سوال: ہماری مسجد میں دوسری منزل پر مکتب ہے جو کہ مسجد سے الگ ہے۔ مسجد اور مکتب کے درمیان لکڑی کا بورڈ لگا ہوا ہے، اب طلبہ وہاں جماعت سے نماز ادا کرتے ہیں، کیا یہ درست ہے؟ اس عمل سے بالکل بھی فتنہ پھیلنے کا کوئی اندیشہ نہیں ہے؟

جواب: پوچھی گئی صورت کے جواب سے پہلے یہ سمجھنا ضروری ہے کہ جو زمین مسجد کے لیے مختص کر کے وقف کر دى جائے تو وہ جگہ تا قیامت زمین کى تہہ سے لے کر اوپر آسمان تک مسجد ہی کے حکم میں ہوتی ہے، لہذا اسے مسجد ہی کے کاموں میں ہی استعمال کرنا چاہیے، مسجد کے احاطے میں مستقل طور پر ایسا مکتب یا مدرسہ قائم کرنا کہ جس سے مسجد کے کام مثلاً نماز وغیرہ متاثر ہو، ایسا کرنا درست نہیں ہے، پوچھى گئى صورت میں مسجد کى دوسرى منزل پر جو مکتب قائم ہے، اگر وہ مسجد بن جانے کے بعد بنایا گیا ہے تو اس کی حیثیت عارضی طور پر قائم کیے گئے مکتب کی ہوگی، وہ مستقل مکتب یا مدرسہ نہیں کہلائے گا، فقہاء کرام نے بلا ضرورت مسجد کے احاطے میں بچوں کی تعلیمِ قرآن کے لیے مستقل مکتب قائم کرنے کو مکروہ قرار دیا ہے، وجہ اس کی یہ ہے کہ اس میں بچوں کی آمد ورفت، کھیل کود، شور شرابہ اور صفائی ستھرائی وغیرہ جیسے مسائل کی وجہ سے مسجد کے احترام اور آداب کی پامالی ہوتی ہے۔
لہذا بہتر یہ ہے کہ مسجد کی حدود سے باہر مسجد کے متصل کسی کمرے یا ہال وغیرہ میں مکتب قائم کیا جائے، اس میں بچوں کو قرآنِ کریم کی تعلیم دی جائے، تاکہ مسجد کا تقدس پامال نہ ہو۔ البتہ جہاں مجبوری ہو، مکتب کے لیے متبادل جگہ کا انتظام کرنے میں دشواری ہو تو ایسی مجبوری کی صورتحال کے پیشِ نظر فقہاء کرام نے مسجد میں بچوں کو قرآن کریم کی تعلیم دینے کی اجازت دی ہے، البتہ اس میں مسجد کے احترام وتقدس اور صفائی ستھرائی کا خاص اہتمام کیا جائے، یہ اجازت متبادل جگہ کے فراہم ہو جانے تک ہوگی، جیسے ہی مکتب کے لیے متبادل جگہ میسر آجائے تو بچوں کی تعلیم کو وہاں منتقل کر دیا جائے۔
صورت مسئولہ میں اصل حکم تو یہی ہے کہ جب تک مسجد کی نچلی منزل میں جگہ ہو تو بلا ضرورت اوپر کی منزل پر جماعت کی نماز میں اقتداء کرنا مکروہ ہے، لیکن اگر عذر ہو تو بلا کراہت جائز ہے، لہذا مذکورہ صورت میں اگر بچوں کی تربیت اور نگرانی کی غرض سے انہیں مسجد کی دوسری منزل میں نماز پڑھوائی جائے تو اس کی گنجائش ہے، بشرطیکہ بچے سمجھ دار ہوں، پاکی اور ناپاکی کا شعور رکھتے ہوں۔