سوال: مفتی صاحب! حضرت ابو الدرداءؓ سے مروی ایک حدیث ہے جس میں رسول اللہ ﷺ نے انہیں نو دس نصیحتیں فرمائی ہیں۔ کیا وہ حدیث یا اس کا حوالہ مل سکتا ہے؟

جواب: حضرت ابوالدرداءؓ کو رسول اللہ ﷺ نے جو نصیحتیں فرمائی تھیں، وہ حدیث کی مختلف کتابوں میں كہیں اختصار کے ساتھ اور کہیں تفصیل کے ساتھ وارد ہوئی ہیں، بعض کتب کی روایات سے معلوم ہوتا ہے کہ یہ نصائح حضرت معاذؓ یا حضرت ام ایمنؓ کو بھی فرمائی گئی ہیں، ان مختلف روایات کی اسناد پر اگرچہ کلام کیا گیا ہے، تاہم ان میں جو نصائح ارشاد فرمائے گئے ہیں، وہ شریعت کی دیگر نصوص سے بھی ثابت ہیں، ذیل میں ان میں سے چند روایات حوالوں سمیت ذکر کی جاتی ہیں:
(1) امام بخاریؒ کی الأدب المفرد میں حضرت ابوالدرداءؓ کی یہ حدیث یوں نقل کی ہے:
"حَدَّثَنَا مُحَمَّدُ بْنُ عَبْدِ الْعَزِيزِ قَالَ: حَدَّثَنَا عَبْدُ الْمَلِكِ بْنُ الْخَطَّابِ بْنِ عُبَيْدِ اللَّهِ بْنِ أَبِي بَكْرَةَ الْبَصْرِيُّ - لَقِيتُهُ بِالرَّمْلَةِ - قَالَ: حَدَّثَنِي رَاشِدٌ أَبُو مُحَمَّدٍ، عَنْ شَهْرِ بْنِ حَوْشَبٍ، عَنْ أُمِّ ‌الدَّرْدَاءِ، عَنْ أَبِي ‌الدَّرْدَاءِ قَالَ: أَوْصَانِي رَسُولُ اللَّهِ صَلَّى اللهُ عَلَيْهِ وَسَلَّمَ بِتِسْعٍ: ‌لَا ‌تُشْرِكْ ‌بِاللَّهِ شَيْئًا؛ وَإِنْ قُطِّعْتَ أَوْ حُرِّقْتَ، وَلَا تَتْرُكَنَّ الصَّلَاةَ الْمَكْتُوبَةَ مُتَعَمِّدًا، وَمَنْ تَرَكَهَا مُتَعَمِّدًا بَرِئَتْ مِنْهُ الذِّمَّةُ، وَلَا تَشْرَبَنَّ الْخَمْرَ، فَإِنَّهَا مِفْتَاحُ كُلِّ شَرٍّ، وَأَطِعْ وَالِدَيْكَ، وَإِنْ أَمَرَاكَ أَنْ تَخْرُجَ مِنْ دُنْيَاكَ فَاخْرُجْ لَهُمَا، وَلَا تُنَازِعَنَّ وُلَاةَ الْأَمْرِ وَإِنْ رَأَيْتَ أَنَّكَ أَنْتَ، وَلَا تَفْرُرْ مِنَ الزَّحْفِ، وَإِنْ هَلَكْتَ وَفَرَّ أَصْحَابُكَ، وَأَنْفِقْ مِنْ طَوْلِكَ عَلَى أَهْلِكَ، وَلَا تَرْفَعْ عَصَاكَ عَنْ أَهْلِكَ، وَأَخِفْهُمْ فِي اللَّهِ عَزَّ وَجَلَّ" (حدیث نمبر:18)
ترجمہ: "حضرت ابوالدرداءؓ سے مروی ہے کہ رسول اللہ ﷺ نے مجھے نو ںصیحتیں فرمائیں، یہ کہ اللہ کے ساتھ کبھی کسی کو شریک نہ ٹھہرانا اگرچہ تمہارے ٹکڑے کردیے جائیں یا جلادیے جاؤ، اور فرض نماز کبھی جان بوجھ کر نہ چھوڑنا کہ جو شخص جان بوجھ کر فرض نماز چھوڑتا ہے اس سے اللہ کا ذمہ بَری ہوجاتا ہے۔ شراب کبھی مت پینا کہ یہ ہر بُرائی کی کنجی ہے، والدین کی اطاعت کرنا، وہ تمہیں یہ حکم دیں کہ اپنی دنیا (کے مال یا معاملات) سے نکل جاؤ تو ان کے لیے نکل جانا۔ اصحابِ اقتدار سے کبھی جھگڑا مت مول لینا، اگرچہ اپنی رائے میں تُم حق پر ہو۔ جہاد میں گھمسان کی جنگ سے کبھی مت بھاگنا اگرچہ ہلاک ہوجاؤ اور اگرچہ تمہارے سب ساتھی بھاگ جائیں، حسبِ استطاعت گھر والوں پر ضرور خرچ کرتے رہنا، اور گھر والوں سے اپنی لاٹھی کبھی مت ہٹانا اور اللہ کے معاملے میں انہیں ڈراتے رہو۔"
اس روایت میں ایک راوی شہر بن حوشب ہیں، جن پر محدثین نے کلام کیا ہے، یہ روایت سنن ابن ماجہ (حدیث نمبر: 3371 و 4034) میں بھی شہر بن حوشب ہی کے واسطے سے اختصار کے ساتھ ذکر کی گئی ہے۔ اسی طرح امام بیہقیؒ نے بھی شعب الایمان میں یہی حدیث اختصار کے ساتھ روایت کی ہے۔ (حدیث نمبر: 5589)
امام احمد بن حنبلؒ نے اپنی مسند ميں تقریبا انہیں ملتے جلتے الفاظ کے ساتھ حضرت معاذ بن جبلؓ سے روایت نقل کی ہے، اور اس ميں کل دس نصیحتیں ہیں، اس حدیث کی سند و متن یہ ہے:
"حدثنا أبو اليمان، أخبرنا إسماعيل بن عياش، عن صفوان بن عمرو، عن عبد الرحمن بن جبير بن نفير الحضرمي، عن ‌معاذ قال: ‌أوصاني رسول الله صلى الله عليه وسلم بعشر كلمات قال: " ‌لا ‌تشرك بالله شيئا وإن قتلت وحرقت، ولا تعقن والديك، وإن أمراك أن تخرج من أهلك ومالك، ولا تتركن صلاة مكتوبة متعمدا؛ فإن من ترك صلاة مكتوبة متعمدا فقد برئت منه ذمة الله، ولا تشربن خمرا؛ فإنه رأس كل فاحشة، وإياك والمعصية، فإن بالمعصية حل سخط الله عز وجل، وإياك والفرار من الزحف وإن هلك الناس، وإذا أصاب الناس موتان وأنت فيهم فاثبت، وأنفق على عيالك من طولك، ولا ترفع عنهم عصاك أدبا وأخفهم في الله" (22075)
اس روایت کی سند پر بھی بعض حضرات نے تکلم کیا ہے۔
امام بیہقیؒ نے شعب الإيمان ميں يہی حدیث اس سے ملتے جلتے الفاظ کے ساتھ حضرت ام ایمنؓ سے بھی نقل کی ہے، وہ حدیث یہ ہے:
7865 - أخبرنا أبو عبد الله الحافظ وأبو بكر القاضي قالا: نا أبو العباس محمد بن يعقوب نا بحر بن نصر نا بشر بن بكر نا سعيد بن عبد العزيز عن أم أيمن أن رسول الله صلّى الله عليه وسلّم أوصى بعض أهل بيته فقال:
«‌لا ‌تشرك ‌بالله عز وجل وإن عذبت وإن حرقت وأطع ربك ووالديك وإن أمرك أن تخرج من كل شيء لك فاخرج، ولا تترك الصلاة متعمدا فإن من ترك الصلاة متعمدا فقد برئت منه ذمة الله، إياك والخمر فإنها مفتاح كل شر، إياك والمعصية فإنها تسخط الله لا تنازعن الأمر أهله وإن رأيت أن لك لا مفر من الزحف إن أصاب الناس موت وأنت فيهم فاثبت وأنفق على أهلك من طولك ولا ترفع عصاك عنهم وأخفهم في الله عز وجل»
بہرحال یہ حدیث ایک سے زائد صحابہ سے نقل کی گئی ہے، جن کی اسناد پر اگرچہ کلام کیا گیا ہے، لیکن یہ اپنے معنیٰ اور مفہوم کے اعتبار سے قرآن و حدیث کے دلائل سے مؤید ہے۔