سوال: ایک عورت کا دودھ پیتا بچہ فوت ہوگیا، اس عورت نے اپنا دودھ نکال کر تھوڑا سا پانی ملایا اور پھر اس نے محلے کے شیر خوار بچوں کو وہ دودھ پلادیا، دودھ پینے والوں میں ایک بچی بھی تھی جو ڈیڑھ سال کی تھی، اس لڑکی کی شادی بلوغت کے بعد اس عورت کے بیٹے سے ہو گئی ہے جس نے اپنے شیر خوار بچے کی وفات پر دودھ نکال کر اس لڑکی کو پلایا تھا۔ اس واقعہ کی گواہی اس لڑکی کی والدہ اور دودھ پلانے والی دیتی ہیں، معلوم یہ کرنا ہے کہ کیا اس سے حرمت رضاعت ثابت ہوگئی تھی یا نہیں؟ یہ بات یاد رہے کہ جس عورت نے دودھ نکال کر پانی ملایا تھا، اس میں پانی کی مقدار کم اور دودھ کی مقدار زیادہ تھی۔

جواب: واضح رہے کہ اگر عورت کے دودھ میں اس قدر پانی ملا دیا جائے کہ دودھ کی مقدار پانی پر غالب ہو تو ایسا دودھ مدت رضاعت میں بچے کو پلانے سے حرمت رضاعت ثابت ہو جاتی ہے، تاہم مدت رضاعت کے ثبوت کے لیے دو مردوں یا ایک مرد اور دو عورتوں کی گواہی ہونا ضروری ہے، لہذا اگر شرعی گواہ موجود نہ ہوں تو ایسی صورت میں حرمت رضاعت ثابت نہ ہوگی۔
سوال میں ذکر کردہ صورت میں چونکہ شرعی گواہ موجود نہیں ہیں، لہذا میاں بیوی کے درمیان حرمت رضاعت ثابت نہیں ہوئی ہے، تاہم اگر گواہی دینے والی دونوں عورتیں یا ایک عورت دین دار اور پرہیزگار ہو اور ان کے کہنے کی وجہ سے دل گواہی دینے لگے کہ یہ سچ کہتی ہوں گی تو ایسی عورت کی بات کا اعتبار کرتے ہوئے میاں بیوی کے لیے آپس میں مفارقت (جدائی) اختیار کر لینا افضل و بہتر ہے، البتہ چونکہ میاں بیوی پر ان عورتوں کی گواہی ماننا شرعاً لازم نہیں ہے، لہذا اگر میاں اپنی بیوی کو طلاق نہ دے تو ان کا ساتھ رہنا جائز ہے، شرعاً اس کی گنجائش ہے۔