سوال: مفتی صاحب! اس حدیث کی تحقیق درکار ہے۔ حضرت ابوذر ‌رضی ‌اللہ ‌عنہ نے بیان کیا: میں ایک دن نبی کریم ‌ﷺ کے پہلو بہ پہلو آپ ﷺ کے گھر کی طرف جا رہا تھا کہ میں نے آپ ﷺ کو یہ فرماتے ہوئے سنا: دجال کے علاوہ بھی ایک فتنہ ہے، جس کا مجھے اپنی امت پر دجال سے بھی زیادہ اندیشہ ہے۔" جب میں اس بات سے ڈرا کہ آپ ﷺ تو اپنے گھر میں داخل ہونے لگے ہیں تو میں نے کہا: اے اللہ کے رسول ﷺ! آپ ﷺ اپنی امت پر دجال سے بھی زیادہ کس بات کا اندیشہ رکھتے ہیں؟ تو آپ ﷺ نے فرمایا: "گمراہ کرنے والے قائدین کا۔" (مسند احمد، حدیث نمبر: 12073)

جواب: سوال میں ذکرکردہ روایت ’’صحیح لغیرہ‘‘ ہے، لہذا اس کو بیان کیا جاسکتا ہے۔ ذیل میں اس روایت کا ترجمہ، تخریج اور اسنادی حیثیت ذکر کی جاتی ہے:
ترجمہ:
حضرت ابوتمیم جیشانی رحمہ اللہ سے مروی ہے کہ میں نے حضرت ابوذر ‌رضی ‌اللہ ‌عنہ کو یہ کہتے ہوئے سنا کہ میں ایک دن نبی کریم ﷺ کے پہلو بہ پہلو آپ ﷺ کے گھر کی طرف جا رہا تھا کہ میں نے آپ ﷺ کو یہ فرماتے ہوئے سنا:’’دجال کے علاوہ بھی ایک فتنہ ہے، جس کا مجھے اپنی امت پر دجال سے بھی زیادہ اندیشہ ہے۔‘‘جب میں اس بات سے ڈرا کہ آپ ﷺ تو اپنے گھر میں داخل ہونے لگے ہیں تو میں نے کہا:اللہ کے رسول ﷺ! آپ ﷺ اپنی امت پر دجال سے بھی زیادہ کس بات کا اندیشہ رکھتے ہیں؟ آپ ﷺ نے فرمایا: ’’گمراہ کرنے والے قائدین کا۔‘‘ (مسند احمد، حدیث نمبر:21297)

تخریج الحدیث:
1) سوال میں ذکرکردہ اس روایت کو امام احمد بن حنبل (م241ھ) نے ’’مسند احمد‘‘ (222/35، رقم الحدیث:21297، ط:مؤسسۃ الرسالۃ) میں نقل کیا ہے۔
۲) محدث ابن عبدالحکیم (م۲۵۷ھ) نے ’’فتوح مصر‘‘ (ص:316، ط:مکتبۃ الثقافۃ الدینیۃ) میں نقل کیا ہے۔
مذکورہ روایت کی اسنادی حیثیت:
حافظ زین الدین عراقی (م806ھ) اس روایت کے بارے میں فرماتے ہیں: امام احمد نے اس روایت کو جید سند سے نقل کیا ہے۔
علامہ ہیثمی (م807ھ) فرماتے ہیں: اس روایت کو امام احمد نے نقل کیا ہے، اس میں ’’ابن ‌لهيعة‘‘(راوی) ہے، اس کی حدیث حسن ہے، اس راوی میں ضعف ہے اور اس روایت کے باقی رواۃ ثقہ ہیں۔
اس روایت کی سند میں ایک راوی ’’ابن ‌لهيعة‘‘ ہیں، جن کو محدثین کرام نے مختلف فیہ راوی قراردیا ہے، یعنی ان کے ثقہ اور ضعیف ہونے میں محدثین کرام کا اختلاف ہے۔
حافظ ابن شاہین (م385ھ) نے ’’ابن ‌لهيعة‘‘ کو مختلف فیہ رواۃ میں شمار کیا ہے۔ علامہ زبیدی (م1205ھ) حافظ عراقی کے حوالے سے لکھتے ہیں کہ انہوں نے فرمایا کہ ’’ابن ‌لهيعة‘‘ مختلف فیہ راوی ہیں۔
اور مختلف فیہ راوی کی روایت ’’حسن لذاتہ‘‘ درجے کی ہوتی ہے، بشرطیکہ کسی امام نے اس راوی پر جرح مفسّرنہ کی ہو اور جب اس روایت کے شواہد مل جائیں تو وہ روایت تقویت ملنے کی وجہ سے ’’صحیح لغیرہ‘‘کے درجے تک پہنچ جاتی ہے، چونکہ سوال میں ذکرکردہ روایت کے بھی شواہد موجود ہیں، اس لیے یہ روایت ’’صحیح لغیرہ‘‘ ہوگی۔
مذکورہ روایت کے شواہد:
۱) حضرت ثوبان رضی اللہ عنہ سے مروی ہے کہ نبی کریم ﷺ نے فرمایا مجھے اپنی امت کے متعلق گمراہ کن ائمہ سے اندیشہ ہے۔ (مسند احمد ،حدیث نمبر:22393)
۲) حضرت عمر رضی اللہ عنہ نے عمیر بن سعید کو حمص کا گورنر مقرر فرما رکھا تھا، ایک مرتبہ سیدنا عمر رضی اللہ عنہ نے ان سے فرمایا: میں تم سے ایک سوال پوچھتا ہوں، مجھ سے کچھ نہ چھپانا، انہوں نے عرض کیا کہ مجھے جس چیز کا علم ہو گا، اسے نہیں چھپاؤں گا، فرمایا: امت مسلمہ کے حوالے سے تمہیں سب سے زیادہ خطرناک بات کیا معلوم ہوتی ہے؟ عرض کیا: گمراہ کن ائمہ، سیدنا عمر رضی اللہ عنہ نے فرمایا: آپ نے سچ کہا، مجھے یہ بات نبی ﷺنے بتائی تھی۔ (مسند احمد ،حدیث نمبر:293)
۳) حضرت علی رضی اللہ عنہ سے روایت ہے انہوں نے فرمایا کہ ہم حضور ﷺ کے پاس بیٹھے ہوئے تھے اس حال میں آپ ﷺ سوئے ہوئے تھے۔ ہم نے دجال کا تذکرہ کیا تو آپ نیند سے بیدار ہوئے اس حال میں کہ چہرہ سرخ تھا تو آپ ﷺ نے ارشاد فرمایا: دجال کے علاوہ لوگوں سے مجھے تمہارے بارے میں دجال سے زیادہ خوف ہے اور وہ گمراہ کرنے والے ائمہ ہیں۔ (مصنف ابن ابی شیبہ ،حدیث نمبر: 38641)
۴) حضرت شداد بن اوس رضی اللہ عنہ سے مروی ہے کہ ایک مرتبہ نبی ﷺ نے ارشاد فرمایا: ”اللہ تعالیٰ نے میرے لئے زمین کو سمیٹ دیا حتی کہ میں نے اس کے مشرق و مغرب سب کو دیکھ لیا، اور میری امت کی حکومت وہاں تک پہنچ کر رہے گی جہاں تک کی زمین میرے لئے سمیٹی گئی تھی، مجھے سفید اور سرخ دو خزانے دیے گئے ہیں، میں نے اپنے پروردگار سے درخواست کی ہے کہ وہ میری امت کو عام قحط سے ہلاک نہ کرے، کسی ایسے دشمن کو ان پر مسلط نہ کرے جو انہیں مکمل تباہ و برباد کر دے اور انہیں مختلف گروہوں میں تقسیم کر کے ایک دوسرے سے مزہ نہ چکھائے تو پروردگار عالم نے فرمایا: اے محمد! میں ایک فیصلہ کر چکا ہوں جسے ٹالا نہیں جا سکتا، میں آپ کی امت کے حق میں یہ درخواست قبول کرتا ہوں کہ انہیں عام قحط سے ہلاک نہ کروں گا اور ان پر کسی ایسے دشمن کو مسلط نہیں کروں گا جو ان سب کو مکمل تباہ و برباد کر دے، بلکہ وہ خود ہی ایک دوسرے کو ہلاک اور قتل کریں گے اور ایک دوسرے کو قید کریں گے۔“ اور نبی ﷺ نے فرمایا کہ مجھے اپنی امت پر گمراہ کرنے والے ائمہ سے خوف آتا ہے، جب میری امت میں ایک مرتبہ تلوار رکھ دی جائے گی (جنگ چھڑ جائے گی) تو قیامت تک اٹھائی نہیں جائے گی۔ (مسنداحمد،حدیث نمبر: 17115)
۵) حضرت ابودردا رضی اللہ عنہ سے مروی ہے کہ نبی ﷺ نے ہمیں بتاتے ہوئے ارشاد فرمایا کہ مجھے تمہارے متعلق سب سے زیادہ اندیشہ گمراہ کن حکمرانوں سے ہے۔ (مسنداحمد،حدیث نمبر: 27485)
۶) حضرت ابو امامہ رضی اللہ عنہ بیان کرتے ہیں کہ حضورﷺ نے فرمایا: مجھے اپنی امت پر بھوک کی وجہ سے مرنے کا خوف نہیں ہے نہ دشمن کے غالب آنے کا، لیکن مجھے اپنی اُمت پر گمراہ کن ائمہ (حکمرانوں) کا خوف ہے، اگر ان کی بات مانی جائے گی تو وہ لوگوں کو فتنہ میں مبتلا کریں گے اور اگر ان کی نافرمانی کریں گے تو وہ قتل کریں گے۔ (المعجم الکبیر،حدیث نمبر:7653)
خلاصۂ کلام:
سوال میں ذکرکردہ روایت راوی ’’ابن ‌لهيعة‘‘ کے ضعف کی وجہ سے ’’حسن ‘‘درجے کی ہے، لیکن شواہد اور متابعات کے ملنے سے اس کو ایک درجہ تقویت مل گئی ہے اور صحیح لغیرہ کے درجے تک پہنچ گئی ہے، لہذا یہ روایت ’’صحیح لغیرہ‘‘ ہے، اس کو بیان کیا جاسکتا ہے۔