سوال: مفتی صاحب! مندرجہ ذیل حدیث کی تصدیق فرمادیں:"حضرت ابو امامہ باہلی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: اے لوگوں! میرے بعد کوئی نبی نہیں ہے اور تمہارے بعد کوئی امت نہیں ہے۔ خبردار! اپنے رب کی عبادت کرتے رہو، پانچوں نمازیں پڑھو، رمضان کے روزے رکھو، اپنے مال کی زکوٰۃ دو اور اپنے اماموں کی اطاعت کرو، اپنے رب کی جنت میں داخل ہو جاؤگے"۔ (معجم الکبیر للطبرانی)

جواب: سوال میں ذکر کردہ روایت حضرت ابو امامہ رضی اللہ عنہ سے مروى ہے، اس روایت کو امام طبرانی رحمہ اللہ (م 360 ھ) نے اپنى کتاب "المعجم الکبیر" میں نقل فرمایا ہے، اس حدیث کى سند "صحيح" ہے، حافظ ہیثمی رحمہ اللّٰہ (م 807ھ) نے اس کی سند کے راویوں کو ثقہ قرار دیا ہے۔
نیز حضرت ابو امامہ رضی اللہ عنہ سے اسى مضمون کى روایت ایک اور سند سے امام ترمذی رحمہ اللہ (م 279 ھ) نے اپنى کتاب "سنن الترمذی" جلد 1 ص 602 رقم الحديث (616) ميں نقل فرمائى ہے اور حدیث کو "حسن صحیح" قرار دیا ہے، لہذا حضرت ابو امامہ رضی اللہ عنہ کى اس روایت کو بیان کرنا درست ہے۔
ذیل میں "سنن ترمذى" اور "معجم کبیر طبرانی" دونوں کى روایات کا ترجمہ نقل کیا جاتا ہے:
1) ترجمہ: حضرت ابو امامہ رضی اللہ عنہ فرماتے ہیں: میں نے رسول اکرم صلى اللہ علیہ وسلم کو "حجۃ الوداع" کے موقع پر خطبہ دیتے ہوئے يہ سنا، آپ نے ارشاد فرمایا: "تم اپنے اللہ جو تمہارا پروردگار ہے سے ڈرو اور تم اپنى پانچ نمازیں پڑھو اور تم اپنے مہینے (ماہ رمضان) کے روزے رکھو اور تم اپنے اموال کى زکوۃ ادا کرو اور تم اپنے سربراہوں (حاکموں) کى (جائز امور میں) اطاعت کرو تو تم اپنے رب کى جنت میں داخل ہو جاؤ گے"، راوى کہتے ہیں: میں نے حضرت ابو امامہ رضی اللہ عنہ سے عرض کیا: آپ نے کتنا عرصہ قبل رسول اللہ صلى اللہ علیہ وسلم سے یہ حدیث سنى تھى تو انہوں نے فرمایا: میں نے جب یہ روایت رسول اللہ صلى اللہ علیہ وسلم سے سنى تھى تب میں تیس سال کا تھا۔ (سنن ترمذى: حدیث نمبر: 616)
امام ترمذى رحمہ اللہ نے فرمایا: یہ حدیث "حسن صحیح" ہے۔
2) ترجمہ: حضرت ابو امامہ رضی اللہ عنہ فرماتے ہیں کہ میں نے رسول اکرم صلى اللہ علیہ وسلم کو یہ فرماتے ہوئے سنا: "اے لوگو! بے شک میرے بعد کوئى نبى نہیں ہے اور تمہارے بعد کوئى امت نہیں ہے، آگاہ رہو! تم اپنے پروردگار کى عبادت کرو اور تم اپنى پانچ نمازیں پڑھو اور تم اپنے مہینے (ماہ رمضان) کے روزے رکھو اور تم اپنے اموال کى زکوۃ خوش دلى سے ادا کرو اور اپنے سربراہوں (حاکموں) کى (جائز امورمیں) اطاعت کرو تو تم اپنے رب کى جنت میں داخل ہو جاؤ گے"۔
(المعجم الکبیر للطبرانی: حدیث نمبر: 7535)