سوال: مفتی صاحب! کسی سافٹ ویئر ہاؤس میں اگر کسی ملازم کو مجبور کیا جا رہا ہو کہ وہ سودی بینک کے لیے موبائل ایپ بنائے تو ایسی صورت میں ملازم کو کیا کرنا چاہیے؟

جواب: واضح رہے کہ سودی بینک کیلئے ایسی ایپ (App) بنانا جو سودی لین دین اور ناجائز کاموں کے ساتھ خاص ہو، اس کا جائز کاموں میں استعمال ممکن نہ ہو تو ایسا کام کرنا "تعاون علی الاثم" (ناجائز کام میں معاونت) پر مشتمل ہونے کی وجہ سے جائز نہیں، اس سے اجتناب لازم ہے۔
لیکن اگر ایپ (App) ایسی ہو کہ جو سودی لین دین اور ناجائز کاموں کے ساتھ خاص نہ ہو، بلکہ اس کا جائز استعمال بھی ممکن ہو، مثلاً: اس ایپ کے ذریعے اسلامک بینکنگ/ونڈو کے معاملات (transactions) بھی کیے جاسکتے ہوں، اور ایپ (App) بنانے والوں کی طرف سے ناجائز کاموں میں معاونت مقصود نہ ہو تو ایسی ایپ بناکر دینے کی گنجائش ہے، اسے ناجائز کاموں میں استعمال کرنے کی صورت میں استعمال کرنے والے کو اس کا گناہ ہوگا۔
لیکن اگر معاملہ کرتے وقت بینک نے ناجائز مقصد کیلئے بنوانے کی صراحت کردی ہو تو ایسی صورت میں یہ بات معلوم ہونے کے باوجود اسے ایپ (App) بناکر دینا گناہ کے کام میں معاونت کرنا (تعاون علی الاثم) ہے، اور گناہ کے کاموں میں معاونت کرنا ناجائز اور گناہ ہے، لہذا اس سے اجتناب لازم ہے۔