سوال: مفتی صاحب! کسی کی شادی ہوئی تو بیوی نے شوہر سے مہر میں فجر کی با جماعت نماز پڑھنے کا مطالبہ کیا اور کہا یہی میرا مہر ہوگا تو کیا ایسا کرنا ٹھیک ہے؟ اور ایک شادی ہوئی ہے جس میں شوہر نے اپنی بیوی کو مہر میں قرآن پاک دیا ہے، ان دونوں طریقوں پر روشنی ڈالیں۔ مہربانی ہوگی۔

جواب: واضح رہے کہ شرعاً حقِ مہر کے لیے مال ہونا ضرورى ہے، ارشاد بارى تعالى ہے: وَأُحِلَّ لَكُمْ مَا وَرَاءَ ذَلِكُمْ أَنْ تَبْتَغُوا بِأَمْوَالِكُمْ
ترجمہ: تمام عورتوں کے بارے میں یہ حلال کر دیا گیا ہے کہ تم اپنا مال (بطور مہر) خرچ کر کے انہیں (اپنے نکاح میں لانا) چاہو"۔ (سورۃ النساء: آیت نمبر: 24)
لہذا جو چیز شرعاً وعرفاً مال بننے کى صلاحیت نہ رکھتى ہو، اسے بطور حقِ مہر مقرر کرنا جائز نہیں ہے، اس لیے زوجین کى رضامندى سے ہر وہ چیز بطور مہر مقرر کى جاسکتى ہے جو "مالِ مُتَقَوَّمْ" ہو، یعنی وہ چیز شریعت کى نظر میں قیمت والی ہو یا مسلمانوں کے عرف میں اسے قیمت والا مال سمجھا جاتا ہو اور اس چیز کی کم از کم مقدار دس درہم کى قیمت کے برابر ہو، دس درہم کا وزن 2 تولہ ساڑھے سات ماشہ (30 گرام 618 ملى گرام) چاندى ہے، اس مقدار سے کم کى مالیت والى چیز کو مہر میں دینا شرعاً درست نہیں ہے۔
اس تمہید کے بعد آپ کے سوال میں مذکور مہر کى دونوں صورتوں کا جواب حسب ذیل ہے:
1) چونکہ نماز کی پابندی کرنا شرعاً مال نہیں ہے، اس لیے فجر کى نماز کى پابندى کو بطور مہر مقرر کرنا شرعاً جائز نہیں ہے، البتہ ایسی صورت میں نکاح تو منعقد ہو جائے گا، لیکن شوہر کے ذمہ مہرِ مثل دینا واجب ہوگا۔
2) قرآن کریم کا مصحف "مالِ مُتَقَوَّمْ" ہے، اس کی خرید وفروخت جائز ہے، لہذا اگر مصحف اتنی قیمت کا ہو کہ اس کى مالیت دس درہم کى مالیت کے برابر یا اس سے زیادہ ہو تو اسے حق مہر کے طور پر مقرر کرنا جائز ہے اور اس صورت میں نکاح بھى منعقد ہو جائے گا، لیکن عام طور سے اس کا عرف ورواج نہیں پایا جاتا ہے، اس لیے بہتر یہ ہے کہ نقدى یا سونا چاندى وغیرہ کے ذریعے حق مہر ادا کیا جائے۔