سوال: مفتی صاحب! "جزی اللہ عنا محمدا ﷺ ما ھو اھله" درود شریف کی فضیلت کے بارے میں پڑھا ہے کہ ستر فرشتے ایک ہزار دن تک اس کا ثواب لکھتے لکھتے تھک جاتے ہیں۔ (الذھبی، میزان الاعتدال 291/4) براہ کرم اس کی تصدیق فرمادیں۔

جواب: سوال میں مذکور درود شریف کے الفاظ: "جزى الله عنا محمداً صلى الله عليه وسلم ما هو أهله" (اللہ ہماری جانب سے محمد ﷺ کو ان کی شایانِ شان بدلہ عطا فرمائے) کى فضیلت حدیث سے ثابت ہے، حضرت عبد اللہ بن عباس رضی اللہ عنہما سے یہ حدیث تین سندوں سے مروى ہے، ان سندوں میں ضعیف راوى ہیں، لیکن وہ شدید ضعیف نہیں ہیں، چنانچہ اس حدیث کى اسانید کے مجموعے سے اس کے ضعف میں تخفیف ہو جائے گى اور ایسى روایت جو کہ شدید ضعیف نہ ہو، فضائل کے باب میں محدثین کے نزدیک معتبر ہوتى ہے۔
ذیل میں اس حدیث کى تخریج اور اس پر محدثین کا کلام نقل کیا جاتا ہے:
حضرت عبداللہ بن عباس رضی اللہ عنہما سے یہ حدیث تین مختلف راویوں کى سند سے "معاویۃ بن صالح" کے طریق سے مروى ہے، ذیل میں ان تینوں اسانید کى تخریج اور ان کى اسنادى حیثیت بیان کى جاتى ہے:
(الف) تخریج الحدیث:
اس حدیث کو مندرجہ ذیل کتبِ ِاحادیث میں "ہانی بن متوکل" کى سند سے روایت کیا گیا ہے:
1) امام طبرانی رحمہ اللہ (م 360ھ) نے اپنى کتاب "المعجم الأوسط" (1/ 82، رقم الحديث (235)، ط: دار الحرمين-القاهرة)میں نقل کیا ہے۔
2) امام طبرانی رحمہ اللہ (م 360ھ) نے اپنى کتاب "المعجم الكبير" (11/ 206، رقم الحديث: (11509)، ط: مكتبة ابن تيمية-القاهرة) میں نقل کیا ہے۔
3) امام طبرانی رحمہ اللہ (م 360ھ) نے اپنى کتاب "مسند الشاميين " (3/ 196، رقم الحديث (2070)، ط: مؤسسة الرسالة) میں نقل کیا ہے۔
4) امام ابو نعيم رحمہ اللہ (م 430 ھ) نے اپنى کتاب "حلية الأولياء" (3/ 206، ط: مطبعة السعادة) میں نقل کیا ہے۔
5) امام ابو نعيم رحمہ اللہ (م 430 ھ) نے اپنى کتاب "تاريخ أصبهان" (2/ 276، ط: دار الكتب العلمية) میں نقل کیا ہے۔
6) خطيب بغدادى رحمہ اللہ (م 463ھ) نے اپنى کتاب "تاريخ بغداد" (ترجمة خازم بن يحيى بن إسحاق، 9/ 295، ط: دار الغرب الإسلامي) میں نقل کیا ہے۔
7) ابو الحسن الخلعی رحمہ اللہ (م 492 ھ) نے اپنى کتاب "الفوائد المنتقاة الحسان (الخلعيات -برواية السعدي)"(2/ 153 ، رقم الحديث (811)، ط: الكتاب مخطوط) میں نقل کیا ہے۔
8) ابو طاهر السِّلَفي (م 576ھ) نے اپنى کتاب " المشيخة البغدادية" (17/ 4 ، رقم الحديث (17)، الكتاب مخطوط) میں نقل کیا ہے۔
مذکورہ بالا سند کے متعلق محدثین کا کلام:
1) اس حدیث کو حافظ منذری رحمہ اللہ (م 656ھ) نے اپنى کتاب "الترغیب والترھیب" (2/ 329، طبع: دار الکتب العلمیۃ) میں امام طبرانی رحمہ اللہ کى "المعجم الکبیر " اور "المعجم الأوسط" کے حوالے سے (بصیغہ تمریض) نقل کر کے اس حدیث کے ضعیف ہونے کى طرف اشارہ کیا ہے"۔
2) حافظ نور الدین الھیثمی رحمہ اللہ (م 807ھ) نے اپنى کتاب "مجمع الزوائد" (10/163، رقم الحدیث (17305) میں نقل کر کے فرمایا ہے: "اس حدیث کو طبرانی نے "المعجم الکبیر والمعجم الأوسط" میں روایت کیا ہے اور اس میں راوى "ہانی بن المتوکل" ہے اور وہ ضعیف ہے"۔
3) حافظ سخاوی رحمہ اللہ (م 902ھ) نے اپنى مشہور ومقبول کتاب "القول البدیع" ص 52، طبع: دار الریان، میں اس حدیث کو نقل کر کے فرمایا ہے: "اس حدیث کو روایت کیا ہے ابو نعیم نے "حلیۃ" میں، ابن شاہین نے "الترغیب" میں ، ابو الشیخ اور خلعی نے اپنى کتاب "فوائد" میں، طبرانی نے "المعجم الکبیر والمعجم الأسط" میں، ابن بشکوال نے اور رشید العطار نے (رحمہم اللہ) نے روایت کیا ہے اور اس حدیث کى سند میں "ہانی بن المتوکل" ہے، وہ ضعیف ہے"۔
لہذا یہ سند "ہانی بن متوکل" کى وجہ سے ضعیف ہے۔
(ب) تخریج الحدیث:
اس حدیث کو مندرجہ ذیل کتبِ ِاحادیث میں "رشدین بن سعد" کى سند سے روایت کیا گیا ہے:
1) قاضی ابو بکر وکیع رحمہ اللہ (م306ھ) نے اپنى کتاب "أخبار القضاة " (3/ 273، ط: المكتبة التجارية الكبرى) میں نقل کیا ہے۔
2) حافظ اسماعيل الأصبهانی رحمہ اللہ (م 535ھ) نے اپنى کتاب "الترغيب والترهيب" (‌‌باب الترغيب في الصلاة على النبي صلى الله عليه وسلم/ فصل، 2/ 331، رقم الحديث (1700)، ط: دار الحديث –القاهرة) میں نقل کیا ہے۔
مذکورہ بالا حدیث کے راوی"رشدین بن سعد" پر محدثین کا کلام:
1) اس حدیث میں راوی "رشدین بن سعد" ہے، اس کے متعلق حافظ ذہبى رحمہ اللہ (م 748ھ) نے اپنى کتاب "الكاشف" (1/ 396 ،(1575)، طبع: دار القبلة) میں فرمایا ہے: رشدین بن سعد ابو الحجاج المھری نے یونس بن یزید اور زھرۃ بن معبد سے روایت کرتے ہیں اور ان سے احمد بن السرح اور عیسى بن مثرود روایت کرتے ہیں، امام ابوزرعہ نے فرمایا ہے: وہ ضعیف ہیں، ان کى وفات سن 188 میں ہوئى ہے، وہ نیک اور عبادت گزار تھے، محدث تھے، البتہ ان کا حافظ ٹھیک نہیں تھا۔
2) حافظ ذہبى رحمہ اللہ (م 748ھ) نے اپنى کتاب "تذهيب تهذيب الكمال" (3/ 244، (1938)، طبع: الفاروق الحديثةللطباعة) میں "رشدین بن سعد" کے تذکرے میں فرمایا ہے: "امام احمد بن حنبل رحمہ اللہ (م 241ھ) نے فرمایا: "رشدين" جن سے روایت نقل کرتے ہیں، ان کے متعلق چھان بین نہیں کرتے ہیں لیکن وہ خود نیک آدمى ہیں اور ان سے مروى وہ روایات جو زہد وتقوى وغیرہ کے متعلق ہیں ان کو نقل کرنے میں کوئى حرج نہیں ہے، نیز یہ بھى فرمایا: میرا خیال ہے کہ وہ صالح الحدیث ہیں (ان کى روایت قابل قبول ہیں) امام یحى بن معین رحمہ اللہ نے ان کے متعلق فرمایا ہے: وہ کوئى قابل اعتبار شخصیت نہیں ہیں۔ ابو زرعہ نے فرمایا ہے: وہ ضعیف ہیں اور جوزجانی نے فرمایا ہے: رشدین بن سعد کے پاس بہت سى عجیب وغریب روایات ہوتى ہیں۔ اور ابن یونس نے ان کے متعلق فرمایا ہے: ان کى ولادت سن 110 ہجرى میں ہوئى ہے اور ان کى وفات سن 188 ہجرى میں ہوئى ہے، وہ نیک صالح شخص تھے، ان کے نیک سیرت ہونے میں کوئى شبہ نہیں ہے، البتہ ان کو نیک لوگوں کى سى بھول بھلیاں ہو گئیں تھیں، جس وجہ سے انہیں حدیث میں خلط ہوا ہے"۔
3) حافظ سخاوی رحمہ اللہ (م 902ھ) نے اپنى کتاب"القول البديع" ( ص52، طبع: دار الريان) میں رشدین بن سعد کى روایت کے متعلق فرمایاہے: "اس روایت کو ابو القاسم التیمی نے اپنى "الترغیب" میں، ان کى سند سے ابن عساکر نے اور انہى کے طریق سے ابوالیمن نے اس روایت کو ہانی بن المتوکل کى سند کے علاوہ سے نقل کیا ہے، لیکن اس سند میں رشدین بن سعد ہے اور وہ بھى ضعیف ہے"۔
لہذا یہ سند بھى "رشدین بن سعد" کى وجہ سےضعیف ہے۔
(ج) تخریج الحدیث:
اس حدیث کى ایک تیسرى سند بھى ہے، جو کہ حافظ سخاوی رحمہ اللہ (م 902ھ) نے اپنى کتاب "القول البديع" ( ص52، طبع: دار الريان) میں ذکر فرمائى ہے، وہ سند "احمد بن حماد" کی ہے، ان کے متعلق فرمایا ہے: یہ "احمد بن حماد" معاویۃ بن صالح سے اس حدیث کو روایت کرتے ہیں، لیکن ان کے احوال کا علم نہیں ہوسکا ہے"۔
لہذا اس حدیث میں راوی مجہول ہے، اس وجہ سے یہ حدیث ضعیف ہے۔
نیز حافظ سخاوی رحمہ اللہ نے زیر بحث حدیث کى مذکورہ بالا تین اسانید نقل کرنے کے بعد فرمایا ہے کہ یہ تینوں اسانید "معاویہ بن صالح" کے طریق سے یہ روایت نقل کرتى ہیں، چنانچہ یہ حدیث "معاویۃ بن صالح" کے طریق سے درجہ شہرت کو پہنچی ہوئی ہے۔
خلاصہ بحث:
درود شریف کے الفاظ: "جزى الله عنا محمداً صلى الله عليه وسلم ما هو أهله" اگرچہ ضعیف حدیث سے ثابت ہیں، لیکن یہ ضعیف حدیث متعدد طرق سے مروى ہے، نیز اس حدیث کے بعض شواھد بھی موجود ہیں، اگرچہ وہ بھی ضعیف ہیں، اس لیے اس کے ضعف میں تخفیف ہوگئى ہے اور ایسى ضعیف حدیث فضائل میں محدثین کے نزدیک معتبر ہوتى ہے، لہذا اس درود شریف کى فضیلت کے حصول کے لیے اس کا پڑھنا نہ صرف جائز ہے، بلکہ سعادت کے حصول کا ذریعہ ہے کہ آنحضرت صلى اللہ علیہ وسلم کے امت مسلمہ پر جو احسانات وانعامات ہیں، ان کے شکریہ ہمارے بس میں تو ہے ہى نہیں، سوائے اس کے کہ ہم اللہ تعالى سے درخواست کریں کہ وہ آپ صلى اللہ علیہ وسلم کو ہمارى طرف سے بہترین بدلہ عطا فرمائے۔