سوال: رسول اللہ صلی اللہ علیہ وسلم نے فرمایا: میں نے تم لوگوں کو تین دن سے زیادہ قربانی کا گوشت رکھنے سے منع کیا تھا تاکہ مالدار لوگ ان لوگوں کے لیے کشادگی کردیں جنہیں قربانی کی طاقت نہیں ہے، سو اب جتنا چاہو خود کھاؤ دوسروں کو کھلاؤ اور (گوشت) جمع کرکے رکھو۔ (ترمذی، حدیث نمبر:1510) مفتی صاحب! کیا یہ حدیث صحیح ہے؟

جواب: سننِ ترمذی کی جس حدیث کا آپ نے حوالہ دیا ہے، يہ حضرت بریدہؓ سے مروی ہے، یہ حدیث سننِ ترمذی میں مکمل سند و متن کے ساتھ یوں وار ہوئی ہے:
حدثنا ‌محمد بن بشار ‌ومحمود بن غيلان ‌والحسن بن علي الخلال، قالوا: أخبرنا ‌أبو عاصم النبيل، قال: حدثنا ‌سفيان الثوري، عن ‌علقمة بن مرثد ، عن ‌سليمان بن بريدة ، عن ‌أبيه قال: قال رسول الله صلى الله عليه وسلم: «كنت نهيتكم عن لحوم الأضاحي فوق ثلاث» ليتسع ذو الطول على من لا طول له، فكلوا ما بدا لكم وأطعموا وادخروا.
(حديث نمبر: 1510، 3/ 172، ط: دار الغرب الإسلامي)
اس کو روایت کرنے کے بعد امام ترمذیؒ نے اسے حسن صحیح قرار دیا ہے۔
نیز یہی حدیث مختلف صحابہ کرامؒ سے حدیث کی متعدد کتب میں مروی ہے، جن میں صحاحِ ستہ سرِ فہرست ہیں، لہٰذا یہ حدیث صحیح ہے اور صحیح مسلم میں حضرت عائشہؓ سے یہ حدیث قدرے تفصیل کے ساتھ مروی ہے:
حدثنا إسحاق بن إبراهيم الحنظلي. أخبرنا روح. حدثنا مالك عن عبد الله ابن أبي بكر، عن عبد الله بن واقد. قال: نهى رسول الله صلى الله عليه وسلم عن ‌أكل ‌لحوم الضحايا بعد ‌ثلاث. قال عبد الله ابن أبي بكر: فذكرت ذلك لعمرة فقالت: صدق. سمعت عائشة تقول:
دف أهل أبيات من البادية حضرة الأضحى، زمن رسول الله صلى الله عليه وسلم. فقال رسول الله صلى الله عليه وسلم (ادخروا ثلاثا. ثم تصدقوا بما بقي) فلما كان بعد ذلك قالوا: يا رسول الله! إن الناس يتخذون الأسقية من ضحاياهم ويجملون منها الودك. فقال رسول الله صلى الله عليه وسلم (وما ذاك؟) قالوا: نهيت أن تؤكل ‌لحوم الضحايا بعد ‌ثلاث. فقال: (إنما نهيتكم من أجل الدافة التي دفت. فكلوا وادخروا وتصدقوا)(صحيح مسلم: حدیث نمبر: 1971، دار احیاء التراث العربی)
ترجمہ: حضرت عائشہؓ سے روایت ہے کہ رسول اللہ ﷺ کے زمانے میں بقرہ عید کے موقع پر دیہات سے کچھ لوگ مدینہ آئے ہوئے تھے تو رسول اللہ ﷺ نے فرمایا: "تین دن کا گوشت رکھ کے باقی صدقہ کردو"۔ جب اگلا سال آیا تو صحابہ نے عرض کیا: یا رسول اللہ! بے شک لوگ اپنی قربانیوں (کے چمڑے) سے مشکیزے بناتے تھے، اور چربی پگھلا کر رکھتے تھے تو حضورﷺ نے فرمایا: "اب کیا رکاوٹ ہے؟" تو صحابہ نے عرض کیا: آپ نے گزشتہ سال تین دن کے بعد قربانی کا گوشت کھانے سے منع فرمایا تھا: تو رسول اللہ ﷺ نے فرمایا: "میں نے تو ان دیہات کے غریب لوگوں کی وجہ سے کہا تھا جو دیہات سے تمہارے پاس آئے تھے، اب گوشت کھاؤ، ذخیرہ بھی کرو اور صدقہ بھی کرو۔"