ط: مكتبة السنة- القاهرة)
3) مسند ابو يعلى موصلى (بحوالہ إتحاف الخيرة للبوصيري) : (كتاب الأذكار/ باب فضل لا إله إلا الله، 6/ 412، رقم الحديث (6111)، ط: دار الوطن)
4) المعجم الكبير للطبراني (بحوالہ جامع المسانید): (5/ 60 رقم الحديث (6057)، ط: دار خضر للطباعة)
حدیث کى اسنادى حیثیت:
اس حدیث کو حافظ ہیثمی رحمہ اللہ (م 807 ھ) نے "مجمع الزوائد" جلد 10 ص 95 رقم الحدیث (16827) میں اس حدیث کو نقل کر کے فرمایا ہے: اس حدیث کو امام طبرانی رحمہ اللہ نے روایت کیا ہے، اس روایت کى سند میں "فائد ابو الورقاء" ہے، وہ متروک راوى ہے۔
نیز اس حدیث کو حافظ بوصیری رحمہ اللہ (م 840ھ) نے اپنی کتاب "إتحاف الخیرۃ المهرة" میں نقل کر کے فرمایا ہے: اس حدیث کو امام طبرانی رحمہ اللّٰہ نے روایت کیا ہے اور میں کہتا ہوں: اس حدیث کے تمام طرق کا مدار "أبو ورقاء" ہیں جن کا نام فائد العطار ہے اور وہ "ضعیف" ہے، امام احمد بن حنبل، ابن معین، ابو حاتم، ابوزرعہ، ابن حبان، امام بخاری، امام ابو داؤد، امام ترمذی، امام نسائی، ساجی اور امام دار قطنی وغیرہ رحمہم اللہ ان سب حضرات نے اس راوی کو ضعیف قرار دیا ہے اور امام حاکم نے تو یہ فرمایا ہے: اس نے حضرت ابن ابی اوفی رضی اللّٰہ عنہ سے "موضوع" (من گھڑت) احادیث روایت کی ہیں۔
مذکورہ بالا حدیث کے شواھد:
1) ترجمہ: حضرت تمیم دارى رضی اللہ عنہ سے مروى ہے کہ رسول اکرم صلى اللہ علیہ وسلم نے ارشاد فرمایا: "جس نے دس مرتبہ کہا: "أَشْهَدُ أَنْ لَا إِلَهَ إِلَّا اللهُ، وَحْدَهُ لَا شَرِيكَ لَهُ، إِلَهًا وَاحِدًا أَحَدًا صَمَدًا، لَمْ يَتَّخِذْ صَاحِبَةً وَلَا وَلَدًا، وَلَمْ يَكُنْ لَهُ كُفُوًا أَحَدٌ" (ترجمہ: میں گواہى دیتا ہوں کہ اللہ کے سوا کوئى معبود نہیں، وہ یکتا ہے ،اس کا کوئى شریک نہیں، ایک معبود، اکیلا ویگانہ، بے نیاز، نہ اس کى کوئى بیوى ہے، نہ اس کى کوئى اولاد اور نہ اس کا کوئى ہم سر ہے۔) تو اللہ تعالى اس کے لیے چار کروڑ نیکیاں لکھتے ہیں"۔ (سنن ترمذى: حدیث نمبر: 3473)
یہ حدیث نہایت ضعیف ہے، اس کا راوى خلیل بن مرۃ ضعیف ہے اور امام بخارى رحمہ اللہ کے نزدیک منکر الحدیث ہے، یعنى اس کى حدیثیں نہایت ضعیف ہوتى ہیں اور ازہر بن عبد اللہ کا حضرت تمیم دارى سے لقاء وسماع نہیں (تہذیب) پس حدیث منقطع بھى ہے۔
(ماخوذ از تحفۃ الألمعى شرح سنن ترمذی: جلد 8 ص 131، طبع: زمزم پبلشرز، کراچى)
2) ترجمہ: حضرت جابر بن عبد اللہ رضی اللہ عنہما سے مروى ہے کہ رسول اکرم صلى اللہ علیہ وسلم نے ارشاد فرمایا: "جس نےکہا: لا إله إلا الله وحده لا شريك له أحدا صمدا لم يلد ولم يولد ولم يكن له كفوا أحد، كتب له ألفى حسنة" الله تعالى اس كے لیے دو ہزار نیکیاں لکھ دیں گے اور جو زیادہ پڑھے تو اللہ تعالى اس کے لیے زیادہ ثواب لکھیں گے"۔ (حلیۃ الأولیاء: جلد 3 ص 157)
امام ابو نعیم رحمہ اللہ نے اس حدیث کو "غریب "قرار دیا ہے۔
خلاصہ بحث:
سوال میں مذکور حدیث ضعیف ہے، لیکن اس حدیث کے شواھد موجود ہیں، جن سے اس حدیث کے ضعف کی تلافی ہو جاتی ہے، نیز فضائل میں ایسی احادیث بیان کرنا اور ثواب و فضیلت کے حصول کے لیے ان احادیث پر عمل کیا جا سکتا ہے۔