سوال: کیا نبی کریم ﷺ کھانا کھانے کے بعد ہاتھ چہرے اور پنڈلیوں پر پھیرتے تھے؟

جواب: واضح رہے کہ کھانے کى چیز میں اگر چکناہٹ ہو اور کھانے کے دوران وہ ہاتھوں کو لگ جائے تو کھانے کے بعد اس چکناہٹ کو صاف کرنے کے لیے ہاتھوں کو دھونا مسنون ہے، آنحضرت صلى اللہ علیہ وسلم کى اس سلسلے میں تعلیمات یہ ہیں کہ کھانے کى برکت یہ ہے کہ کھانے سے پہلے اور بعد میں ہاتھوں کو دھویا جائے۔
حضرت سلمان فارسى رضى اللہ عنہ سے مروى ہے کہ آنحضرت صلى اللہ علیہ وسلم نے ارشاد فرمایا ہے: "کھانے کى برکت یہ ہے کہ کھانے سے پہلے اور بعد میں ہاتھوں کو دھویا جائے"۔
(سنن ترمذى: حدیث نمبر: 1846)
حضرت ابو ہریرۃ رضی اللہ عنہ سے مروى ہے کہ آنحضرت صلى اللہ علیہ وسلم نے ارشاد فرمایا: "جو شخص اس حالت میں سو گیا کہ اس کے ہاتھ میں گوشت کى چکناہٹ لگى ہوئى ہے اور اس نے اسے دھویا نہیں ہے، پھر کوئى مضر چیز مثلا: کیڑے مکوڑے نے اسے نقصان پہنچا دیا تو وہ صرف اپنے آپ کو ہى ملامت کرے" (سنن ابو داود: حدیث نمبر: 3852)
مذکورہ بالا احادیث سے یہ معلوم ہوتا ہے کہ ہاتھوں کى چکناہٹ کو دور کرنے کے لیے انہیں دھونے کا حکم دیا گیا ہے، بلکہ آپ صلى اللہ علیہ وسلم نے کھانے کے بعد ہاتھ دھونے کو باعث برکت قرار دیا ہے۔
لہذا کھانے کے بعد ہاتھوں کو چہرے، بازوؤں اور پاؤں پر پھیرنا آنحضرت صلى اللہ علیہ وسلم سے ثابت نہیں ہے۔
ہاں! البتہ صحابہ کرام رضوان اللہ علیہم اجمعین سے اس طرح کا عمل ان کے فقر و تنگدستی کی وجہ سے ثابت ہے، حضرت جابر بن عبد اللہ رضی اللہ عنہما سے مروى ہے: ان سے آگ پر پکى ہوئے کھانے سے متعلق دریافت کیا گیا کہ آیا اس کے بعد وضو کیا جائے گا؟ تو انہوں نے فرمایا: ہمیں رسول اللہ صلى اللہ علیہ وسلم کے زمانے میں اس طرح کا کھانا کم ہى میسر آتا تھا، لہذا جب ہمیں ایسا کھانا میسر آتا تھا، تو ہمارے پاس ہاتھوں کو پونچھنے کے لیے کوئى رومال وغیرہ تو ہوتا نہیں تھا، چنانچہ ہمارے بازو اور ہمارے پاؤں ہى ہمارے لیے رومال کا کام دیتے تھے، ہم اس چکناہٹ کو ہاتھوں اور پاؤں پر مل کر صاف کر کے نماز پڑھ لیا کرتے تھے اور وضو نہیں کرتے تھے (یعنی ہاتھ نہیں دھوتے)۔ (صحیح بخارى: حدیث نمبر: 5457)
اس حدیث سے معلوم ہوتا ہے کہ صحابہ کرام فقر وتنگدستى کى وجہ سے کھانے کى چکناہٹ کو بازوؤں اور پاؤں پر صاف کر لیا کرتے تھے، لیکن یہ عمل آنحضرت صلى اللہ علیہ وسلم سے ثابت نہیں ہے۔
نیز واضح رہے کہ اس سلسلے میں ایک حدیث بیان کی جاتی ہے کہ "آنحضرت صلی اللّٰہ علیہ وسلم کا ہاتھ پونچھنے کا رومال
آپ کے قدموں کے تلوے تھے" اس حدیث کے متعلق حافظ عراقی رحمہ اللّٰہ (م806ھ) نے اپنی کتاب "تخریج أحاديث الإحياء" 3/ 1396 (2112)، ط: دار العاصمة، میں فرمایا ہے: میں نہیں جانتا کہ اس حدیث کو کس نے گھڑا ہے اور اسی طرح علامہ تاج الدین السبکی رحمہ اللّٰہ (م771ھ) نے فرمایا ہے: اس حدیث کی مجھے کوئی سند نہیں ملی ہے۔
لہذا آنحضرت صلی اللّٰہ علیہ وسلم کی طرف ایسی حدیث کی نسبت کرنا درست نہیں ہے۔