سوال: مفتی صاحب! کیا صدقے کی چیز (گوشت، بریانی وغیرہ) امیر وغریب سب کھا سکتے ہیں؟ نیز چونکہ صدقے سے بلائیں ٹلتی ہیں تو کیا صدقہ کھانے والوں کو اس سے نقصان ہوتا ہے؟

جواب: ۱) واضح رہے کہ صدقات کی دوقسمیں ہیں: صدقاتِ واجبہ اور صدقاتِ غیر واجبہ
صدقات واجبہ سے مراد زکوۃ، صدقہ فطر، کفارہ، فدیہ، نذر وغیرہ ہیں، اس کا حکم یہ ہے کہ ہر وہ شخص جو سید نہ ہو اور مستحق زکوۃ ہو، وہ صدقاتِ واجبہ کو کھا سکتا ہے۔ نیز صدقہ دینے والے کے اصول (والدین، دادا، دادی، نانا، نانی وغیرہ)، فروع (بیٹا، بیٹی، پوتا، پوتی، نواسہ، نواسی، وغیرہ) اور شوہر یا بیوی صدقاتِ واجبہ نہیں کھا سکتے ہیں۔
صدقاتِ نافلہ کا حکم یہ ہے کہ اس کو ہر شخص کھا سکتا ہے، خواہ سید ہو یا غیر سید، مالدار ہو یا غریب، صدقہ دینے والے کے قریبی رشتہ دار، اسی طرح صدقہ دینے والا خود بھی اس میں سے کھاسکتا ہے، البتہ اگر کسی وجہ سے صدقہ نکالا جا رہا ہو تو صدقہ کرنے والا اس صدقہ میں سے نہ کھائے اور جو افراد اس کی کفالت میں ہیں ان کو بھی نہ کھلائے، بلکہ اس صورت میں زیادہ بہتر یہ ہے کہ کسی مستحق شخص کو دے دے۔
۲) صدقہ کی چیز کھانے سے کوئی نقصان نہیں ہوتا ہے۔