سوال: السلام علیکم، مفتی صاحب ! ایک اہم سوال ہے، رہنمائی فرمائیں، بہت نوازش ہوگی۔
40 سال پہلے دو سگی بہنوں نے اپنے بیٹا بیٹی کی آپس میں شادی کی، مگر کچھ اختلاف کی بنیاد پر نباہ نہیں ہوسکا اور طلاق ہوگئی۔اور دونوں خاندانوں نے ایک دوسرے سے تعلق ختم کرلیا، ایک نسل جوان ہوگئی، انکے بچے بھی ہوگئے، مختصر یہ کہ اب بھی دونوں خاندان ایک دوسرے سے نہیں ملتے، جبکہ ایک خاندان ملنا چاہتا ہے، مگر دوسرا کچھ سننے کو تیار نہیں، اگر کہیں خاندان میں کوئی غم یا خوشی کے موقع پر آمنا سامنا ہو جائے تو سلام کرلیتے ہیں، اگر کوئی سمجھائے تو کہتے ہیں کہ ہم قطع تعلق نہیں کررہے، بس ہم کو اچھا نہیں لگتا کہ ہم ان سے ملیں۔ اور ایک صحابی حضرت وحشی رضی اللّٰہ عنہ کی مثال دیتے ہیں، جنہیں حضور صلیٰ اللہ علیہ وسلم نے اپنے سامنے آنے کا منع کیا تھا۔ کیا یہ قطع تعلق کے گناہگاروں میں شامل نہیں؟ کیا تکبر گا گناہ نہیں ہوگا؟ وضاحت فرمادیں تا کہ تعلق جوڑنے میں آسانی ہو، اور نہ ملنے پر کوئی وعید بھی حدیث کے ساتھ ذکر فرمادیں، آپکا جواب آخری کوشش ہوگی، مہربانی فرمائیں۔ جزاکم اللہ خیرا کثیرا۔

جواب: اسلام نے ہمیں رشتہ داروں کے ساتھ احسان اور اچھے برتاؤ کرنے کا حکم دیا ہے۔رشتہ ناطہ کو توڑدینا اور رشتہ داری کا پاس ولحاظ نہ کرنا اللہ کے نزدیک حد درجہ ناپسندیدہ ہے ،چنانچہ
رسول اللہ ﷺ نے فرمایا:
لا يدخلُ الجنةَ قاطعُ رحمٍ (صحيح مسلم:2556)
ترجمہ: جنت میں رشتہ توڑنے اور کاٹنے والا نہ جائے گا۔
اس لیے دونوں خاندان کے لوگوں کو چاہیے کہ آپس میں صلہ رحمی کا مظاہرہ کریں اور رشتہ جوڑنے کی کوشش کریں، نہ کہ رشتہ توڑنے کی۔