سوال: مفتی صاحب ! ایک دوست نے پوچھا ہے کہ نبی علیہ الصلاۃ والسلام نے زندگی میں ایک ہی حج کیا ہے، تو پھر یہ حجۃ الوداع کا کیا مطلب ہے؟ رہنمائی فرما دیجئے گا ۔

جواب: نبی اکرم صلی الله عليہ وسلم نے ہجرت کے بعد ایک حج ادا فرمایا ہے، اسی کو " حجۃ الوداع " کہا جاتا ہے۔
واقعہ یہ ہے کہ جناب رسول اللہ صلی الله عليہ وسلم نے دنیا سے رحلت فرمانے سے پہلے جو حج فرمایا اس موقع پر آپ صلی الله عليہ وسلم نے ایک خطبہ ارشاد فرمایا، اس میں آپ نے خود اس بات کی طرف اشارہ فرمایا کہ یہ "حجۃ الوداع " ہے۔
آپ نے ارشاد فرمایا :
"ایھا الناس انی واللہ لا ادری لعلی لا القاکم بعد یومی ھذا ".( سنن الدارمی : ۲۲۹، مسند ابی یعلیٰ : ۷۴۱۳، المستدرک للحاکم :۲۹۴ )
ترجمہ:
’’اے لوگو! بخدا مجھے معلوم نہیں کہ آج کے بعد میں ا س جگہ تم سے مل سکوں گا یا نہیں‘‘۔
گویا کہ حضور صلی الله عليه وسلم کے ذہن میں یہ بات تھی کہ میں اپنے صحابہؓ سے یہ آخری اجتماعی ملاقات کر رہا ہوں، اس لیے آپ صلی الله عليه وسلم نے بطور خاص یہ بات ارشاد فرمائی کہ:
" مجھ سے باتیں پوچھ لو، سیکھ لو، جو سوال کرنا ہے وہ سوال کر لو، شاید اس سال کے بعد میں تم لوگوں سے اس طرح کی ملاقات نہ کر سکوں".
گویا حضور صلی الله عليہ وسلم خود بھی الوداع کہہ رہے تھے، سو اسی مناسبت سے اس حج کو" حجۃ الوداع " کہتے ہیں۔