سوال: ہمارے ہاں ایک شخص جمعہ کو وعظ کہنے آتے ہیں اور وہ دوسری مسجد کے مؤذن بھی ہیں تو وہ وعظ کہہ کر اپنی مسجد چلے جاتے ہیں آج ہمارے امام صاحب جو خطبہ کہتے ہیں لیٹ ہوگئے تو وہ صاحب خطبہ دینے کی غرض سے رک گئے لیکن جیسے دوسری اذان مکمل ہوئی تو امام صاحب پہنچ گئے اور وہ صاحب اذان اور خطبہ کے درمیان اپنی مسجد چلے گئے کیا ان کا یہ جانا درست ہے؟ ہم نے سنا ہے کہ اذان کے بعد مسجد سے نکلنا مکروہ تحریمی یے

جواب: واضح رہے کہ اذان کے بعد مسجد سے نکلنا عام حالات میں مکروہِ تحریمی ہے، لیکن کسی حاجت یا ضرورت کے لئے نکلنا پڑے تو بلا کراہت جائز ہے، لہٰذا پوچھی گئی صورت میں مذکورہ خطیب چونکہ دوسری مسجد میں مؤذن ہے، اس لیے اپنی مسجد میں اذان کی غرض سے مسجد سے نکلتا ہے تو یہ بلا کراہت جائز ہے، اس میں کوئی حرج نہیں، تاہم لوگوں کی بدگمانی سے بچنے کے لیے بہتر یہی ہے کہ ایسا شخص بیان ختم ہونے کے بعد اذان شروع ہونے سے پہلے پہلے مسجد سے نکل جائے۔