عنوان: کیا مکہ مکرمہ اور مدینہ منورہ میں سرسبز و شادابی اور ہریالی کا آجانا قیامت کی نشانیوں میں سے ہے؟ حدیث کی تحقیق

سوال: مفتی صاحب! اس مرتبہ حج کے سفر کے دوران عرفات کے میدان اور دیگر مقامات پر کافی ہریالی اور سرسبزی دیکھنے کو ملی۔ اس موقع پر بعض حضرات یہ کہہ رہے تھے کہ مکہ مکرمہ میں ہریالی اور سرسبزی کا آنا قیامت کی نشانیوں میں سے ہے۔
مفتی صاحب! دریافت طلب امر یہ ہے کہ کیا احادیثِ مبارکہ میں یہ بات بیان ہوئی ہے کہ قیامت کے قریب مکہ مکرمہ یا جزیرۂ عرب میں دوبارہ ہریالی اور سرسبزی پیدا ہوجائے گی؟ اگر یہ بات احادیث میں وارد ہوئی ہے تو براہِ کرم اس کی وضاحت فرما دیں کہ اس حدیث کا مفہوم کیا ہے اور اس کا موجودہ حالات پر کس حد تک انطباق ہوتا ہے؟

جواب: واضح رہے کہ متعدد احادیث مبارکہ میں قیامت کی مختلف علامات کا تذکرہ ملتا ہے، جن میں سے ایک علامت سرزمین ِعرب میں ہریالی وشادابی کا ہونا بھی ثابت ہے، جس سے معلوم چلتا ہے کہ قیامت سے پہلے عرب کی زمین میں معاشی وزرعی زبردست انقلاب آئے گا، چونکہ مکہ مکرمہ بھی اسی کا حصہ ہے، لہذا یہ حدیث مکہ مکرمہ کے سرسبز ہونے کی بھی خبر دیتی ہے۔ تاہم محض موجودہ عرفات (یا دیگر چند مقامات) کی ہریالی دیکھ کر یہ فیصلہ نہیں کیا جاسکتا کہ حدیث میں مذکور علامت پوری ہوگئی ہے یا نہیں؟ چونکہ سبزہ کا نظر آنا مختلف اسباب سے ہوسکتا ہے، جن میں حکومت کی طرف سے گرین ایریاز کی دیکھ بھال اور مصنوعی آب پاشی بھی شامل ہے، لہذا سرزمینِ عرب میں ہونے والی ہر سبزوشادابی کو حدیث کی پیش گوئی کا قطعی مصداق قرار دینا قبل از وقت معلوم ہوتا ہے، کیونکہ اس کا حقیقی ظہور اور وقت کا علم اللہ ہی کو ہے۔ سو اس کے حتمی تعین ومصداق میں الجھنے کے بجائےایک مسلمان کے شایانِ شان یہ ہے کہ اپنے اعمال واصلاح پر توجہ دی جائے۔ فرائض کی پابندی، نیک اعمال میں اضافہ اور فتنوں سے بچنے کی مکمل کوشش کی جائے۔
باقی ذکر کردہ روایت سند کے لحاظ سے مضبوط اور متعدد طرق سے منقول ہونے کی وجہ سے مستند ہے، لہذا اس کو آگے نقل کرنا درست ہے۔ ذیل میں روایت کا ترجمہ نقل کیا جاتا ہے:
حضرت ابوہریرہ رضی اللہ عنہ سے روایت ہے کہ رسول اللہﷺ نے فرمایا: "قیامت اس وقت تک نہیں آئے گی جب تک مال ودولت کی فروانی نہیں ہوجائے گی۔ اور فراوانی اس طرح ہوگی کہ ایک شخص اپنے مال کی زکوةنکالے گا لیکن وہ کوئی ایسا شخص نہیں پائے گا جو اس کی زکوة کا مال لے لے (کیونکہ مال دولت کی فراوانی کسی شخص کو محتاج وضرورت مند نہیں چھوڑے گی اور کوئی آدمی اس طرح کے مال لینے پر تیار نہیں ہوگا، اور قیامت اس وقت تک نہیں آئے گی) جب تک عرب کی سرزمین باغ وبہار اور نہر والی (یعنی بے حساب مال ودولت فراہم کرنے والی) نہ بن جائے۔( صحيح مسلم، کتاب الزکاة، باب الترغیب في الصدقة قبل أن لا یوجد من یقبلها، 701/2، الناشر: مطبعة عيسى البابي الحلبي وشركاه، القاهرة)
مسلم شریف کی ایک روایت میں یوں ہے کہ (قیامت اس وقت تک نہیں آئے گی جب تک کہ) عمارتوں اور آبادی کا سلسلہ "اہاب اور یہاب "(مدینہ کے نواح میں واقع دو جگہوں کے نام ہیں) تک نہ پہنچ جائے(یعنی آخرِ زمانہ میں اس قدر عمارتیں بنیں گی کہ ان کا سلسلہ شہرکے اردگرد نواحی علاقوں تک پہنچ جائےگا) (مظاہر حق جدید، علامہ نواب محمد قطب الدین خان دہلویؒ، کتاب الفتن، 25/5، دار الاشاعت)
موجودہ حالات پر انطباق:
قیامت کی مختلف علامات کو محقق برزنجی نے اپنی کتاب "الاشاعة لأشراط الساعة" میں درجِ ذیل تین حصوں میں تقسیم کیا ہے:
(1)علامات ِبعیدہ: جن کا ظہور ایام گزشتہ میں ہوچکا ہے، جیسے: نبیﷺ کا رحلت فرمانا اور حضرت عمر رضی اللہ عنہ کو شہید کیا جانا وغیرہ۔
(2)علامات متوسطہ: جن کے وقوع کا سلسلہ ابھی جاری ہے، جیسے: امانت میں خیانت، قطع تعلقی وغیرہ۔
(3)علامات قریبہ: جن کا وقوع ایسے ہوگا جیسے: ہار کی لڑی کا دھاگا ٹوٹ جانے کے بعد اس کے موتی یکے بعد دیگرے سلسلہ وار گرتے ہیں، اور ان علامات کے پورا ہوتے ہی قیامت آجائے گی، جیسے: خروجِ دجال، نزول عیسی وغیرہ۔
سرزمینِ عرب کی شادابی اور اس میں عمارتوں کے قیام کی طرف رجحانات کا پیدا ہونا یہ سب علامات متوسطہ کے قبیل سے ہیں، جن کا وقوع دیگر علامات کی طرح مسلسل جاری ہے۔ بہرحال ان علامات کے ظہور کے مقاصد پر نظر رکھتے ہوئے خود کو غفلت سے بیدا رکھ کر آخرت کی تیاری کی طرف متوجہ کرنا یہی ایک مسلمان کو زیب دیتا ہے۔
روایت کی مختصر وضاحت:
مذکورہ حدیث کے ذیل میں شارحینِ حدیث نے قیامت کے قریب عرب کی زمین کے دوبارہ سرسبز اور شاداب ہونے کے ممکنہ تین بنیادی اسباب ذکر کیے ہیں:
(1)عرب باشندے لڑائی اور جھگڑے اور صحرا میں خانہ بدوشی کی زندگی کو چھوڑ کر کھیتی باڑی، درخت لگانے اور نہریں کھودنے کی طرف آجائیں گے۔
(2)قدرتی نظام کے تحت سرزمین ِ عرب اپنی قدیم تاریخی حالت کی طرح سرسبز ہوگا۔
(3)جنگوں اور فتنوں کی وجہ سے لوگ زمینوں کی دیکھ بھال چھوڑ دیں گے، جس سے وہاں خود بخود قدرتی گھاس اور چشمے جاری ہوجائیں گے۔ غرض سبب کوئی بھی بنے، مذکورہ روایت کی پیش گوئی کے مطابق سرزمینِ عرب میں ہر طرف سبزہ اور پانی ہوجائے گا، اور یہ قیامت کی علامات میں سے ایک علامت ہے، جس کے حتمی وقت کا علم اللہ سبحانہ وتعالی ہی کو ہے۔