سوال: مفتی صاحب! کیا ہمارا درجہ ذیل شرائط پر مبنی مردہ فنڈ درست ہے؟
گنڈیالی بالا متحدہ عرب امارات
(شرائط وضوابط )
1: انٹری فیس 100 درہم ہے۔ یہ 100 درہم ہر کارکن کمیٹی کے لیے وقف کرے گا اور جب وہ کمیٹی سے نکلے گا تو یہ رقم اسے واپس نہیں ملی گی۔
2: فوتگی پر 100 درہم جمع (وقف ) کرے گا۔
3: فی الحال سالانہ کوئی رقم جمع نہیں کرے گا، اگر فنڈ کم ہوتا ہے تو بعد میں سالانہ وصولی پر مشورہ ہو سکتا ہے۔
4: اگر کوئی فرد متحدہ عرب امارات چھوڑ کر پاکستان چلا جائے اور چھ مہینوں کے درمیان میں وفات پائے تو اس کو فنڈ ملے گا۔
5: اگر کوئی فرد متحدہ عرب امارات میں وفات پاگیا اور فنڈ میں موجود فرد میں سے کوئی بھی پاکستان میں یا کسی اور ملک میں ہو، عمرہ کرنے یا حج کرنے یا وغیرہ تو وہ فنڈ جمع کرے گا ۔
6: اگر کوئی بندہ کینسل چلا جائے اور دبئی میں کسی کی فوتگی ہوتی ہے تو کینسل ممبر پیسہ نہیں دے گا۔
7: جو بندہ وفات ہو جائے، اس کا سنبھالنے کا ذمہ داری ایڈمن ممبران اگر فارغ ہو تو وہ بندوبست کریں گے۔ اگر کسی وجہ سے وہ فارغ نہ ہو تو پھر دوسرے ممبر خدمات سرانجام دیں گے اور اس خدمات کی اس ممبران کو معاوضہ دیا جائے گا جو خدمات سرانجام دیں۔
8: فنڈ کو رکھنے کے لیے بینک اچھا ہے یا کسی فرد کے ساتھ یہ ایڈمن فیصلہ کرے گا۔ فنڈ جس کے پاس بھی ہوگا، ہر مہینے وہ گروپ میں فنڈز کا تفصیل شیئر کرے گا، تاکہ کسی کو شک و شبہات نہ ہو، فنڈ کا پیسہ کسی بھی بزنس یا اور کام کے لیے استعمال نہ ہوگا۔
9: جس بندے کا ویزہ کنسل ہو یا وہ فنڈ چھوڑ کر نہیں کرتا یا پاکستان چلا گیا تو آدمی کو چاہیے جو مردہ فنڈ (رقم) جمع کیا ہیں، وہ یہ نیت کرے کہ یہ رقم جو میں نے جمع کیا ہے، وہ میں مردہ فنڈ میں واقف کرتا ہوں، تاکہ ہمیں جائز ہوجائے۔
برائے مہربانی اس حوالے سے رہنمائی فرمائیں اور جو جائز طریقے کار وہ بھی بتادیں۔
تنقیح:
محترم! آپ نے مردہ فنڈ کے نام سے جو شرائط نامہ ارسال فرمایا ہے، اس کے بارے میں درج ذیل امور کى وضاحت فرما دیں:
1- اس فنڈ کے مقاصد اور مصارف کیا ہیں؟
2- فنڈ جمع کرنے کى ضرورت کیوں پیش آ رہى ہے؟
3-یہ فنڈ ماہانہ بنیاد پر ہے یا جب کسى کا انتقال ہوگا تب اس فنڈ میں رقم جمع کروانى ہو گى؟
4-فنڈ کى بنیادى شرط یہ بیان کى گئى ہے کہ ہر شخص فنڈ دیتے وقت اس کو وقف کرے گا، یہاں وقف کس مقصد کے لیے کرے گا، اس کى وضاحت نہیں کى گئى ہے، اس کى وضاحت فرما دیں۔
5- کیااس فنڈ میں زکاۃ یا صدقات واجبہ کى مد میں بھى رقم جمع کى جا سکتى ہے؟ اس کى وضاحت فرما دیں۔
دار الإفتاء الإخلاص،کراچى
جواب تنقیح:
1۔فنڈ جمع کرنے کا مقصد یہ ہے کہ اگر کسی پاکستانی ساتھی کا انتقال یہاں دوبی میں ہوتا ہے تو اس کے کفن و دفن کا انتظام اور پاکستان ان کے گھر والوں تک پہنچانے کا انتظام کیا جائے۔اور اس کے لیے ساتھ میں جو اگر یہاں دبی میں کوئی رشتہ دار ہوتا ہے تو اس کے میت کے ساتھ جانے کے لیے ٹکٹ کا انتظام کیا جائےاور جو رقم بچ جائے تو وہ اس کے اہل وعیال بال وبچوں کو دی جائے۔
2.فنڈ جمع کرنے کی ضرورت اس لیے آتی ہے کہ یہاں پردیس میں کوئی ہوتا نہیں ہے۔
3۔جب کسی کا انتقال ہوتا ہے تو اس وقت رقم جمع کی جاتی ہے ماہانہ یا سالانہ رقم جمع نہیں کی جاتی۔
4۔ وقف کا مقصد بھی جیسے واضح کیا گیا ہے کہ وہ میت کے کفن و دفن اور پاکستان تک پہنچانے کا خرچہ برداشت کرنا ہے۔
5۔اس میں زکوٰۃ و صدقات واجبہ نہیں ہوتی۔

جواب: سوال میں بیان کردہ تفصیل معلوم ہوتا ہے کہ بیرون ملک ملازمت کے لیے مقیم حضرات میں سے جب کسى کى وفات ہوتى ہے تو اس صورت میں میت کے وہاں تجہیز وتکفین اور تدفین کے لیے وطن پہنچانے کے لیے سفر کے اخراجات اتنے زیادہ ہوتے ہیں کہ ایک ملازمت پیشہ شخص کے لیے اکیلے ان کو پورا کرنا ممکن نہیں ہوتا ہے، بعض اوقات سارى جمع پونجى اسى میں خرچ ہو جاتى ہے تو ایسى صورت حال میں اگر وہاں کے مقیم حضرات ایسى صورت حال سے نمٹنے کے لیے اسلامى بھائى چارے کے جذبے سے اپنى مدد آپ کے تحت کوئى وقف فنڈ قائم کرتے ہیں تو شرعاً ایسا وقف فنڈ قائم کرنا جائز ہے، البتہ شرعاً کسى بھى وقف فنڈ کو قائم کرنے کى چند بنیادى شرائط حسب ذیل ہیں:
1) وقف فنڈ قائم کرتے ہوئے ابتداء میں چند افراد مل کر کچھ رقم اس فنڈ کے لیے وقف کر دیں، اس رقم کو خرچ کرنا جائز نہیں ہے، لہذا اس ابتدائى رقم کے متعلق یہ بنیادى ضابطہ طے کر لیا جائے کہ جب تک یہ وقف فنڈ قائم رہے گا، تب تک یہ بنیادى رقم کبھى خرچ نہیں ہوگى۔
2) جب اس بنیادى رقم سے وقف فنڈ قائم کر لیا جائے تو اس کے بعد وقف فنڈ کے شرکاء سے مقرر شدہ چندہ کى رقم لى جائے اور یہ رقم اس وقف فنڈ کى ملکیت ہوگى، اس رقم کو حسب ضوابط اس کے مصارف میں خرچ کیا جائے گا۔
3) فنڈ کے لیے چندہ دینے والوں کى دلى خوشى ضرورى ہے، مذکورہ میت فنڈ میں چونکہ اس میں ہر ممبر کے ذمہ ایک مخصوص مقدار بطور چندہ رقم ادا کرنا لازم ہے تو اس کے لیے ضرورى ہے کہ چندہ کى اتنى مقدار مقرر کى جائے جو کم از کم ہو، تاکہ ہر ممبر بخوشى وہ رقم ادا کر سکے، کسى پر اضافى بوجھ نہ ہو، لہذا باہمى مشاورت سے کوئى کم از کم مقدار چندہ کى مقرر کر لى جائے، ہاں! اگر کوئى خوشى سے اس سے زائد بھى اپنى استطاعت کے مطابق دینا چاہے تو دے سکتا ہے۔ نیز سوال میں مذکور شرائط نامہ میں 100 درہم کى جو مقدار مقرر کى گئى ہے، اگر اس مقدار سے سب شرکاء کو بخوشى اتفاق ہو تو اس پر بھى عمل کیا جا سکتا ہے۔
4) اس وقف سے وہ لوگ مستفید ہو سکتے ہیں جو اس وقف فنڈ کے قواعد کے مطابق اس کى رکنیت حاصل کر لیں، البتہ باہمى مشاورت سے اس میں ایسے افراد کو بھى شامل کیا جا سکتا ہے جو چندہ دینے کى استطاعت نہ رکھتے ہوں، تاکہ ان کے ساتھ بھى تعاون ہو سکے۔
5) اس وقف فنڈ کا ایک ذمہ دار مقرر کر لیا جائے جو مفتیان کرام کى دى گئى شرعى ہدایات کے مطابق اس وقف فنڈ کو اس کے مقاصد میں خرچ کرنے کا پابند ہوگا، اسے ان ذمہ داریوں کى ادائیگى کے عوض معقول وظیفہ اس وقف فنڈ سے ادا کیا جا سکتا ہے، نیز اگر کوئى شخص اس وقف فنڈ کى ذمہ داریوں کو بغیر وظیفے کے اعزازى طور پر سرانجام دےتو اس کى بھى اجازت ہے۔
6) اگر کبھى اس وقف فنڈ کى ضرورت باقى نہ رہے اور اس کو ختم کر کے اس کو تحلیل کرنے کى نوبت آجائے، تو ایسى صورت میں وقف میں موجود رقم کسى ایسے مصرف میں دى جائے جو ہمیشہ جارى رہنے والا ہو، مثلاً: مسجد، مدرسہ وغیرہ۔
مذکورہ بالا شرائط کے مطابق سوال میں مذکور "میت وقف فنڈ " کے شرائط نامہ میں مذکور تفصیلات سے جس ممبر کو اتفاق ہو، وہ اس میں حسب قواعد شریک ہو سکتا ہے۔