سوال: السلام علیکم، مفتی صاحب! برائے مہربانی اس حدیث کا حوالہ کی تصدیق فرما دیں کہ "نماز میں لمبا قیام کرنا موت کی تکالیف کو ہٹا دیتا ہے۔ (مسند الفردوس)

جواب: سوال میں ذکر کردہ روایت سند کے اعتبار سے "شدید ضعیف" ہے، لہذا احتیاط کا تقاضہ یہ ہے کہ اس حدیث کی نسبت جناب رسول اللہ ﷺ کی طرف کرنے سے اجتناب کیا جائے۔
ذیل میں اس روایت کا ترجمہ، تخریج اور اسنادی حیثیت ذکر کی جاتی ہے:
ترجمہ:
حضرت ابوہریرہ رضی اللہ عنہ سے مروی ہے کہ جناب رسول اللہ ﷺ نے ارشاد فرمایا: نماز میں لمبا قیام کرنا موت کی تکالیف کو کم کردیتا ہے۔ (تاریخ اصفہان:124/1،الرقم:47،ط:دارالکتب العلمیۃ)
تخریج الحدیث:
۱۔اس روایت کو امام ابونعیم اصفہانی (م430ھ) نے’’تاریخ اصفہان‘‘ (124/1، الرقم:47، ط:دارالکتب العلمیۃ) میں نقل کیا ہے۔
۲۔اس روایت کو ابو منصور الدیلمی رحمہ اللّٰہ (م 558ھ) نے ’’مسند الفردوس‘‘ میں نقل کیا ہے، چنانچہ حافظ ابن حجر عسقلانی رحمہ اللّٰہ (م 852 ھ) نے ’’الغرائب الملتقطۃ‘‘ (602/5،رقم الحديث:1954،ط:جمعية دارالبر) میں ’’مسند الفردوس‘‘ کے حوالے سے نقل کی ہے۔
مذکورہ روایت کی اسنادی حیثیت:
مذکورہ روایت کی سند میں بعض رواۃ مجہول ہیں اور ایک راوی ’’أحمد بن محمد بن عمر اليمامي‘‘ کے بارے میں محدثین کرام نے سخت جرح کی ہے۔
امام ابوحاتم رازی(م327ھ)فرماتے ہیں: یہ جھوٹا ہے، میں نے ان سے احادیث لکھی تھی اور میں ان سے کچھ بیان نہیں کرتا۔
امام ابن عدی (م365ھ) فرماتے ہیں کہ یہ ثقات سے منکر روایات بیان کرتا ہے۔
امام دارقطنی (م385ھ) فرماتے ہیں کہ یہ متروک الحدیث ہے۔
مذکورہ روایت کا شاہد:
حافظ ابن ابی الدنیا(م281ھ) نے’’ كتاب التهجد وقيام الليل‘‘ (518/1، رقم الحدیث:517، ط:مکتبۃ الرشد) میں ’’محمد بن منکدر‘‘سے مرسلاً نقل کیا ہے، لیکن اس روایت کی سند میں راوی ’’محمد بن ابی حميد ابوابراہیم‘‘ راوی پر سخت کلام کیا گیا ہے۔
امام ابوحاتم رازی نے ان کو منکرالحدیث کہا ہے۔
امام بخاری (م256ھ) نے بھی ان کو منکر الحدیث کہا ہے۔
امام ترمذی (م279ھ) نے ’’سنن ترمذی ‘‘ میں ان کا ذکر کر کے کہیں کہا کہ ان کی تضعیف کی گئی ہے اور کہیں یوں نقد کیا کہ منکر الحدیث اور کہیں کہا کہ محدثین کے ہاں یہ روای قوی نہیں ہے۔
امام ابن حبان (م354ھ) فرماتے ہیں: وہ مغفل تھا اور اسناد کو تبدیل کردیتا اور نہیں سمجھتا تھا اور اس کے ساتھ متن کو چسپاں کردیتا اور اس کو علم بھی نہ ہوتا، چنانچہ جب یہ بات ان کی روایات میں زیادہ ہوگئی تو ان کی روایت سے استدلال کرنا باطل ہوگیا۔
اس تفصیل سے معلوم ہوا کہ ’’محمد بن ابی حميد‘‘ پر محدثین کرام نے سخت جرح کی ہے۔
خلاصۂ کلام:
سوال میں ذکر کردہ روایت سند میں مجہول اور منکر رواۃ کی وجہ سے شدید ضعیف ہے، اگرچہ اس روایت کا شاہد موجود ہے، لیکن چونکہ وہ بھی سند کے اعتبار شدید ضعیف ہے، اس لیے اس شاہد کی وجہ سے اس روایت کو تقویت نہیں ملے گی، لہذا اس روایت کو آنحضرت صلی اللّٰہ علیہ وسلم کی طرف نسبت کر کے بیان کرنے سے اجتناب کیا جائے۔
تاہم یہ بات واضح رہے کہ لمبے قیام کے ساتھ نماز ادا کرنا افضل ہے، یہ بات صحیح حدیث سے ثابت ہے، حضرت جابر رضی اللہ عنہ سے مروی ہے کہ جناب رسول اللہ ﷺ سے دریافت کیا گیا: کون سی نماز افضل ہے؟ آپ ﷺ نے فرمایا: "لمبے قیام والی نماز" (صحیح مسلم، حدیث نمبر:1769)
لہذا نماز میں لمبا قیام فضیلت کا باعث ہے اور اس کی برکات ضرور حاصل ہوں گی۔