سوال: حضرت! قرآن عظیم میں جو نظر نیچی کرنے کا حکم ہے، اس سے کیا مراد ہے، نیز اس پر عمل کیسے کریں؟ عموماً آفس میں یا راہ چلتے جتنی نظر ہم نیچی کرتے ہیں، اس سے منظر تو اور بھی خطرناک ہوجاتا ہے، بالفرض اگر بالکل بھی نیچی کرلیں تب بھی نظر کنایہ اپنا کام کر جاتی ہے۔ اسی طرح خاص کر بائیک یا گاڑی چلاتے ہوئے سامنے کا منظر جلد تبدیل نہیں ہوتا اور بعض اوقات بالکل نظر ہٹانا بھی ممکن نہیں ہوتا، جب تک منظر تبدیل ہوتا ہے نفس کچھ نہ کچھ چرا ہی لیتا ہے۔ رہنمائی کی درخواست ہے اور کسی ناشائستہ گفتگو کی پیشگی معذرت چاہتا ہوں۔

جواب: نظروں كو جھكانے كا حکم سورة النور کی آیت نمبر 30 اور 31 میں بیان فرمایا گیا ہے، ارشادِ باری تعالیٰ ہے: {قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ • وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ... إلخ} [النور: 30، 31]
ترجمہ: "مومن مردوں سے کہہ دو کہ وہ اپنی نگاہیں نیچی رکھیں، اور اپنی شرمگاہوں کی حفاظت کریں۔ یہی ان کے لیے پاکیزہ ترین طریقہ ہے۔ وہ جو کاروائیاں کرتے ہیں اللہ ان سب سے پوری طرح باخبر ہے۔ اور مومن عورتوں سے کہہ دو کہ وہ اپنی نگاہیں نیچی رکھیں۔"
حضرت مفتی محمد شفیع صاحب قدس اللہ تعالیٰ سرہ معارف القرآن میں ان آیات کی تفسیر میں لکھتے ہیں: "یغضوا، غض سے مشتق ہے جس کے معنی کم کرنے اور پست کرنے کے ہیں۔۔ نگاہ پست اور نیچی رکھنے سے مراد نگاہ کو ان چیزوں سے پھیرلینا ہے جن کی طرف دیکھنا شرعاً ممنوع و ناجائز ہے۔۔۔ اس میں غیر محرم عورت کی طرف بُری نیت سے دیکھنا تحریماً اور بغیر کسی نیت کے دیکھنا کراہۃً داخل ہے اور کسی عورت یا مرد کے ستر شرعی پر نظر ڈالنا بھی اس میں داخل ہے، (مواضع ضرورت جیسے علاج معالجہ وغیرہ اس سے مستثنی ہیں) کسی کا راز معلوم کرنے کے لئے اس کے گھر میں جھانکنا اور تمام وہ کام جن میں نگاہ کے استعمال کرنے کو شریعت نے ممنوع قرار دیا ہے اس میں داخل ہیں۔" (معارف القرآن، سورة النور: آیت نمبر: 30)
اس سے معلوم ہوا کہ قرآن شریف میں نظریں جھکانے کا یہ مطلب نہیں ہے کہ انسان اوپر ہی نہ دیکھے جس کی وجہ سے چلنے میں گرنے کا اندیشہ ہو، باقی اگر غلطی سے نامحرم پر نظر پڑ جائے تو فوراً نظریں ہٹالے، نظروں کو وہاں جمائے نہ رکھے۔ ایک حدیث مبارکہ میں ہے: "جریر بن عبداللہ بجلیؓ فرماتے ہیں کہ میں نے رسول اللہ ﷺ سے (کسی ممنوع جگہ پر) اچانک نظر پڑجانے سے متعلق سوال کیا تو رسول اللہ ﷺ نے مجھے حکم دیا کہ ایسے موقع پر میں اپنی نظریں پھیر لیا کروں۔" (صحیح مسلم، حدیث نمبر: 2159)
ایک اور حدیث مبارکہ ہے: "ایک مرتبہ رسول اللہ ﷺ نے حضرت علی کرم اللہ تعالیٰ وجہہ سے فرمایا: اے علی! پہلی مرتبہ اچانک نظر پڑجانے کے بعد دوسری مرتبہ مت دیکھو، اس لیے کہ پہلی مرتبہ (بلا ارادہ اچانک پڑجانے والی) نظر معاف ہے، لیکن دوسری مرتبہ دیکھنا معاف نہیں ہے۔" (سنن ابی داود، حدیث نمبر: 2149)
اسی طرح مسندِ احمد کی ایک روایت ہے: "حضرت ابوامامهؓ سے مروی ہے کہ کوئی مسلمان جس کی نظر پہلی مرتبہ کسی عورت کے محاسن پر پڑے، اور پھر وہ اپنی نظروں کو جھکالے تو اللہ تعالیٰ اس کے بدلے اس کو ایسی عبادت کی توفیق دیں گے جس کی وہ حلاوت محسوس کرے گا“۔ (مسندِ احمد،حدیث نمبر: 22278)
اس آخری حدیث کی سند اگرچہ ضعیف ہے، لیکن فضائل کے باب میں ضعیف سند بھی قابلِ قبول ہوتی ہے۔
باقی "نظرِ کنایہ" اور "نفس کے کچھ نہ کچھ چُرا لینے" سے آپ کی مراد کیا ہے؟ اس کی وضاحت فرمائیں، تاکہ اس کا شرعی حکم بتایا جاسکے۔