سوال: میرا سوال یہ ہے کہ آج کل AI کا دور ہے، ہر کوئی اس پر کام کررہا ہے، میں بھی اس فیلڈ میں نیا آیا ہوں، کیا AI کے ذریعے کسی زندہ انسان یا جانور کی تصویر بناسکتے ہیں یا نہیں؟ AI کے ذریعے جو تصویر بنتی ہے، وہ کارٹون نما بنتی ہے اور اس کے ذریعے آواز بھی بنائی جاتی ہے، کسی دوکان کی پروموشن کے لیے ہم یہ کام کرتے ہیں، کیا ہم اس کام سے پیسے کماسکتے ہیں؟

جواب: واضح رہے کہ ڈیجیٹل تصویر کے متعلق حضرات علماء کرام کے دو موقف ہیں:
1) ایک موقف یہ ہے کہ ڈیجیٹل تصویر بھی حرام تصویر ہی کے حکم میں ہے، لہٰذا اس قول کے مطابق ڈیجیٹل تصاویر بنانا اور اس سے حاصل ہونے والی کمائی دونوں حرام ہیں۔
2) علماء کی دوسری جماعت کا موقف یہ ہے کہ ڈیجیٹل تصویر کا جب تک کسی پائیدار چیز پر عکس یا پرنٹ وغیرہ نہ لیا جائے، تب تک یہ حرام تصویر کے حکم میں داخل نہیں ہے۔ اس اعتبار سے اس کام کے عوض حاصل ہونے والی کمائی بھی حرام نہیں کہلائے گی، بشرطیکہ اس میں خواتین یا حرام مناظر کی تصاویر اور ویڈیوز نہ ہوں۔
پوچھی گئی صورت میں دوسرے موقف والے علماء کرام کے نزدیک درج ذیل شرائط کے ساتھ آرٹیفیشل انٹیلیجنس (AI) تصاویر والی ویڈیوز بنانا جائز ہے:
‏1) ان ویڈیوز میں اسلامی تعلیمات اور مقدّسات شرعیہ کے خلاف کوئی چیز نہ ہو۔
‏2) میوزک اور موسیقی نہ ہو۔
‏3) عورتوں کی تصاویر نہ ہوں۔