سوال: فَأَزَلَّهُمَا الشَّيْطَانُ عَنْهَا فَأَخْرَجَهُمَا مِمَّا كَانَا فِيهِ ۖ وَقُلْنَا اهْبِطُوا بَعْضُكُمْ لِبَعْضٍ عَدُوٌّ ۖ وَلَكُمْ فِي الْأَرْضِ مُسْتَقَرٌّ وَمَتَاعٌ إِلَىٰ حِينٍ۔ترجمہ: لیکن شیطان نے ان کو بہکا کر وہاں سے نکلوا ہی دیا اور ہم نے کہہ دیا کہ اتر جاؤ ! تم ایک دوسرے کے دشمن ہو اور ایک وقت مقرر تک تمہارے لئے زمین میں ٹھہرنا اور فائده اٹھانا ہے۔
مفتی صاحب! دلیل کے ساتھ بتائیں کہ قرآن کریم کی مندرجہ بالا آیت میں "تم ایک دوسرے کے دشمن ہو" کا کیا مطلب ہے؟
کیونکہ جس طرح اردو زبان میں واحد اور جمع کے صیغے ہوتے ہیں، اسی طرح انگریزی زبان میں بھی واحد اور جمع کے صیغے ہوتے ہیں، یعنی یا تو صرف ایک اور یا ایک سے زائد، مگر کمال کی بات ہے کہ عربی زبان میں ایک کے لیے الگ صیغہ ہے، دو کے لیے الگ صیغہ ہے اور دو سے زیادہ کے لیے الگ صیغہ ہے تو اس تناظر میں میرا سوال صرف اتنا سا ہے کہ اس آیت میں جو صیغہ استعمال ہوا ہے، وہ کون سا ہے؟ اور آیت کے عربی متن کے الفاظ اور عربی گرامر کی رو سے اس کا کیا معنی نکل رہا ہے؟
کیا شیطان اور آدم علیہ السلام ایک دوسرے کے دشمن قرار دییے گئے تھے یا شیطان، آدم علیہ السلام اور اماں حوا علیہا السلام سب ایک دوسرے کے دشمن قرار دییے گئے تھے؟

جواب: واضح رہے کہ تفسیر قرآن کے لیے صرف عربی زبان کی معمولی واقفیت کافی نہیں، بلکہ اس کے لیے علمِ اصول تفسیر، علمِ حدیث، اصولِ حدیث، اصولِ فقہ، علمِ فقہ، علمِ نحو، علمِ صرف، علمِ لغت، علمِ ادب اور علمِ بلاغت میں ماہرانہ بصیرت اور اس کے ساتھ طہارت وتقوٰی ضروری ہے۔
اس تفصیل کے بعد آپ کے سوال کا جواب یہ ہے کہ حضرت ابن عباس رضی اللہ عنھما سے مروی ہے اھبطوا کا خطاب آدم، حواء اور شیطان تینوں کو ہے۔
یہ بھی ممکن ہے کہ خطاب صرف آدم ، حواء اور ان کی اولاد کو ہو، کیونکہ وہ دونوں افزائش نسلِ انسانی کا ذریعہ تھے تو حکما ان کی اولاد کو موجود فرض کیا گیا، اور بعض مفسرین نے کہا کہ اس سے مراد آدم، ان کی اولاد، اور ابلیس اور اس کی اولاد مراد ہیں۔
ان سب اقوال کی بنا پر اھبطوا کے صیغہ جمع ہونے اور جمع مراد لینے پر کوئی اعتراض نہیں وارد ہوتا، البتہ ایک قول یہ ہے کہ اس سے مراد صرف آدم اور حواء ہیں۔ اس قول پر اعتراض ہوتا ہے کہ اھبطوا جمع کا صیغہ ہے اور آدم و حواء تو دو افراد ہیں، صیغہ تثنیہ لانا چاہیے، جمع کاصیغہ کیوں لائے؟
اس کا جواب یہ ہے کہ اھبطوا جمع کا صیغہ ہے اور عربی میں جمع کا اطلاق عموما کم سے کم تین افراد پر ہوتا ہے اور کبھی کبھار دو افراد پر بھی ہوتا ہے، جیسے فان کان لہ اخوة میں اخوہ جمع ہے اور مراد اس سے دو بہن بھائی ہیں، اسی طرح آیت وکنا لحکمھم شاھدین میں حکمھم کی "ھم ضمیر" جمع ہے، لیکن اس سے مراد داود اور سلیمان علیھما السلام ہیں۔