سوال: ایک شخص نے اپنی بیوی کو ایک دفعہ طلاق دے دی ہے، اس نے کہا ہے کہ میں رجوع کر لوں گا، لیکن اس کی بیوی کے بیان کے مطابق طلاق دینے کے بعد سے چھ مہینے گزر گئے ہیں، ابھی تک اس نے رجوع نہیں کیا ہے۔
معلوم یہ کرنا ہے کہ کیا طلاق ہو گئی ہے؟ اگر ہو گئی ہے تو کتنی ہو گئی ہیں؟ اور طلاق سے رجوع کرنے سے کیا مراد ہوتا ہے؟

جواب: واضح رہے کہ بیوی کو ایک یا دو طلاق رجعی دینے کے بعد شوہر دورانِ عدت (حاملہ نہ ہونے کی صورت میں تین ماہواریاں گزرنا) رجوع کرنے کا حق رکھتا ہے، لیکن اگر شوہر نے عدت کے دوران رجوع نہیں کیا تو عدت گزرتے ہی عورت اس مرد کے نکاح سے نکل جائے گی، اب اگر سابقہ میاں بیوی باہمی رضامندی سے دوبارہ نکاح کرنا چاہیں تو شرعی گواہوں کی موجودگی میں نئے مہر کے ساتھ دوبارہ نکاح کرسکتے ہیں۔
رجوع سے مراد یہ ہے کہ شوہر بیوی سے زبان سے یوں کہہ دے کہ میں نے تجھ سے رجوع کرلیا ہے اور بہتر یہ ہے کہ اس پر دو گواہ بھی بنادے، اسی طرح اگر شوہر بیوی کے ساتھ ہمبستری کرلے یا شہوت کے ساتھ اسے چھولے تو اس سے بھی رجوع ہوجائے گا۔
سوال میں ذکر کردہ صورت میں اگر واقعتاً عورت کا بیان درست ہو کہ شوہر نے طلاق کے بعد چھ مہینے گزرنے تک رجوع نہیں کیا ہے اور اس دوران عورت کی عدت بھی گزر چکی ہو تو ایسی صورت میں عورت اس مرد کے نکاح سے نکل چکی ہے، اب اگر دونوں دوبارہ ساتھ رہنا چاہیں تو باہمی رضامندی سے شرعی گواہوں کی موجودگی میں نئے مہر کے ساتھ نکاح کرنا لازم ہوگا۔
نوٹ: یہ جواب اس صورت میں ہے کہ شوہر بھی بیوی کے بیان سے متفق ہو، لیکن اگر شوہر دورانِ عدت رجوع کا دعوی کرتا ہو تو مسئلہ کی پوری صورت دوبارہ سے وضاحت سے لکھ کر بھیجیں۔