سوال: مفتی صاحب! ہم عمرہ کرنے گئے تو وہاں دیکھا کہ لوگ نماز پڑھ رہے ہیں اور طواف کرنے والے ان کے سامنے سے گزر رہے ہیں تو کیا حرم میں طواف کرتے ہوئے نمازی کے آگے سے گزرنا جائز ہے؟

جواب: واضح رہے کہ جو مسجد پیمائش کے لحاظ سے چالیس شرعی گز لمبی اور چالیس شرعی گز چوڑی ہو وہ مسجدِ کبیر ہے، اس لحاظ سے مسجدِ حرام بھی مسجدِ کبیر ہے، اور مسجد کبیر میں نمازی کی جگہ سے دوصفوں کے فاصلےسے گزرنا جائز ہے، طواف کرنے والوں کا دوران طواف نمازی کے آگے سے دوصفوں کے فاصلےسے گزرنا جائزہے، تاہم چونکہ مسجد حرام میں طواف کرنے والوں کی تعداد بہت زیادہ ہوتی ہے، اور کسی وقت بھی طواف نہیں رکتا ہے، اس لیے مجبوری کی حالت میں نماز کے سامنے سے بھی گزرنے کی گنجائش ہوگی، لیکن اس صورت میں بھی اس بات کا پورا اہتمام کیا جائے کہ نمازی کے سامنے سے گزرنے کی حتی الامکان بچنے کی کوشش کی جائے یا پھرگزرتے ہوئے کسی چیز (چھتری، چھڑی، رومال وغیرہ) یا کسی شخص کو سترہ بنا کر گزرا جائے۔