سوال: حضرت انس بن مالک رضی اللہ عنہ سے روایت ہے، انہوں نے کہا: میں نے رسول اللہ ﷺ سے سنا، آپ ﷺ فرمارہے تھے: ''ہم عبدالمطلب کی اولاد اہل جنت کے سردار ہیں: میں (نبی ﷺ) حمزہ، علی، جعفر، حسن، حسین اور مہدی رضی اللہ عنہم اجمعین۔ (سنن ابن ماجہ حدیث نمبر 4087) کیا یہ حدیث موضوع ہے؟

جواب: سوال میں مذکور حدیث کو امام ابن ماجہ رحمہ اللہ (م 273 ھ) نے اپنى کتاب "سنن ابن ماجہ" میں نقل فرمایا ہے، اس حدیث کى سند میں ایک راوى "عبد اللہ بن زیاد" مجہول الحال ہے، چنانچہ محدثین کے نزدیک یہ حدیث ضعیف ہے۔
ذیل میں حدیث کا ترجمہ اور اس حدیث پر محدثین کا کلام نقل کیا جاتا ہے:
ترجمہ:
حضرت انس بن مالک رضی اللہ عنہ سے مروی ہے وہ فرماتے ہیں کہ میں نے رسول اللہ ﷺ کو یہ فرماتے ہوئے سنا: ''ہم عبدالمطلب کی اولاد اہل جنت کے سردار ہیں: میں (نبی اکرم ﷺ)، حمزہ، علی، جعفر، حسن، حسین اور مہدی رضی اللہ عنہم اجمعین۔ (سنن ابن ماجہ: حدیث نمبر: 4087)
مذکورہ بالا حدیث کی اسنادی حیثیت:
1) حافظ بوصيرى رحمہ اللہ (م 840 ھ) نے "مصباح الزجاجہ" میں اس حدیث کى سند کے متعلق فرمایا ہے: اس سند میں کلام ہے، سند کے راوى "علی بن زیاد " کے بارے میں کوئى تفصیل نہیں ملى ہے، ان کے متعلق نہ کسى محدث نے جرح کى ہے اور نہ ہى کسى نے ان کى توثیق کى ہے، تاہم اس سند کے باقى راوى ثقہ ہیں۔
حافظ مزى رحمہ اللہ (م 742ھ) نے "تحفۃ الأشراف" میں فرمایا ہے: ابن ماجہ کى سنن میں اس حدیث کى سند میں نام "على بن زیاد" ہے، جبکہ درست نام "عبد اللہ بن زیاد" ہے۔
البتہ امام ابن حبان رحمہ اللہ (م 354 ھ) نے اپنی کتاب "الثقات" میں "عبداللہ بن زیاد" کو نقل فرمایا ہے، ان کے نزدیک عبداللہ بن زیاد ثقہ راوی ہیں۔
2) حافظ ابن کثیر رحمہ اللہ (م 774 ھ) نے اپنى کتاب "البدایۃ والنہایۃ" میں کتاب الفتن والملاحم کے عنوان کے تحت اس حدیث کو نقل کر کے حافظ مزى رحمہ اللہ کا کلام نقل کر کے فرمایا ہے: اس راوى (عبد اللہ بن زیاد السحیمى) کو امام بخارى رحمہ اللہ نے اپنی کتاب "التاریخ" میں اور امام ابن أبی حاتم رحمہ اللہ نے اپنی کتاب "الجرح والتعدیل" میں اسى طرح ذکر کیا ہے، یعنی کوئی تفصیل نقل نہیں کی ہے، لہذا یہ راوى مجہول ہے اور یہ حدیث "منکر" ہے۔
3) اس حدیث کو امام حاکم رحمہ اللہ (م 405 ھ) نے اپنى کتاب مستدرک حاکم میں "عبد اللہ بن زیاد" کى سند سے نقل کر کے فرمایا ہے: یہ حدیث امام مسلم کى شرط کے مطابق صحیح ہے، جبکہ حافظ ذہبى رحمہ اللہ (م 748ھ) نے "تلخیص المستدرک" میں اس حدیث کو "موضوع" (من گھڑت) قرار دیا ہے۔
نقاد محدثین میں سے صرف امام ذہبی رحمہ اللّٰہ نے اس حدیث کو صرف "تلخیص المستدرک" میں "موضوع" قرار دیا ہے، جبکہ انہی کی دیگر دو کتابوں مثلاً: "تاریخ الإسلام" اور تذهیب التهذیب) میں یہ حدیث مذکور ہے، وہاں انہوں نے موضوع ہونے کی صراحت نہیں فرمائی ہے، بلکہ دیگر محدثین کے اسلوب کو اختیار فرمایا ہے، یعنی اس حدیث کو منکر قرار دیا ہے۔
4) محقق العصر حضرت علامہ عبد الرشید نعمانی صاحب رحمہ اللہ (م1420ھ) نے اپنى کتاب "ما تمس إلیه الحاجة" میں سنن ابن ماجہ کى ان تمام احادیث کو ذکر فرمایا ہے، جن پر کسى محدث نے "موضوع" ہونے کا حکم لگایا، ان احادیث میں ہمارى زیر بحث یہ حدیث مذکور نہیں ہے، لہذا یہ حدیث ان کے نزدیک "موضوع" کے درجے کی نہیں ہے، چنانچہ اسی بات کو ماضى قریب کے مشہور عالم و فقیہ حضرت مفتى نظام الدین شامزئى شہید نور اللہ مرقدہ نے اپنى کتاب "عقیدہ ظہور مہدی" ص 81 میں تحریر فرمایا ہے: "ابن ماجہ: ابو عبد اللہ محمد بن یزید بن عبد اللہ ابن ماجہ قزوینى ربعى المتوفى سنہ 273ھ انہوں نے بھى اپنى کتاب میں فتن کے ابواب کے ضمن میں ظہور مہدی کى کچھ احادیث کو اپنى سندوں کے ساتھ نقل کیا ہے، ملاحظہ ہو "باب خروج المہدی ص 299" ۔۔۔ سنن ابن ماجہ میں اگرچہ کچھ احادیث موضوع بھى ہیں، لیکن یہ احادیث ان احادیث میں شامل نہیں جن پر محدثین نے وضع کا قول کیا ہے۔ ابن ماجہ کى وہ سب احادیث جن کو کسى محدث نے موضوع کہا ہے، علامہ عبد الرشید نعمانى کى کتاب "ما تمس إلیہ الحاجۃ لمن یطالع سنن ابن ماجہ" میں موجود ہیں، ظہور مہدی کى احادیث ان میں شامل نہیں ہیں۔ ہاں! "لا مہدی إلا عیسى" کى حدیث پر ضرور کلام کیا ہے"۔
(عقیدہ ظہور مہدی احادیث کى روشنى میں: ص 81، طبع: مکتبہ شامزئى، کراچى)
خلاصہ بحث:
نقاد محدثین کے مذکورہ بالا کلام کی تفصیل سے یہ بات واضح ہوتى ہے کہ یہ حدیث ضعیف ہے، بالاتفاق موضوع نہیں ہے، نیز اس حدیث میں مذکور مضمون کلی اور جزوی طور پر دیگر احادیث سے بھی ثابت ہے، لہذا اس حدیث کو فضائل کے باب میں ضعف کی صراحت کے ساتھ بیان کیا جا سکتا ہے۔