سوال: حضرت ! میز اور کرسی وغیرہ پر کھانا کھا سکتے ہیں یا نہیں؟

جواب: میز یا ٹیبل پر کهانا فی نفسہٖ جائز ہے، شرعا ممنوع نہیں ہے، اسی طرح ٹیبل وغیرہ پر کهانا خلافِ سنت بهی نہیں ہے، کیونکہ خلافِ سنت اس عمل کو کہا جاتا ہے، جو خلافِ سنت ہونے کی بناء پر قابل نکیر ہو اور اس معانی میں خلافِ سنت اس عمل کو کہا جائے گا، جو سنن مؤکدہ کے ترک پر مشتمل ہو، یعنی وہ افعال جو حضور اکرم صلی اللہ علیہ وسلم نے عبادت کے طور پر کیے ہیں اور ان پر مواظبت فرمائی ہے، ان کو چهوڑ کر ان کے خلاف کوئی دوسرا طریقہ اختیار کرنا منکر ہے، لہذا وہ خلافِ سنت کہلائے گا، لیکن سنن غیر مؤکدہ یعنی وہ افعال جو حضور صلی اللہ علیہ وسلم نے عبادت کے طور پر نہیں کیے، بلکہ عادتاً کیے ہیں تو ایسی سنتوں پر بنیت اتباع عمل کرنا بےشک باعثِ ثواب ہے، لیکن ان کا چھوڑنا شرعاً موجبِ کراہت اور قابلِ ملامت نہیں۔
اس لیے ان کے بجائے اگر کوئی اور مباح طریقہ اختیار کیا جائے تو وہ خلافِ سنت نہیں کہلائے گا، دستر خوان بچها کر کهانا حضور اکرم صلی اللہ علیہ وسلم کی سننِ عادیہ میں سے ہے، اس لیے دستر خوان بچها کر زمین پر بیٹھ کر کهانا سنت کے قریب اور باعثِ برکت و سعادت ہے، عام حالات میں بلا عذر اس کو چهوڑنا نہیں چاہیے، لیکن کسی وجہ سے اس طریقہ کو چهوڑ کر کوئی دوسرا مباح طریقہ اختیار کر لیا جائے تو اس کو بھی ناجائز یا مکروہ نہیں کہا جائے گا، کیونکہ حضور اکرم صلی اللہ علیہ وسلم کا کسی چیز کو استعمال نہ کرنا اس کے حرام یا مکروہ ہونے کی دلیل نہیں، جبکہ کوئی دلیل شرعی منع کی موجود نہ ہو، مثلاً: آنحضرت صلی اللہ علیہ وسلم نے کبھی چپاتی تناول نہیں فرمائی، مگر چپاتی کے استعمال کو ممنوع یا خلافِ سنت نہیں کہا جاسکتا، اسی طرح میز ٹیبل پر کهانے کو خلافِ سنت یا مکروہ نہیں کہا جاسکتا ہے۔
یہاں اس بات کی وضاحت بھی مناسب ہے کہ میز یا ٹیبل پر کهانے کے بارے میں عام طور سے یہ کہا جاتا ہے کہ یہ غیروں کا طریقہ ہے، اس میں کفار وفساق کے ساتھ تشبہ پایا جاتا ہے، لیکن یہ بات اس وقت تو درست تھی، جب کهانے کے لیے ٹیبل کا استعمال یہود و نصاریٰ کے ساتھ مخصوص تها، یہی وجہ ہے کہ ہمارے اکابر کے فتاویٰ میں میز وغیرہ کا استعمال ممنوع لکھا ہے، لیکن اب ہمارے زمانے میں اس کا رواج مسلمانوں میں بھی اس قدر عام ہوگیا ہے کہ اب یہ کسی قوم یا مذہب کے ساتھ مخصوص نہیں رہا، اس لیے اب اس کو تشبہ
کی وجہ سے ممنوع نہیں کہہ سکتے، بالخصوص جبکہ میز وغیرہ کے استعمال میں غیروں کے ساتھ مشابہت اختیار کرنا مقصود بهی نہ ہو۔