سوال: جابر بن عبداللہ کہتے ہیں کہ جب (آدم) نماز میں ہنس پڑے تو نماز لوٹائے اور وضو نہ لوٹائے اور حسن (بصری) نے کہا کہ جس شخص نے (وضو کے بعد) اپنے بال اتروائے یا ناخن کٹوائے یا موزے اتار ڈالے اس پر وضو نہیں ہے۔ حضرت ابوہریرہ کہتے ہیں کہ وضو حدث کے سوا کسی اور چیز سے فرض نہیں ہے اور حضرت جابر سے نقل کیا گیا ہے کہ رسول اللہ ﷺ ذات الرقاع کی لڑائی میں (تشریف فرما) تھے۔ ایک شخص کے تیر مارا گیا اور اس (کے جسم) سے بہت خون بہا مگر اس نے پھر بھی رکوع اور سجدہ کیا اور نماز پوری کر لی اور حسن بصری نے کہا کہ مسلمان ہمیشہ اپنے زخموں کے باوجود نماز پڑھا کرتے تھے اور طاؤس، محمد بن علی اور اہل حجاز کے نزدیک خون (نکلنے) سے وضو (واجب) نہیں ہوتا۔ عبداللہ بن عمر ؓ نے (اپنی) ایک پھنسی کو دبا دیا تو اس سے خون نکلا۔ مگر آپ نے (دوبارہ) وضو نہیں کیا اور ابن ابی اوفیٰ نے خون تھوکا۔ مگر وہ اپنی نماز پڑھتے رہے اور ابن عمر اور حسن ؓ پچھنے لگوانے والے کے بارے میں یہ کہتے ہیں کہ جس جگہ پچھنے لگے ہوں اس کو دھولے، دوبارہ وضو کرنے کی ضرورت نہیں۔ (صحیح بخاری، حدیث نمبر: 176)
مفتی صاحب! روایت بالا اور سنن ابو داؤد، حدیث نمبر: 198 کے حوالے سے رہنمائی فرمائیں کہ احناف کے نزدیک کن دلائل کی وجہ سے وضو ٹوٹتا ہے اور مذکورہ بالا دلائل کی ان احناف کے دلائل کے مقابلے میں کیا حیثیت ہے؟

جواب: سوال میں وضو ٹوٹنے کے مسائل سے متعلق صحابہ کرام اور تابعین کے مختلف اقوال مذکور ہیں، البتہ آپ کے سوال کے انداز سے معلوم ہوتا ہے کہ آپ کو ان میں سے صرف خون کے متعلق دریافت کرنا ہے کہ آیا خون نکلنے سے وضو ٹوٹتا ہے یا نہیں ہے؟ سوال میں مذکور مضمون صحیح بخارى کى عبارت کا ترجمہ ہے، چنانچہ صحیح بخارى کى اس عبارت کى تشریح اور جواب سے قبل اصل مسئلے کو سمجھنا ضرورى ہے تاکہ "صحیح بخارى" کا یہ مضمون سمجھنا آسان ہو۔
انسان کے بدن سے نکلنے والى چیزیں تین طرح کى ہیں:
1) بدن سے نکلنے والى چیز ایسى ہو جو کہ نجس نہ ہو، جیسے آنسو، پسینہ، تھوک وغیرہ ان کے نکلنے سے وضو نہیں ٹوٹتا ہے، اس بات پر تمام فقہاء کرام کا اتفاق ہے۔
2) بدن سے نکلنے والى چیز ایسى ہو جو کہ نجس ہو اور وہ "سبیلین" (اگلى اورپچھلى شرمگاہ ) سے نکلے، جیسے پیشاب و پاخانہ، حیض ونفاس کا خون، لہذا ایسى نجاست جو "سبیلین" سے نکلے اس سے وضو ٹوٹ جاتا ہے، اس بات پر بھى تمام فقہاء کرام کا اتفاق ہے۔
3) بدن سے نکلنے والى چیز ایسى ہو جو کہ نجس تو ہو، لیکن وہ "سبیلین" کے علاوہ جسم کے دوسرے کسى مقام سے خارج ہو، تو اس سے وضو ٹوٹتا ہے یا نہیں؟ اس صورت میں فقہاء کرام کا اختلاف ہے۔
امام شافعى رحمہ اللہ کا مسلک:
ان کے نزدیک وضو اس وقت ٹوٹے گا جب نجاست اپنے مخرج ِمعتاد "سبیلین" (یعنى نجاست جسم کے اس مقام سے خارج ہو جہاں سے عادۃً خارج ہوتی ہو، جیسے "سبیلین") سے نجاست کا خروج، لہذا امام شافعى رحمہ اللہ کے نزدیک اگر خون "سبیلین" کے علاوہ جسم کے کسى دوسرے حصے سے نکلے تو اس سے وضو نہیں ٹوٹتا ہے۔
امام مالک رحمہ اللہ کا مسلک:
ان کے نزدیک صرف اس نجاست سے وضو ٹوٹے گا جو خود بھى معتاد ہو (عادۃ ًنکلتى ہو) اور اس کا مخرج بھى معتاد (سبیلین) ہو جیسے: بول وبراز وغیرہ، لہذا قئے آنے، نکسیر پھوٹنے اور زخم وغیرہ سے خون نکلنے سے ان کے نزدیک وضو نہیں ٹوٹے گا۔
امام ابو حنیفہ اور امام احمد بن حنبل رحمہما اللہ کامسلک:
ان حضرات کے نزدیک صرف جسم سے نجاست کے خروج سے ہى وضو ٹوٹ جاتا ہے، خواہ وہ نجاست جسم سے عادۃً نکلتى ہو، یا عادۃً نہ نکلتى ہو، خواہ اس کا مخرج معتاد (سبیلین) ہو یا نہ ہو، لہذا حنفیہ اور حنابلہ کے نزدیک بول وبراز سے، خون بہنے، نکسیر پھوٹنے، زخم سے پیپ بہنے اور منہ بھر کر قئے ہونے سے وضو ٹوٹ جائے گا۔
نيز حضرات عشره مبشرہ، حضرت عبد اللہ بن مسعود، حضرت عبد اللہ بن عباس، حضرت زید بن ثابت، حضرت ابو موسى اشعرى اور دیگر اکابر صحابہ کرام وتابعین رضی اللہ عنہم اجمعین کا بھى یہى مؤقف ہے۔
امام شافعى رحمہ اللہ اور امام مالک رحمہ اللہ كا استدلال:
جیسا کہ سوال کى پوسٹ میں بھى مذکور ہے، حضرت جابر بن عبد اللہ رضی اللہ عنہما کى روایت جو کہ"سنن ابى داود" میں سندا اور "صحیح بخارى" میں تعلیقا نقل کى گئى ہے، جس کا خلاصہ یہ ہے کہ غزوه ذات الرقاع كے موقع پر رات کو پہرہ دیتے ہوئے ایک انصارى صحابى عباد بن بشر رضی اللہ عنہ نے نماز شروع کى اور دشمن کے ایک شخص نے نماز کے دوران انہیں تیر مارا، لیکن وہ نماز میں مشغول رہے کیونکہ انہوں نے سورۃ الکہف شروع کر رکھى تھى، اس میں انہیں مزہ آرہا تھا، جب دشمن نے انہیں یکے بعد دیگرے تین تیر مارے تب انہوں نے نماز ختم کر کے اپنے مہاجری ساتھى کو جگایا، اس وقت کافر کو معلوم ہوا کہ یہاں مزید افراد بھى ہیں، تو وہاں سے وہ بھاگ گیا، جب مہاجرى صحابى نے انصارى صحابى کو خون میں لت پت دیکھا تو کہا سبحان اللہ! آپ نے مجھے پہلے ہی تیر پر کیوں نہ جگا دیا؟ انہوں نے فرمایا: دراصل میں ایک ایسی سورت پڑھ رہا تھا جس کو درمیان میں چھوڑنا نہیں چاہتا تھا۔ (سنن ابی داؤد: حدیث نمبر: 198)
اس حدیث سے حضرات شوافع اور مالکیہ رحمہم اللہ نے یہ استدلال کیا ہے کہ ان صحابی نے خون نکلنے کے باوجود نماز کو جاری رکھا، اگر خون نکلنے سے وضو ٹوٹتا تو وہ صحابی پہلے ہی تیر پر نماز ختم کر دیتے، لہذا ان کا نماز کو جاری رکھنا اس بات کی دلیل ہے کہ خون نکلنے سے وضو نہیں ٹوٹتا ہے۔
اسى طرح ان حضرات کا استدلال حضرات صحابہ کرام اور تابعین کے مختلف اقوال سے بھی ہے مثلا:
حضرت عبد اللہ بن عمر رضی اللہ عنہما کا یہ عمل کہ انہوں نے اپنےجسم سے ایک پھنسى کو دبایا، اس سے کچھ مواد نکلا، لیکن انہوں نے وضو نہیں فرمایا۔حضرت حسن بصری رحمہ اللہ فرماتے ہیں: مسلمان مجاہدین جنگوں میں اپنے زخموں کے ساتھ نماز پڑھتے رہے ہیں یعنی زخموں سے خون نکلنے کے باوجود بھی وہ نماز پڑھتے تھے۔
حضرت عبد اللہ بن عمر رضی اللہ عنہما اور حضرت حسن بصرى رحمہ اللہ فرماتے ہیں: پچھنے لگوانے والے پر وضو واجب نہیں ہے، صرف پچھنے کى جگہ کو دھولینا کافى ہے، اس سے معلوم ہوا کہ خون نکلنے سے وضو نہیں ٹوٹتا ہے۔
حنفیہ اور حنابلہ رحمہم اللہ کا استدلال:
ان حضرات کا استدلال درج ذیل مرفوع احادیث سے ہے:
1) حضرت ابو الدرداء رضی اللہ عنہ سے مروى ہے کہ رسول اکرم صلى اللہ علیہ وسلم نے قئے فرمائى اور پھر وضو فرمایا۔ (سنن ترمذى: حديث نمبر: 87)
اس حدیث میں آپ صلى اللہ علیہ وسلم نے قے آنے پر وضو فرمایا، جس سے معلوم ہوا کہ قئے آنے پر بھى وضو لازم ہے۔
2) حضرت عائشہ صدیقہ رضی اللہ عنہا سے مروى ہے کہ آنحضرت صلى اللہ علیہ وسلم نے ارشاد فرمایا: "تم میں سے دوران نماز اگر کسى کو قئے آئے، یا اس کى نکسیر پھوٹے، یا مذى آئے تو اسے چاہیے کہ وہ جاکر وضو کرے اور پھر واپس لوٹ کر اپنى نماز پر بنا کرے اور اس دوران وہ بات نہ کرے۔
(سنن ابن ماجہ: حدیث نمبر: 1221)
اس حدیث میں آپ صلى اللہ علیہ وسلم نے قے اور نکسیر پھوٹنے کى وجہ سے وضو کو لازم قرار دیا ہے۔
3) حضرت فاطمہ بنت أبی حبیش رضی اللہ عنہا کى روایت جو تقریبا تمام کتبِ صحاح میں مذکور ہے، جس كو حضرت عائشہ رضی اللہ عنہا نے روایت کیا ہے کہ ایک صحابیہ حضرت فاطمہ بنت أبی حبیش رضی اللہ عنہا آپ صلى اللہ علیہ وسلم کى خدمت میں حاضر ہوئیں اور آپ سے اپنے استحاضہ کا عارضہ بیان کیا اور پوچھا کہ کیا میں اس حالت میں نماز ترک کر دوں؟ تو انہیں آپ صلى اللہ علیہ وسلم نے فرمایا: "نہیں! (تم نماز ترک مت کرو)، یہ تو ایک رگ ہے جس سے یہ خون آتا ہے، یہ حیض نہیں ہے، لہذا جب حیض کے ایام آئیں تب نماز موقوف کر دو اور جب وہ ایام گزر جائیں تو اپنے جسم سے خون صاف کر کے نماز ادا کر لیا کرو"، نیز اسی حدیث کے "سنن ترمذى" کے طریق میں یہ اضافہ بھى ہے کہ آپ صلى اللہ علیہ وسلم نے انہیں فرمایا: "تم ہر نماز کا وقت آنے پر وضو کر لیا کرو"۔ (سنن ترمذى: حدیث نمبر: 125)
اس حدیث میں آپ صلى اللہ علیہ وسلم نے وضو کا سبب رگ سے خون نکلنے کو قرار دیا ہے اور اس کى وجہ سے نماز کے وقت وضو کرنے کا بھى حکم فرمایا ہے، لہذا اس سے معلوم ہوا کہ خون کے نکلنے وضو لازم ہوتا ہے۔
4) حضرت زید بن ثابت رضی اللہ عنہ سے مروى ہے کہ آپ صلى اللہ علیہ وسلم نے ارشاد فرمایا: "ہر بہنے والے خون سے وضو لازم ہے"۔
(الکامل لابن عدی: 1/ 313)
حضرات شوافع اور مالکیہ رحمہما اللہ کے استدلال کا جواب:
غزوہ ذات الرقاع میں جو صحابى کو نماز میں تیر لگنے کے واقعے سے جو استدلال کیا گیا ہے، اس میں آنحضرت صلى اللہ علیہ وسلم کى تقریر ثابت نہیں ہے، نیز یہ صحابى کا فعل ہے، جو مذکورہ بالا مرفوع احادیث کے مقابلے میں حجت نہیں ہوسکتا ہے، مزید یہ کہ خون بالاجماع ناپاک ہے، جب ان صحابى کو تین تیر لگے تو وہ خون میں لت پت تھے ایسے میں ان کى نماز کیسے باقى رہى؟ اصل بات یہ ہے کہ اس واقعہ کا تعلق عشق سے ہے، جیسا کہ ان صحابى کے بیان سے بھى واضح ہے کہ خون بہنے کے باو جود قرآن کریم کا لطف ان کو نماز موقوف کرنے سے مانع بنا ہے، لہذا اس واقعہ سے استدلال نہیں کیا جاسکتا ہے۔
اسى طرح حضرت عبد اللہ بن عمر رضی اللہ عنہما کے پھنسى کو دبانے سے متعلق صحیح بخارى میں جو اثر منقول ہے، اس کو مزید تفصیل کے ساتھ مصنف ابن أبی شیبہ میں بیان کیا گیا ہے، وه یہ کہ حضرت عبد اللہ بن عمر رضی اللہ عنہما کے چہرے پر پھنسى تھى، حضرت نے اسے دبایا تو اس میں سے خون نکلا تو آپ نے اسے اپنى دونوں انگلیوں میں مسل دیا، پھر نماز ادا کى اور نیا وضو نہیں کیا، اس سے معلوم ہوتا ہے کہ تھوڑا سا خون نکلا تھا، جس کو انگلیوں میں مسل دیا گیا، لہذا حنفیہ بھى اس بات کے قائل ہیں کہ اگر خون نہ بہے تو اس سے وضو لازم نہیں ہوتا ہے، لہذا اس سے استدلال بھی نہیں کیا جا سکتا ہے۔
اسى طرح حضرت حسن بصرى رحمہ اللہ کا قول بھى حالت عذر پر محمول کیا جائے گا۔
نیز پچھنے لگانے کے متعلق جو اثر منقول ہے اس کا جواب یہ ہے کہ پچھنے لگانے کے بعد پچھنے کی جگہ کو دھونے سے یہ مراد ہے کہ پورے بدن کو نہ دھویا جائے، صرف پچھنے کی جگہ کو دھو لینا کافی ہے، اس سے یہ استدلال درست نہیں ہے کہ خون نکلنے سے وضو لازم نہیں ہوتا ہے۔
خلاصہ بحث:
خلاصہ یہ کہ حنفیہ اور حنابلہ کا استدلال مرفوع احادیث سے ہے، جبکہ شوافع اور مالکیہ کا استدلال آثار صحابہ وتابعین سے ہے، جو کہ مرفوع احادیث کے مقابلے میں حجت نہیں بن سکتے ہیں۔
(مستفاد از شروحات حدیث: تحفۃ القارى، انعام البارى، تشریحات ترمذى، درس ترمذى)