سوال: مفتی صاحب! نماز کے فرائض اور واجبات بتادیں۔

جواب: (1) واضح رہے کہ نماز شروع کرنے سے پہلے سات شرائط کا اہتمام کرنا ضروری ہے، اس کے بغیر نماز نہیں ہوگی، ان کو نماز کی شرائط اور خارجی فرائض بھی کہا جاتا ہے۔ ایسی شرائط سات ہیں:
(1) بدن کا پاک ہونا (2) کپڑے کا پاک ہونا (3) جگہ کا پاک ہونا (4) ستر ڈھانکنا (5) قبلہ رخ ہونا (6) وقت ہونا (7) نیت کرنا۔
نماز میں چھ چیزیں فرض ہیں: (1) نیت باندھتے وقت تکبیر تحریمہ یعنی اللہ اکبر کہنا (2) قیام کرنا (3) قراءت کرنا (4) رکوع کرنا (5) سجدہ کرنا (6) قعدہ اخیرہ میں تشھد کے بقدر بیٹھنا۔
(2) نماز میں چودہ چیزیں واجب ہیں:
(1) فرض نماز میں قراءت کے لیے پہلی دو رکعتوں کو متعین کرنا (2) فرض نماز کی تیسری اور چوتھی رکعت کے علاوہ ہر نماز کی ہر رکعت میں سورہ فاتحہ پڑھنا (3) فرض نماز کی آخری دو رکعتوں کے علاوہ باقی تمام نمازوں کی ہر رکعت میں سورہ فاتحہ کے بعد ایک سورت یا کم از کم تین چھوٹی آیات یا اس مقدار کے برابر ایک بڑی آیت پڑھنا (4) سورہ فاتحہ کو سورت سے پہلے پڑھنا (5) قومہ یعنی رکوع کے بعد سیدھا کھڑا ہونا (6) جلسہ یعنی دو سجدوں کے درمیان بیٹھنا (7) تعدیلِ ارکان یعنی رکوع، سجدہ، قومہ اور جلسہ اطمینان سے ادا کرنا (8) تین اور چار رکعتوں والی نماز میں قعدہ اولیٰ کرنا (9) قعدہ اولیٰ اور قعدہ اخیرہ دونوں میں تشہد پڑھنا (10) قیام، قراءت، رکوع اور سجدے میں ترتیب کا لحاظ رکھنا (11) امام کا فجر کی دونوں رکعتوں، مغرب اور عشاء کی پہلی دونوں رکعتوں، جمعہ، عیدین، تراویح کی تمام رکعتوں اور رمضان کے وتر میں بلند آواز سے قراءت کرنا اور سری نمازوں (ظہر اور عصر) میں آہستہ قراءت کرنا (12) وتر میں تکبیر تحریمہ کہہ کر دعائے قنوت پڑھنا (13) عیدین کی نماز میں چھ زائد تکبیریں کہنا (14) لفظِ سلام کے ساتھ نماز سے نکلنا۔