سوال: مفتی صاحب! 120 گز کا مکان ہے، والد صاحب نے تقریباً 40 سال پہلے خریدا تھا، اس کے بعد بڑے بیٹے نے اپنے ذاتی پیسوں سے اس کی تعمیرات کا کام کیا ہے، جس میں ان کے دونوں بھائیوں کی رہائش تھی۔ آج بڑے بھائی سے اس کی بہنیں اس والد کی زمین کا حصہ مانگ رہی ہیں۔
1) سوال یہ ہے کہ زمین کی قیمت 40 سال پہلے کی ہوگی یا آج مقررہ قیمت کے حساب سے تقسیم ہوگی؟
2) شریعت میں پانچ بہنوں اور دو بھائیوں کا حصہ کیا ہوگا؟

جواب: 1) واضح رہے کہ اگر میراث کئی سالوں بعد تقسیم ہو رہی ہو تو اس میں چیزوں کی قیمت کا تعین موجودہ قیمت کے اعتبار سے ہوتا ہے۔
الف) لہذا پوچھی گئی صورت میں اگر بڑے بھائی نے والد صاحب کے مکان میں ان کی اجازت سے اپنے لیے تعمیرات کروائی تھی یا والد صاحب کے انتقال کے بعد تمام ورثاء کی اجازت سے اپنے لیے تعمیرات کروائی تھی تو اس صورت میں بڑے بھائی نے جتنی رقم اور اخراجات مکان کی تعمیرات میں کیے تھے، وہ ان کو ملیں گے۔
ب) اور اگر بڑے بھائی نے تمام ورثاء کی اجازت لیے بغیر سب کے لیے یہ تعمیرات کروائی تھی تو اس صورت میں تعمیر میں لگائی گئی یہ رقم اور اخراجات بڑے بھائی کی طرف سے تبرع و احسان ہوں گے اور ان کو تعمیرات پر لگائی ہوئی رقم اور اخراجات نہیں ملیں گے۔
ج) اگر یہ تعمیرات ورثاء کی اجازت کے بغیر بڑے بھائی نے اپنے لیے کی تھی تو ان کو اپنی تعمیر کردہ عمارت کے بدلہ میں صرف اس عمارت کے ملبے کی قیمت ملے گی۔
2) مرحوم کی تجہیز و تکفین کے جائز اور متوسط اخراجات، قرض کی ادائیگی اور اگر کسی غیر وارث کے لیے جائز وصیت کی ہو تو ایک تہائی (1/3) میں وصیت نافذ کرنے کے بعد کل جائیداد کو نو (9) حصوں میں تقسیم کیا جائے گا، جس میں سے دونوں بھائیوں میں سے ہر ایک کو دو (2) اور پانچوں بہنوں میں سے ہر ایک کو ایک (1) حصہ ملے گا۔
اگر فیصد کے اعتبار سے تقسیم کریں تو ہر ایک لبھائی کو %22.22 فیصد اور ہر ایک بہن کو %11.11 فیصد حصہ ملے گا۔