سوال: میں بیس سال کی لڑکی ہوں، میں نے گناہوں سے بچنے کے لیے ایک لڑکے کے ساتھ نکاح کیا، جس میں میرا ولی موجود نہیں تھا اور نکاح کے وقت لڑکا دو گواہوں کے ساتھ تھا، جبکہ میں الگ جگہ موجود تھی اور دو گواہوں میں سے ایک گواہ نے نکاح پڑھا اور فون پر مجھ سے پوچھا کہ مجھے اس لڑکے کے ساتھ نکاح قبول ہے، جبکہ میں دونوں گواہ کو جانتی بھی نہیں تھی اور نہ میں نے ان گواہوں سے کبھی بات کی اور نہ ہی کبھی انہیں دیکھا، کیا میرا نکاح ہو گیا یا نہیں؟

جواب: واضح رہے کہ نکاح کے درست ہونے کے لیے ضروری ہے کہ لڑکا لڑکی یا تو خود مجلس نکاح میں حاضر ہو کر گواہوں کے سامنے ایجاب و قبول کرلیں یا ہر ایک کا وکیل مجلس میں حاضر ہوکر اس کی طرف سے ایجاب یا قبول کرلے، نیز یہ بھی ضروری ہے کہ ایجاب وقبول دونوں ایک ہی مجلس میں ہوں، لہذا اس اصول کی روشنی میں آپ کا نکاح منعقد نہیں ہوا، کیونکہ مذکورہ صورت میں لڑکا اگرچہ مجلس نکاح میں موجود تھا، لیکن آپ (لڑکی) مجلس میں موجود نہیں تھی، بلکہ فون پر تھی اور فون والی مجلس الگ مجلس شمار ہوتی ہے، نیز مجلس نکاح میں آپ نے اپنی طرف سے کسی کو وکیل بناکر بھی نہیں بھیجا، جو آپ کی طرف سے قبول کہتا۔ اور چونکہ آپ کا نکاح نہیں ہوا ہے، اس لیے آپ دونوں ایک دوسرے کے لیے بالکل اجنبی ہیں اور آپ کا آپس میں کسی بھی قسم کا دوستانہ تعلق رکھنا اور بے تکلفانہ گفتگو کرنا شرعا ناجائز ہے، اس سے بچنا لازم ہے اور اب تک جو کچھ ہوا ہے، اس پر توبہ و استغفار ضروری ہے، تاہم گناہ سے بچنے کا آسان طریقہ یہ ہے کہ اپنے بڑوں کو آگاہ کرکے ان کی سرپرستی میں شرعی طریقے کے مطابق نکاح کے بندھن میں بندھ جائیں اور بڑوں کو بھی چاہیے کہ مناسب جگہ نکاح کرادیں۔